Matthew 21

Yeesus Yerusalem urupok

(Mak 11.1-11, Luk 19.28-40, Yon 12.12-19)

Aria wi ikiwep Yerusalem mamaiyarem-ikok owowa unuma Betfage naimik nan fuunemik, owowa nain Oliw ema kame kiira-pa ikua. Nan ikok Yeesus ona teeria mua erup wia sesekak. Ne wia maakek, “Owowa eefin ikiwep donki muuka iimarow eremina onak onaiya kaikap-puamik nain urufowen. Urufap-na ifara wasirkap onak onaiya aawep pekapomeka. Ne mua-ko nia nokarinok-na feenap maakeka, ‘Yiena saria mauwowa wiar ikaeya aawimik.’ Naap maakowen-na eliw aaweka nia naakinon.” Ne opora naap imenarek nain iiriw profet opora maek nain naap akena imenarek. Feenap maep-puak,

“Wi Yerusalem wiipa wia maakeka, ‘Ni urufeka, niena owow saria fan urupem-ikaiya! O mua kekelka ikaiya nain-ke, ne donki iinan-pa pokap urupem-ikaiya. Donki nain aakisa fan arimok, iimarow eremina ikua.’”
(Aisaiya 62.11, Sekaraiya 9.9)

Aria wiam erup ikiwemi Yeesus wia maakek naap akena onamik. Donki muuka onak naap aawep wia pekapep iwemik. Ne wiena mia suuwowa papako nain donki iinan-pa ikowiwkin Yeesus iinan pokap ikiwok. Ne yakeyak maneka wiena mia suuwowa era-pa ikow-ikiwemik, ne papako nomokow mekira pu-puukap era-pa wu-ikiwemik. Yeesus wi yakeyak maneka gone-pa wiar ikiwem-ikua, mua papako miimemik ne papako muraremik. Faremi ikiwem-ikemik,

“Oo, Dewit nembesir unuma wiar fakerikua! Eena Mua Maneka unuma-pa ekapiya nain Mua Maneka-ke kema eliwa iwinok! I Mua Maneka unuma fakerikua!”
(Someka 118.26)

Naap ma-ikiwem-ikemik.
10 Aria Yeesus ikiwep Yerusalem-pa fuuneya yakeyak maneka o urufap soranep kema unu-unowa wuap wieniw wiam nokaremik, “Nee, mua nain naarewe-ke?” 11 Ne mua papako-ke wia maakemik, “Mua nain-na Yeesus-ke, wi Galili kame Nasaret mua-ke. O Mua Maneka profet-ke.”

12 Aria Yeesus tempel pika kemena ikiwok-na wi epa nain maa sesekam-ikaiwkin wia urufak.
21.12Wi maa sesekamik nain feenap, tempel epa-pa ona Mua Maneka patirowa-ke. Ne maa nain maamuma oko, tempel maamumaiw sesenarimik. Naapeya maamuma nan kiripam-ikemik.
Naap wia urufap wia fa-faemi maamuma kiripap tempel maamuma wiimik nain esimsa wiar anu-fienomakek, ne nepa ibiamun sesekam-ikemik nain pun pokow maa wiar anu-fi-fienak.
13 Ne wia maakek, “Mua Maneka opora siisimep-puamik nain feenap maek,

‘Yena koora-na yo efa kema suuwap efa farowa epa-ke.’
(Aisaiya 56.7)

Nain nis-ke ikum mua koora arowaman.”
14 Aria naap wia maakep nan ikaeya wi mua mokok opa ne wi mua kepur samora nain wiar epamik. Ne wia saliwomakek. 15 Sira naap oneya takir muutitik-ke naap urufap kakaem-ikok faremi maem-ikemik, “Dewit Nembesir unuma fakerikua!” Naeya wi pris woos mua ne wi sira amis mua unowa naap urufap kema bagiwiramik. 16 Naapeya Yeesus nokaremik, “Moram wi takira unuma nefa purupemi farimik nain, me wia poporarowin? No me miimin-i?” Ne wia maakek, “Yo miimam-ikaiyem. Nain ni Mua Maneka opora maek nain me urufaman-i? Feenap maek,

‘Takir muutitik ne wi muuka meseka enem-ikaimik nain kema wia iikiroweya no unuma baliwep akena nefa fakerikuan.’
(Someka 8.2)

Naap maek.”
17 Naap wia maakep-puap wia piipuap oromi Betani owowa wiar ikiwep nan inek.

Yeesus nomokowa fik amukareya ififarek

(Mak 11.12-14 ne 11.20-24)

18 Aria epa wiimeya uuriw Yeesus iikirap ona teeria onaiya Yerusalem kiiriw nainiw urupok. Urupem-ikok wuailek. 19 Wuailep nomokowa fik era pona-pa ikaeya urufak. Ne makena-ko aawep eniminen naep ekap urufak-na wia, makena marew, ifa muutiw ikua. Naap urufap nomokowa nain maakek, “No ikoka me makenarinan!” Naap maem-ikaeya ona mokoka-pariw ififarek. 20 Ne ona teeria-ke naap urufap soranep maemik, “Nee, sira kamenap naep nomokowa fain aakisa kuisow ififarep-puak noma?” 21 Naap maiwkin wia maakek, “Yo maken akena nia maakiyem. Ni kema unowa me wuowa yo opora kekanowa efar opam-ikok-na nis pun eliw naap onowen. Nis pun yo nomokowa fik maakemkun ififarek, ni naap eliw onowen. Neemi maa maneka, ema pun eliw maakowen, ‘No iikirami ifera-pa name wafure,’ naap maakowen-na eliw naap arinon. 22 Ni opora kekanowa efar opap koonowap ikok Mua Maneka maa-ko nokarowen-na eliw aawowen.” Naap wia maakek.

Yeesus uuwowa onoma wiar nokaremik

(Mak 11.27-33, Luk 20.1-8)

23 Aria Yeesus tempel pika kemena ikiwok. Nan ikok Mua Maneka opora suule wia onam-ikaeya wi pris woos mua, wi owow woos mua unow onaiya wiar epap nokaremik, “Ei, no inon sira onan nain naareke nefa sesekeya nain onan? Ne naareke kekanowa niemi uuwowa fain niek?” 24 Naap nokariwkin wia maakek, “Ne yos pun opora kuisow-ko nia nokarinen, ne ni opora yo pepek kiripomowen-na yo kekanowa naareke yieya sira-sira oniyem nain nia maakinen. 25 Feenap, iiriw Yon-ke eka-pa wia yasuwam-ikua nain naareke sesekeya naap onak? Mua Maneka-ke uuwowa iwok-i e wi mua-ke maakemik?” Naeya wi-wieniw aakunemi maem-ikemik, “I kamenap maiyen? I feenap maiyen-na, ‘Mua Maneka-ke uuwowa nain iwok,’ naap maiyen-na yia mainon, ‘Naap nain moram opora me wiar opaman?’ 26 Ne i feenap maiyen-na, ‘Yon uuwowa nain wi mua-ke maakemik,’ naap maiyen-na yia samorikuan. Moram wi mua unowa fain Yon Baptais Mua Maneka profet-ke naimik.” 27 Naap maep maakemik, “I me amisaremik.” Naeya wia maakek, “Naapeya-na yos pun me nia maakinen, mua naareke mauwowa fain yiek.”

Mua Maneka opora wiar miimowa sira

28 Aria Yeesus opora oko wia maakek, “Aria aakisa opora fain efar miimap kema suuweka. Feenap, mua oko muuka wiam erup ikemik. Ne muuk iperowa wiar ekap maakek, ‘Aa, muuka, no ikoka-ko ikiwep wain piita saliwe.’ 29 Ne muuka-ke maakek, ‘Yo miatinem.’ Wiawi naap maakep sela marewarep ikok kema kirep aakisa fan wain piita mauwowa ikiwok. 30 Naap ikok muuk kapa maakeya maakek, ‘Eliw, yos-ke ikiwinen.’ Wiawi eliw naakek nain me ikiwok. 31 Aria opora nain ni-ko maeka, muuka kaanin-ke wiawi opora opak?” Ne maakemik, “Iperowa-ke.” Naap maiwkin wia maakek, “Yo maken akena nia maakiyem, wi takis aawow mua ne wi era emeria wi kiikir miimep Mua Maneka pika kemena wiar ekikuan, ne ni weetak. 32 Moram Yon Baptais ekapok nain era nia ofakowami nia maakek, ni pina wasirkiwkin Mua Maneka-ke pina nia iirarominon. Naap nia maakek, nain nis-ke opora me wiar miimaman. Ne wi takis aawow mua ne wi era emeria kema kirep o opora miimamik. Ne ni sira naap wia urufaman, nain ni kema me kirep opora me wiar ookaman.” Naap wia maakek.

Wain piita uuwow mua wia maek

(Mak 12.1-12, Luk 20.9-19)

33 Ne aria arekin opora oko wia iromak, “Aria ni opora fain-ko miimeka. Mua oko ona miiwa-pa wain piita onap nomoniw pika warikak. Ne eruwa kuak, ikoka wain makena neeke wuap ititap eka urupeya aawikuan. Ne iinan koora pun kuak. Onap-puap wain piita nain mua oko wapena-pa wia wuap-puomami owow oko epasia ikiwok. 34 Nan ikok wain makena aawowa saana-pa ona uuwow mua wia sesekak, wain makena-ko aawep pekapomuk naep. 35 Wi iwap fuuniwkin wi teeria nain-ke iikirami wia fa-faemi oko arufamik, oko oram enuma ifakimemik ne oko nomon ika waremik. 36 Ne aria naap ikok kiiriw papako wia sesekak. Teeria nain lawisik unowa. Ne wis pun sira naapiw wia onamik. 37 Ne naap ikok kema feenap wuap ona muuka sesekak, ‘Yo yena muuka sesekamkun ekima opikuan.’ 38 Ne muuka sesekeya ikiwok. Ikiwep fuuneya urufap wi-wieniw maemik, ‘Nee, ona muuka nanek. Ikoka os-ke wiawi epa wiar aawinon. Arika, ifakimikua. Ne miiwa ne maa onoma is-ke wiar aawiyen!’ 39 Naap maep muuka nain opap pika okaiwi-pa wafurap ifakimiwkin umok. 40 Ne aria ni-ko maeka, ikoka miiw onoma nain kiiriw ekapemi wi mua nain kamenap wia oninon?” 41 Ne maakemik, “O ekapemi wi mua samora nain samor akena wia ifakimeya umikuan. Ne wain piita nain teeria oko wiinon. Ne wi teeria eliwa nain ikoka wain makena aawow saana-pa makena aawemi okaiwi ona iwikuan.” Naap maakemik. 42 Ne wia maakek, “Ni pepek maeman. Ne Mua Maneka opora ara siisimep-puamik fain-ko me urufaman-i?

Feenap,

‘Poka iiriw koora kuow mua-ke samora-ke naep iiraremik. Aakisa poka nain-keriw koor umua poka arep ikua. Maa nain Mua Maneka-ke naap oneya anirak. Ne i urufap soranep kakaemik.’
(Someka 118.22-23, Aisaiya 28.16)

43 Naapeya nia maakiyem, Mua Maneka pika kemena wiar ekowa nain ni me wiar ekowen, weetak. Wi owow oko oko Mua Maneka opora wiar miimap ookimik nain-ke kemena wiar ekikuan. 44 Ni opora me miimiman nain feenap arowen, poka nain iinan-pa oraiman nain oona iiwawun ku-kuep sowa-sowa arowen. Ne poka nain-keriw ni mia-pa niar oromi nia ifemakeya ni iiwawun ititalep mefa kuowen.” Naap wia maakek.

45 Aria o wi pris woos mua ne wi Farisi arekin oporiw wia mae-ekapok nain miimap furewamik, opor unowa nain i yia maiya, naap maemik. 46 Naemi iir nain o opu naep maemik-na yakeyak maneka o profet-ke naemik. Naapeya wia keker opamik.

Copyright information for `MHL