Matthew 19

Yeesus muewowa puukowa emi wia maek

(Mak 10.1-12, Luk 16.18)

Aria Yeesus opor unowa nain wia maakep weesereya Galili piipuap Yuudia kame urupok. Urupemi Yodan eka kame okaiwi puukap ekak. Nan ikok mua unowa ookam-miemik nain napuma wia saliwak. Nan ikaeya wi Farisi papako-ke ookap ekapep akimami feenap nokaremik, “Mua ona emeria opor onoma marew, nain ona kookalowa-pa emeria iirariya nain i Moses sira wuomakek nain yiar puukiya-i e weetak?” Naeya wia maakek, “Ni Mua Maneka opor ara oko-ko me urufiman-yon aa? Feenap, o miiw maa unowa tawerarep emeria mua onaiya wia onak. Wia onap-puap maek,

‘Naapeya mua emeria aawep ona onak wiawi wia piipuap emeria ikos epaskun ikauk.’
(Yenesis 2.24)

Naapeya wiam teekap ononer me ikaimik, weetak, wiam erup ememiria ikaimik. Mua Maneka ememiria wia wuak nain wiam erup wiam teekap-puowa-ko me ikua.” Naap wia maakeya wi Farisi-ke kiiriw nainiw nokaremik, “Makena, nain moram Moses-ke sira fain yia wuomak, mua ona emeria iirarekam naep-na maifa siisimep emeria nain iwep iirarinok naek?” Ne wia maakek, “Nain ni emina kekaniwkin Moses-ke sira nain nia wuomak. Nain iiriw Mua Maneka miiwa onak nain sira naap-ko me wuak. Aakisa yos-ke nia maakiyem, mua ona emeria soma me oraiya nain oram maneka iirarep emeria oko aawinon-na mua nain-ke soma orok naiyem.” 10 Naap maeya ona teeria-ke iikirap maakemik, “Naap nain oram ikowa eliw-yon.” 11 Ne wia maakek, “Sira nain mua unowa ookowa me pepek. Mua Maneka-ke mua kui-kuisow naap wia wueya eliw oso-osena ikaimik. 12 Mua emeria me aawimik nain onoma unowa. Papako wiena onak-ke naap wia muukarimik, papako wiena mua-ke mia wiam samorimik ne papako Mua Maneka uuwowa onomu naep emeria me wia aawimik. Naapeya o mua naap nain emeria me aawowa pun eliw.” Yeesus-ke naap maek.

Yeesus wi takir muutitik kekanowa wiek

(Mak 10.13-16, Luk 18.15-17)

13 Aria wi takir muutitik Yeesus wiar amapekapemik, wapena ikiwosa-pa wiar wuap Mua Maneka fareya kekanowa aawuk naep. Ne ona teeria-ke onak wiawi wia kakankami iiraremik. 14 Naeya Yeesus-ke wia maakek, “Ni moram naep muutitik fain wia iirariman? Efar ekapuk. Moram Mua Maneka pika kemena nain wi takir muutitik feenap nain-ke kemena wiar ekikuan.” 15 Naap maep wapena ikiwosa-pa wiar wuami kekanowa wiep-puami ikiwok.

Yeesus maamuma mua oko opora maakek

(Mak 10.17-31, Luk 18.18-30)

16 Ne aria iir oko mua oko-ke Yeesus ookap ekapep nokarek, “Somek mua, yo sira eliwa kamenap onap anane Mua Maneka wameiya ikok eliwa ikainen?” 17 Naeya maakek, “Moram maa eliwa nain efa nokarin? Mua Maneka-ke ona waisow eliw ikaiya. No anane o wameiya ikainen naep-na, Moses sira wuomakek nain baliwep akena ooke.” 18 Naap maeya mua nain-ke maakek, “Sira kaanin akena nain baliwep ookinen?” Naeya maakek, “Sira feenap, mua me wia ifakime, soma me ore, maa me wiar ikumare, wadol opora me wia ife. 19 Nena neene niawi opora wia miime, ne mua oko pun wia kookale, nena name kookalin naap.” 20 Naeya mua nain-ke maakek, “Yo sira unowa nain iiwawun ookurumem, nain sira eliwa kain akena fienam?” 21 Ne Yeesus-ke maakek, “Aria no sira eliwa-pa ikok anane eliw ikainen naep-na no ikiwemi nena maa unowa nain iiwawun sesekomake. Ne maamuma neeke imenap wi mua oorpowa nain wia asipe. Naap oninan-na no owow iinan-pa maa ele-eliwa akena nain nefar ikainon. Aria ekapep yo yooke.” 22 Aria mua nain naap miimap miikapura pain-ikiwok. Moram o maa unowa akena wiar ikua.

23 Ikiweya Yeesus ona teeria wia maakek, “Makena, wi maamuma mua Mua Maneka pika kemena wiar ekowa nain yoowa akena, maa unowa wiar ikua nain-ke wia opap ikua. 24 Yo nainiw nia maakiyem, feenap, maa eneka maneka wuara gelemuta-pa ikiwowa nain yoowa. Ne wi maamuma mua Mua Maneka pika kemena wiar ekowa nain yoowa akena.” 25 Aria ona teeria opora nain miimap samor akena soranep maemik, “Naapeya Mua Maneka mua kuisow-ko me wia aawinon-i?” 26 Naap maiwkin mokoka toonep wia urufami maek, “Mua Maneka pika kemena wiar ekowa nain mua wieniw me pepek, nain Mua Maneka-ke eliw wia aawinon. Moram maa unowa onowa maek nain pepek eliw oninon.” 27 Ne aria Pita-ke iikirami maek, “Aria i kamenap ariyen? I yiena maa unowa piipuap no nookam-miawimik.” 28 Ne wia maakek, “Yo maken akena nia maakiyem, wiimar epa kireya Mua Muuka unum maneka aawep ona pokow epa eliwa-pa pokinon. Ne ni yo yookiman nain pun ikoka unum maneka aawep ni Isrel kerekera maneka ten kuisow erup nain wia urufam-ikowen. 29 Ne wi mua yo muuta nain wiena owowa piipuami wiamun, wekera, onak, wiawi, muuka wiipa pun wia piipuamik. Ikoka Mua Maneka wia ane-maisomami baliwep akena wia saliwinon. Ne wi Mua Maneka wameiya anane eliwa ikaikuan. 30 Aria wi unowa aakisa miimowa-pa ikemik nain ikoka murarikuan ne wi murarowa-pa ikemik nain miimow mua ikaikuan.” Naap maek.

Copyright information for `MHL