Matthew 23

Yeesus-ke wi Farisi wadol sira wiar maek

(Mak 12.38-39, Luk 11.43,46, ne 20.45-46)

Wi yakeyak maneka ne ona teeria pun ikaiwkin Yeesus-ke opora wia maakek. Feenap maek, “Wi Farisi ne wi sira amis mua, wi Moses sira wuomakek nain aakunep amisar-afuramik. Naapeya wi opora nia maakimik nain ookeka. Ne wi sira-sira onimik nain me wiokeka. Moram wi maa nia maakimik nain wiena pun me onimik. Ni sira unowa ookowa nia suuwimik, nain wiena sira nain gelemuta-ko me ookimik. Ne pun lawisiw muuta-ko me nia asipimik. Ne wiam irami feenap onimik. Mua Maneka faremi bokis gelemuta
23.5Wi Yuuda-ke Mua Maneka opora ara kui-kuisow maifa tiira-pa siisimep bokis gelemuta-pa wuap ekima-pa ne akua-pa kaikap Mua Maneka faremik.
eena ekima-pa ne akua-pa kaikimik nain wi bokis lawisiw maneka onimik. Ne konim miirfa fuula maa-maala nain wuap lotu ikiwimik. Wi emeria mua yia urufap wi mua makena-ke yia mauk naep naap onimik.
Ne maapor epa-pa wi epa eliwa-pa pokiyen naimik. Ne lotu koora-pa pokow eliwa miimowa-pa ikua nain kookalimik. Ne fiirimow epa-pa mua tetera-ke yia naemi ‘Oo somek mua’ naap yia faruk naep kookalimik. Wi sira naap onimik.

Aria ni yo teeria, ni somek mua me niam naeka, moram ni unowa fain ni niamun epia ikeman ne niena Maneka mua kuisow akena. Ne ni Auwa kuisow owow iinan-pa niar ikua. Naapeya miiw mua oko auwa maneka naemi me fareka. 10 Ne pun niena saria kuisow akena, o waisow ne o Krais-ke. Naapeya saria maneka me niam naeka. 11 Ni teeria fain woos mua ikainok-na ni tepak-pa niar uuwam-ikainok. 12 Moram sira-ke feenap ikua, o mua unuma wame purupiya nain ikoka poraikuan. O mua unuma wame poraiya nain ikoka unum maneka iwikuan.”

Yeesus wi Farisi wia amukarek

(Mak 12.40, Luk 11.39-52 ne 20.47)

13 “Aria ni sira amis mua ne ni Farisi, ni ikoka samor akena aawowen. Ni wadol mua-ke. Mua Maneka pika kemena wiar ekowa nain nis-ke era wiar mika-puukiman. Ne niena pun me ekiman, ne wi mua papako eku naep onimik nain wia mika-puukiman. [ 14 Ne ni emer apura wia peeskimemi maa unowa wiar ifemakiman. Ne wadolalemi yia miimuk naep Mua Maneka farowa maala mufiman. Aa, ni wadol sira nain-pa ikoka yoowa manek akena aawowen.] 15 Ni somek mua ne ni Farisi nefa komarka, ni ikoka samora akena aawowen. Ni mua wadola-ke. Wi mua-ko i teeria yiar arinok naep mia me niam kema suuwap owowa unowa wiar ikiwemi opora wia maakiman. Ne mua kuisow ni teeria niar ekak. Ne ni nieniw sira naap onami epa mukuna ikiwowen. Ne os-ke ni niokami epa samora pun ikiwemi iiwawun samor aawinon.

16 Ni mokok opa, ni maiman, i sira unowa suule wiiyen. Ni feenap wia maakiman, ‘Ni opora maep koonowu naep-na tempel koora unufami opora maiman nain makena me arinon. Ni gol tempel koora-pa ikua nain unufami opora maowen-na ni opora nain ookami maa onowen,’ ni naap wia maakiman. 17 Ni momora, kema pukow marewa-ke. Tempel koora maa maneka-ki e gol tempel koor kemena-pa ikua nain maa maneka-ke? Tempel-ke ikaeya gol nain maa maneka ariya.

18 Aria ni fain pun wia maakiman, ‘Ni opora maep koonowu naep-na maa patirow esimsa unufowen-na nain pun makena me arinon. Ne ni maa eneka pikiwep patirow esimsa iinan-pa wuiman nain unufap opora makena ookami maa onowen.’ Ni naapiw akena wia maakiman. 19 Ni faa, mokok opa akena-ke! Maa kain-ke maneka? Maa eneka maa maneka-ki e nomon esimsa nain maneka-ke? Nomon esimsa-ke ikaeya maa eneka iinan-pa wuiwkin eliwa ariya. 20 Naapeya wi patirow esimsa unufami opora maken akena naimik. Neemi maa eneka esimsa iinan-pa wuimik nain pun epaskun arep anirap eliw akena arinon. 21 Ne ni tempel koora unufami opora maken akena maowen-na Mua Maneka ona anane nan ikaiya nain pun unufami maowen. 22 Ne ni opora maken akena maemi owow iinan unufowen-na Mua Maneka ona pokow epa pun unufowen. Neemi Mua Maneka opora nia miimam-ikaeya ni opora maken akena maowen.

23 Ni sira amis mua ne ni Farisi, ni mua wadola-ke. Ni ikoka samor aawowen. Ni Mua Maneka patiru naep maa muutitik, maawa ne lombu, naap fiirimep mokoka ten kuisow arowap mokok kuisow pikiwep Mua Maneka patiriman. Ni sira muutitik ookiman, nain ni sira maneka nain me ookiman. Sira feenap nain, opora make-makeniw ookowa, mua oko wia kemalep wia saliwowa ne Mua Maneka opor makena wiar opap ookowa. Sira eliwa unowa nain anane ookam-ikok maa muutitik nain okaiwi Mua Maneka patirekaman-na eliwa. Nain ni naap me oniman.

24 Ni somek mua faa, mokok opa akena-ke. Niena maa epira karia-ke oreya kekelka muuta iirariman, ne maa eneka samora-ko maa-pa niar ikaeya me urufowa iiwawun iriniya muiman.

25 Aria ni sira amis mua ne ni Farisi, ni samor aawowen. Ni wadol mua akena-ke! Ni mia muura iiraru naep niena urupa epira naap oram mikikira yasuwiman ne kemena me yasuwiman. Nain ni ikum sira ne niena mia kookalowa niar taanep ikua. 26 Ni Farisi faa, ni mokok opa akena-ke. Ni niena urupa epira kemena pun yasuwowa saarik aremi sira samo-samora iirareka. Naeya ni sira eliwa-pa ikowen.

27 Ni sira amis mua ne ni Farisi, ni wadol mua-ke, ni samor aawowen. Ni feenap saarik, mua wia soopimik nomon ona nain ofa kiaiw ifimik. Mikikira-pa urufowa eliw oram ne tepak mua oona-ke taanep ikomakek, ne maa samo-samora pun nan ikomakek. 28 Nis pun sira naap, mua unowa mokok epa-pa ni sira eliwa. Nain niena kema tepak wadol sira-ke ne sira samora-ke niar taanep ikomakek.

29 Ni somek mua ne ni Farisi, ni wadol mua-ke, ni samor akena aawowen! Wi iiriw profet ne wi mua kaken eliwa ikemik nain wia ifakimiwkin umemik nain wia soopamik. Ne nis-ke wia soopowa epa wiar saliwami dubil akena wuiman. 30 Ne nieniw niam maiman, ‘I iiriw yiena nembesir epa-pa ikekamik-na wi sira wiokami wi profet me wia ifakimekamik,’ naap maiman. 31 Ni anane naap maiman nain ariman niam wuiman. Wi iiriw profet wia ifakimem-ikemik nain, ni nembesir niar ikemik. 32 Naap nain iiriw niena nembesir sira samora onowa onoma wuamik nain ookami wia ifakim-ikip uuwowa nain welaweka.

33 Ni ifa akena-ke, ni ifa upowa-ke ikeman! Mua Maneka ni mua samora-ke nia naemi epa samora me nia sesekinon-i? Ni baurarowa me pepek. 34 Naapeya wi profet ne wi mua kema pukowa ne somek mua wia sesekamkun papako wia ifakimowen, papako nomokowa moke-pa patot wia warowen ne papako lotu koora-pa wia arufowen. Ne wia fa-faem-ikaiwkin owow oko-oko-pa purer mua arem-miawikuan. Naap wia onam-ikowen. 35 Naapeya ni maa urufap! Ni pina aawowen. Wi mua eliwa miiwa-pa fan ikemik nain wia ifakimiwkin aka miiwa-pa fan orok. Sira naap nain iiriw Abel ifakimok nain-pa onoma wuap ekapep ekapep Berekia muuka Sekaraiya-pa. Sekaraiya-na tempel koora ne maa patirimik esimsa gone-pa ifakimeman. 36 Yo maken akena nia maakiyem, wia ifakimemik nain pina nain ni teeria fain-ke akuawep yoowa akena aawowen.” Naap wia maakek.

Yeesus Yerusalem kemalep omok

(Luk 13.34-35 ne 19.41-44)

37 Aria Yeesus Yerusalem opariya omok, “Oo ni Yerusalem, emawa, nis-ke anane wi profet wia ifakimiman! Ne Mua Maneka mua papako wia sesekeya niar ekapimik nain pun nomon ika wiariman. Emawa, ni emeria mua yena kemena-pa nia wuap nia kakaltekam oo. Aara eena muuka eewua tepak-pa wia wuiya, yo naap nia onekam naep onam-na niena miatineman. 38 Aa, Mua Maneka iiriw nia piipuak, ni mikikira nia uumow mua marew, ni maatarep ikowen. 39 Yo nia maakiyem, ikoka yo me efa urufowen. Ne wiimar feenap maemi-na efa urufowen, ‘Yiena Maneka Mua Maneka unuma-pa wiar ekapok nain unuma purupiyen.’”

Copyright information for `MHL