Matthew 17

Yeesus mia sira onaiya imenarek

(Mak 9.2-13, Luk 9.28-36)

Aria fofa ikur okaiwi-pa kuisow ikiweya Yeesus-ke Pita ne Yems ona wiamun Yon wiam arow naap wia aawep ema maneka iinan wia pikiwep wiisow muuta nan ikemik. Nan ikok o urufam-ikaiwkin mia sira onaiya imenarek. Ona miira-ke ama saarik wilinek, ne ona mia suuwowa kia melin akena wiar imenarek. Ne Moses Elaiya ikos imenarep o wameiya aakunem-ikemik. Ne aria Pita-ke Yeesus maakek, “Maneka, eliw akena i fan urupemik! No eliw naeya-na i marari koora arow nia kuomiyen, oko nena, aria oko Moses ne oko Elaiya.” Naap maem-ikaeya maa ipisia parin onaiya nain-ke oromi wia wakesimok. Ne aakunowa-ko maa ipisia tepak-pa feenap maek, “Muuka fain yena kema muneka-ke, yo manek akena kookaliyem. Ni opora wiar miimeka.” Aria wiam arow nain naap miimap kema tootonep keema wueskap iima ifemakep miira wiam pipilimemik. Ne Yeesus-ke ekap wia tiimami wia maakek, “Ni iikireka, me keker opaka!” Ne aria wi iikirap mokoka wuamik-na mua wiam erup me wia urufamik, Yeesus waisow nan ikua. Aria wi ema-pa orom-ikok Yeesus-ke opor kekanowa wia maakek, “Ni maa aakisa urufaman nain me wia maakeka. Naap ikaeya yo Mua Muuka umep iikiramkun iiwawun maeka.” 10 Ne o nokaremik, “Moram naep wi sira amis mua-ke maimik, ikoka Elaiya kiikiriw ekapinon?” 11 Ne wia maakek, “Opor makena maimik, Elaiya kiikir ekapemi maa unowa kakenap-puinon. 12 Nain aakisa yos-ke nia maakiyem, Elaiya iiriw ekapok, nain o urufap wi amisarep me ilenamik. Ne wiena kookalowa-pa o sira samo-samora onam-ikemik. Ne ikoka Mua Muuka pun sira naapiw samoram-ikaikuan.” 13 Naap wia maakeya kema aawemik, Yon Baptais maek, naap maemik.

Yeesus-ke takira puep kirem-ikua nain saliwak

(Mak 9.14-29, Luk 9.37-42)

14 Aria wi ema-pa ikok oromik-na yakeyak maneka nan taanep ikemik. Ne mua oko-ke ekap Yeesus miir onoma-pa keema muuna mikami maek, 15 “Maneka, yo muuka-ko eliw efar kemalinan-i e weetak? O eliwa me ikaiya, anane puemi mukuna-pa oraiya ne eka-pa oraiya. 16 Naapeya nena teeria papako nain wiar amapekapem, nain wi saliwowa me pepek.” 17 Naeya wia maakek, “Ni aakis teeria fain, yo opora baliwep me efar opiman, ne ni mua unowiya ikiwos samora-ke. Yo anane niamiya ikainen-i? Ne anane nia asipam-ikainen-i? Aa, no muuka amapepe.” 18 Aria muuka pekapeya sawur nain kakankeya ewur akena mia wiar piipuap orok. Ne sariarek.

19 Aria naap ikok Yeesus waisow ikaeya ona teeria-ke ekapep nokaremik, “Moram i sawur fain iirarowa me pepek?” 20 Naeya wia maakek, “Yo makena nia maakiyem. Nain ni yo opora makena efar opowa kema-pa lawiliw muuta niar ikainon-na ni ema fain eliw maakowen, ‘No feeke iikirap eenek eke!’ Naap maakowen-na eliw naap ekinon. Ni kema naap niar ikainon-na maa muutitik naiman nain makena urufowen. 21 Aria ni sawur sira feenap nain wia iirarowa nain oram me wia iirarowen. Niam purimap Mua Maneka faremi eliw iirarowen,” naap wia maakek.

Yeesus umep iikirowa nain wame maek

(Mak 9.30-32, Luk 9.43-45)

22 Aria ona teeria unowa nain iiwawun Galili-pa wiam fiirimep ikaiwkin wia maakek, “Yo Mua Muuka iiwua wapena-pa efa wuiwkin efa ifakimikuan. Ne ikoka fofa arow-pa iikirinen!” Naap maeya ona teeria kema iiwawun samoraremik.

Yeesus tempel koora sesa wiek

24 Aria Yeesus ona teeria wiamiya ekapep Kapeneam-pa fuunemik. Fuuniwkin tempel koora takis aawow mua oko-ke ekap Pita maakemik, “Ni niena somek mua tempel koora takis-ko ariya-i?” 25 Ne maakek, “Ae, takis ariya.” Naap wia maakep-puami koor kemena ikiweya Yeesus-ke maakek, “Saimon, no-ko mae. Miiw unowa takis aawimik nain wi owow saria mane-maneka-ke naarew wiar aawimik, ne bisnis takis naarew wiar aawimik? Wiena teeria mua-i e owow oko mua wiar aawimik?” 26 Ne Pita-ke maek, “Wi owow oko mua takis wiar aawimik.” Naap maeya Yeesus-ke maek, “Ae, naapeya-na wiena muuka wiipa takis me wiar aawimik nae. 27 Nain i Auwa tempel koora takis wuikua, wi takis aawow mua kema me yia bagiwiruk. Naapeya no orop eka-pa kaul wafure. Ne mokomokoka mera mufep aawin nain opaimika iipap maamuma urufinan. Nain aawep pikiwemi tempel koora takis wue. Maamuma nain yiam erup takis wuowa pepek.”

Copyright information for `MHL