Matthew 24

Yeesus miiwa weeserowa maek

(Mak 13.1-2, Luk 21.5-6)

Aria Yeesus tempel koora-pa ikok orop ikiwem-ikaeya ona teeria-ke wiar ekap tempel koora nain urufap kakaemik. Naeya wia maakek, “Ae makena, ni koora maa ele-eliwa fain urufap kakaiman-i? Yo maken akena nia maakiyem, ni koora urufiman fain ikoka nomona kuisow nomon oko iinan-pa me ikainon, weetak. Pika nain ikoka iiwawun te-teekiwkin ururomakinon.” Aria naap wia maakep-puap Oliw ema urupok. Nan pokap ikaeya ona teeria wiisow ookap urupemik. Urupep maakemik, “I baliwep yia maake, maa maen nain iikamin akena-ko imenarinon? Maa mauwa-ke imenareya i ilenap amisarep maiyen, no ekapowa maen nain miiwa weeserow epa nain faneka, naap maiyen.” Naeya wia maakek, “Ni maa uru-urufami ikeka, oko wi mua oko-ke ekapep nia peeskimikuan. Ikoka mua unowa ekapemi yo efa unufami maikuan, ‘Yo Krais-ke,’ naap maemi emeria mua unowa wia peeskimikuan.

Aria irakowa feekeriw miimowen ne wi epasia-pa irakowa meta wiar miimowen. Ni nain me keker opaka. Makena, sira nain ikoka owow unowa pun wiar imenarowa-ke. Nain miiwa weeserow epa eewuar ikua. Owow unowa ikoka wi-wieniw irakikuan ne owow oko saria-ke owow oko irakowa fee-feekeriw arikuan. Miiw unowa weniw maneka imenarinon, ne maa ofofona pun imenaromakinon. Nain yoowa aawow epa onoma wuak nain-ke. Wi emeria muukaru naep sirirowa aawimik naap. Iir nain yo muuta nain nia opap nia samorami nia ifakimikuan. Miiw unowa wi mua unowa nia iririmem-ikaikuan.

10 Iir nain emeria mua unowa yo opora ookam-ikok piipuikuan. Naap onami wi-wieniw wiam fo-fookap wiam siriremi oko-ke iiwua mua kokot wia maakiwkin yo teeria mua wia opap wia samorikuan. Naap wia onikuan. 11 Ne mua unowa wadolalemi i profet-ke wiam maemi mua unowa wia peeskimikuan. 12 Wi teeria nain sira samo-samora naap oni-ikiwiwkin sira maneka eena mua oko wia kookalowa sira nain iiwawun mesenalinon. 13 Nain wi mua kekanep yo opora baliwep ookimik nain-ke anane eliw ikowa imenikuan.

14 Ne ikoka Mua Maneka pika kemena-pa ikowa opor eliwa nain miiwa unowa fain pikiwiwkin epa aawinon. Ne iir nain mua unowa sira wiam furewap maikuan, ‘Mua Maneka opora makena-ke.’ Naap ikok miiwa weeserow epa imenarinon. 15 Epa nain maa samora akena tempel koor kemena-pa me ikowa nain neeke iimarep ikaeya urufowen. Maa eena iiriw profet Daniel maek nain. Ni opora fain miimiman nain kemena baliwep aaweka.

16 Maa naap imenareya wi Yuudia-pa ikemik nain baurarep ema urupomakuk. 17 Wi mua koor iinan-pa ikok-na neekeriw bauraruk, koor kemena ikiwep maa unowa me aawuk. 18 Ne wi mua manina-pa ikok-na owowa kirep ekapep konim kuruma me aawuk. 19 Wiisak aa, wi emeria urom onaiya ne wi muuk wesusa onaiya ikemik nain kamenap arikuan? 20 Naapeya ni Mua Maneka fariwkin maa samora nain dabel saana-pa e Sabat fofa-pa me imenarinok. 21 Moram sirirowa samor akena ikoka imenarinon. Nain iiriw miiwa fain imenaremi maa naap-ko me imenarem-ikua, iir nain iiwawun imenarinon. Imenareya nain ikoka nainiw weetak. 22 Wi yoowa aawow epa nain Mua Maneka-ke ona teeria wia nanikap-puak nain wia kema suuwap epa samora nain ara-pa puukinon. Me puukekak-na mua kuisow me ikekamik.

23 Epa nain mua oko-ke nia maakikuan, ‘Krais faneka,’ e ‘O eenan ikua.’ Naap nia maakiwkin-na me wia miimeka. 24 Moram mua unowa wadolalemi yo Krais-ke naikuan. Ne papako-ke wadolalemi yo profet-ke wiam naikuan. Naap maemi mua unowa wia mufemi maa miililina sira-sira imenam-ikaikuan. Naap onami Mua Maneka ona teeria wia nanikap-puak nain pun wia peeskimu naep onikuan. 25 Miimeka, maa ikoka imenarowa nain yo aakisa iiwawun nia maakem fanek. 26 Naapeya mua-ko nia maakiwkin-na, ‘O ekapep epa asia nomon manekiw nan ikua,’ naap nia maakiwkin-na neeke me ikiweka. Wi maikuan-na, ‘Urufeka, o fan-pariw pipilalep ikua,’ naap maikuan-na me wia miimeka. 27 Moram Mua Muuka miiwa oraiya nain ona ilen onaiya ikua. Feenap saarik, aapereka-ke wilinemi epa unowa nain iiwawun iiwkinon. Ama urupowa ne ama orowa kame iiwawun parina-keriw arinon. 28 Ne pun fain saarik, kiisua maa-ko umep ikaeya urufap pamua onaiya takunep ikaikuan, naap akena ariman urufikuan. 29 Aria epa samora nain weeserem-ikaeya ama umep kokoma teninon ne siiwa pun me wilininon. Mokoma-ke tenep ururomakinon, ne aapereka iinan maa unowa kekekrarinon. 30 Iir nain Mua Muuka wame ilenowa maa iinan-pa imenareya miiw unowa teeria naap urufap kema wiisarep omomikuan. Ona kekanowa ne mia parina onaiya maa ipisia-pa orom-ikaeya urufikuan. 31 Ne os-ke puuw kerew akena fuurami ona ensel wia sesekeya miiw unowa ikiwikuan. Ikiwep ona iiriw wia nanikap-puak nain wia aawep wia fiirimikuan, miiw okaiwi-pa iwap ikip miiw okaiwi-pa.

32 Naapeya ni nomokowa fik urufap kema aaweka. Nomokowa nain gulowa enuma mikami ifa wueya urufap maiman, ‘Aa, ama saana mamaiya arek.’ 33 Sira naap, ni maa unowa nain naap akena imenareya urufap kema aawep maowen, ‘Aa, Yeesus ekapowa mamaiya akena arek.’ 34 Naapeya yo opora makena nia maakiyem, wi teeria fain mua papako me umowa ikaiwkin maa nain imenaromakinon. 35 Aapereka miiwa onaiya ikoka mesenalinon, ne yo opora-ke me efar mesenalinon, anane naap ikainon.

36 Maa imenarowa epa kain-pa imenarowa nain mua me amisaremik. Wi ensel pun me amisaremik ne yo Muuka pun me amisarem. Auwa ona waisow amisarek. 37 Aria iiriw ekera Noa ikowa-pa sira onam-ikemik nain ikoka Mua Muuka ekapiya nain pun sira naap akena onam-ikaikuan. 38 Epa nain eka luuma me imenarowa ikaeya wi maa enow maneka onami eka enemi, wiam muewowami naap oni-ikim-ikemik. Naap ikaiwkin Noa aasa maneka urupep kemena ikiwok. 39 Ne aria wi naap momor maneka ikaiwkin eka luuma maneka-ke ekapemi iiwawun wia welawak. Aria wiimar Mua Muuka ekapow fofa-pa sira naap akena imenarinon. 40 Feenap, iir nain mua wiam erup manina-pa mauwam-ikaiwkin-na Mua Maneka-ke oko aaweya oko neeke ikainon. 41 Emeria wiam erup pun naap, wit makena ititam-ikaiwkin-na oko aaweya oko neeke ikainon. 42 Naapeya ni kema wuepap maa uru-urufami ikeka. Moram niena Maneka ekapow fofa nain ni me wiar amisareman.

43 Ni kema aaweka, feenap, koor onoma wi ikum mua uura ekapowa wiar amisarinon-na wia wuap ikainon. Naeya wi ekapep koora me wiar fookikuan. 44 Naapeya nis pun naap ikeka, Mua Muuka ekapowa nain urufami ikeka, oko o ewur me ekapinon naem-ikaiwkin ekapemi oram nia soranowap-puinon.

45 Aria feenap, uuwow mua eliwa ne kema onaiya ikua nain ona saria-ke woos mua wuinon, ona uuwow epaskun wia urufami maa enowa ama pepek wienakinon. 46 Uuwowa baliwep faem-ikaeya ona saria ekapep naap urufinon-na kema eliw ikainon. 47 Yo maken akena nia maakiyem, o ikoka ona saria-ke woos mua wueya maa unowa os-ke urufominon. 48 Aria oko mua nain ona kema-pa mainon, ‘Yena saria ewur me ekapinon.’ 49 Naap naemi uuwow epaskun wia aruf-iraparemi ona womar wiamiya eka eruaremi momor yiawem-ikainon. 50 Aria iir oko yo saria me efar ekapinon, naap naem-ikaeya saria nain feekeriw fuuninon. 51 Ekapemi naap urufap samor akena arufami sisina-pa wafureya wi wadol mua ikaimik neeke wiamiya ikok omemi enek muuna geegenem-ikainon.”

Copyright information for `MHL