Matthew 27

Yeesus Pailat wiar pikiwemik

(Mak 15.1, Luk 23.1-2, Yon 18.28-32)

Aria uuriw epa wiimeya wi pris woos mua wi owow woos mua unowiya wiam aawep aakunemik. Aakunemi Yeesus ifakimowa nain era akupamik. Aakunep-puap Yeesus wapena wiar kaikap Pailat wiar pikiwemik. Pailat eena Rom anim onoma maneka ikok kame nain urufam-ikua.
27.2Iir nain wi Yuuda Rom tepak-pa wiar ikemik. Ne wi mua kot-pa wia mekawap wia ifakimowa nain emi akena, wi Rom-ke eliw. Naapeya Yeesus opap Pailat wiar pikiwemik.


Yuudas sira kamenap onap umok

(Aposel 1.18-19)

Ne aria Yeesus opora-pa wuami ifakimu naep oniwkin Yuudas naap miimap kema samorarek. Naapeya maamuma wiar aawok nain kiiriw pikiwep wi pris woos mua ne wi owow woos mua naap wiemi wia maakek, “Yo pina onam. Yo mua pina marew nain ni wapena-pa niar wuamkun opaman.” Naeya wis-ke maakemik, “Maa nain i maa marew, nena pina-ke!” Naap maakiwkin maamuma nain tempel koor kemena-pa wafurap-puami ikiwemi ufua orok. Ne aria wi pris woos mua-ke maamuma nain aawemi maemik, “Maamuma fain mua aka sesa-ke. Naapeya tempel koora uuwowa neeke wiowa weetak, oko yiena sira puukiyen.” Naep wi aakunep maamuma nain aawep mua amina onimik nain miiwa wiar sesenaremik. Wi owow oko mua fan yiar ikok umimik nain neeke wia soopuk, naap maemik. Naapeya aakisa miiw ara nain unuma, “Aka orow miiwa” naimik. Ne profet Yeremaiya iiriw opora maek nain makena wiar arek. Opora feenap maek,

“Iiriw wi Isrel-ke o uminok naep maamuma naap puukap-puamik. Ne wi maamuma nainiw mua amina onimik nain miiwa wiar sesenaremik, Mua Maneka efa maakek naap onamik.”
(Sekaraiya 11.12-13, Yeremaiya 19.1-13, 32.6-9)

Yeesus Pailat wiar pikiwep opora-pa wuamik

(Mak 15.2-5, Luk 23.3-5, Yon 18.33-38)

11 Aria wi Yeesus pikiwep Rom anim onoma maneka Pailat miir onoma-pa iimarowamik. Ne os-ke nokarek, “No mae, no wi Yuuda owow saria-ki?” Nokareya maek, “Opora pepek nan maen.” 12 Ne naap ikok wi pris woos mua ne wi owow woos mua naap opora mikamik-na opora kuisow-ko me wia kiripomak, weetak. 13 Naapeya Pailat-ke nokarek, “Opor unowa nefa onimik nain me wia miimin-i?” 14 Naap maakek-na opora-ko me wia kiripomak, weetak akena. Naapeya Pailat-ke naap urufap kema unu-unowa wuami maek, “Mua faa, kamenap nain-ke.”

15 Aria Pailat anane Pasowa maapora-pa sira feenap oniya, wi mua koora ekap ikemik nain wi owow mua kookalowa-pa mua kuisow unuma wiar unufiwkin piipuiya. 16 Ne iir nain mua oko Barabas naimik nain koora ekap ikua. Mua nain mua samoriya meta wiar amisaremik. 17 Naapeya yakeyak maneka ekapep taaniwkin Pailat-ke wia nokarek, “Ni mua naarew kookaliman? Naeya mua nain wasirkinen. Barabas-i e Yeesus eena Krais naimik nain-i?” 18 Naap wia nokarek, moram o amisarek, mua unowa Yeesus ookiwkin wi Yuuda woos mua-ke kema bagiwirap opora-pa wuamik. 19 Aria nan pokap ikok opora wiar miimam-ikaeya ona emeria-ke opora sesekomak. Feenap maakek, “No mua pina marewa nain sira kamenap me one. Moram yo uura inawera-pa o urufap yoowa manek akena aawem.” Naap maakek.

20 Ne aria wi pris woos mua, ne wi owow woos mua onaiya iikirap wi yakeyak maneka nain kema wia mikami wia maakemik, “Ni Barabas unuma unufiwkin o piipuinok. Ne Yeesus ifakiminok,” naap wia maakemik. 21 Ne Pailat-ke yakeyak maneka nain kiiriw wia nokarek, “Mua erup, nain ni mua naarew kookaliwkin piipuinen?” Ne faremik, “I Barabas kookalimik.” 22 Ne wia nokarek, “Mua Yeesus Krais naimik nain kamenap oninen?” Ne wi unow onaiya faremi maemik, “Nomokow moke-pa uminok!” 23 Ne wia nokarek, “Moram, o pina kain onak?” Naap maek-na weetak, piikirami kerew faremi maemik, “Nomokow moke-pa uminok akena!” 24 Aria Pailat naap urufak, wi lawisiw akena nainiw efa faremi yo iiwua purupomikuan naek. Yo kiiriw aakunowa me pepek naep eka epira aawep wi mua unowa mokok epa-pa wapena yasuwami wia maakek, “Yo wapena fan yasuwiyem, yo pina marew. Mua fain aka orowa nain niena maa-ke!” 25 Ne wi unow onaiya faremi maemik, “O aka oraiya nain pina nain eliw yiena mia-pa yiar ikainok. Ne yiena muuka wiipa pun pina nain aawuk!” 26 Naap maiwkin Pailat-ke Barabas piipueya orok. Ne Yeesus wi ami mua wapena-pa wiar wueya saru-pu-puukap aawep pikiwemik, nomokow moke-pa wuowa naep.

Wi ami mua-ke Yeesus niirow opawamik

(Mak 15.16-20, Yon 19.2-3)

27 Naap ikok wi ami mua-ke Yeesus aawep wiena pika maneka amapikiwemik. Nan ikok wi ami mua papako wia fariwkin taanep o warikamik. 28 Ona mia suuwowa wiar iirarep mia suuwowa oka wuomamik. 29 Ne ifar suusa aawep wasiep ikiwosa-pa orowawap ufua kuuma aawep wapen akena-pa opawamik. Naap onap-puap keema muuna mikap niirow opora opawami

maemik, “Oo maneka, wi Yuuda owow saria!”
27.29Iir nain wi owow saria maneka bala feenap: mia suuwowa oka wuomamik, ne ikiwos maa bala orowawimik. Ne wiena pokow maneka-pa pokap ikok kuuma eliwa opimik. Naapeya wi anim onom teeria-ke Yeesus amap-niiremi bala naap nain wuomamik.
30 Naap maemi opeka waremi ufua kuuma opawamik nain wiar aawep ona ikiwosa-pa aruf-iraparemik. 31 Aria weesereya mia suuwowa oka nain iirarep ona mia suuwowa kiiriw wuomap pikiwemik, nomokow moke-pa patot waru naep.

Yeesus nomokow moke-pa patot waremik

(Mak 15.21-32, Luk 23.26-43, Yon 19.17-27)

32 Wi Yeesus pikiwem-ikok era-pa mua oko miirowamik, mua nain unuma Saimon, ona owowa Sairini. Wi ami mua-ke o Yeesus nomokow ara nain akuawomowa suuwamik. 33 Wi ikiwemi epa unuma Golgota naimik nan fuunemik. (Unuma nain kemena feenap, “I mua woos oona.”) 34 Nan fuunep Yeesus wain eka maa masia onaiya kiripap-puamik nain onakemik. Eka nain akimak-na miatinek. 35 Ne o opap konima wiar iirarep nomokow moke-pa patot waremik. Naap onap-puap ona mia suuwowa wiar aawep satu niirep sererkap kui-kuisow wiar aawemik. 36 Naap onap nan pokap ikok urufam-ikemik.

37 Ne aria o opora-pa wuamik nain opor onoma siisimep ona woos erekina-pa wuamik. Opora feenap siisimemik, “MUA FAIN YEESUS-KE, WI YUUDA OWOW SARIA.” 38 Ne ikum mua wiam erup pun nomokow moke-pa patot wiaremik, oko Yeesus aken ekeria-pa wuamik, ne oko asow ekeria-pa. 39 Ne wi mua papako nan irap erap naem-ikemik nain-ke o mokakemi amap-niirowa sira-sira onami maakem-ikemik, 40 “Aa, no tempel koora teekap fofa arow muuta kiiriw enuma kuainen naen. Naapeya aakisa nena name asipe. No Mua Maneka muukiya-na nomokow moke-pa ikon nain ore!” 41 Ne wi pris woos mua, wi sira amis mua ne wi woos mua pun niirowa opawam-ikemik. 42 Feenap maemik, “Mua oko wia asipam-ikua, ne aakisa ona wame asipowa me pepek oo! Aa, o i Isrel saria maneka-ki? Naapeya ikoka kuisow nomokow moke-pa ikua nain oreya-ko i urufap maken akena naiyen! 43 O Mua Maneka sira kekanowa wiar opiya ne pun ona muuka-ke wame naiya, naapeya ikoka kuisow Mua Maneka-ke asipeya nomokow moke-pa orainok. I urufu!” Naap maemik. 44 Ne wi ikum mua wiam erup o wameiya-pa nomokow moke-pa patot wiaremik nain, wis pun o firekamik.

Yeesus umok

(Mak 15.33-41, Luk 23.44-49, Yon 19.28-30)

45 Aria naap ikok unun ama naeya miiw maneka kokoma-ke iiwawun muep ikaeya ikip ama arow arek. 46 Urera ama arow naap arem-ikaeya Yeesus kerew faremi maek, “Eli, Eli, lama sabaktani.” Opora nain kemena feenap, “Yena Mua Maneka, yena Mua Maneka, moram efa piipuan?” 47 Naap fareya mua papako nan iimarep ikemik nain-ke miimap maemik, “Ei, o Elaiya fariya!” 48 Ne mua oko-ke karuwiw ikip wauroma
27.48Wauroma ifer maa-ke, eka-pa wuiwkin ookekinon.
aawep eka masia-pa suuwap kuum kapa-pa mikap ninimami opaimika-pa wuomak.
49 Ne wi papako-ke maemik, “Naap iki-ikainok. Uru-urufap, Elaiya ekapep asipiya nain-ko urufikua!” 50 Lawisiw naap ikok Yeesus kerewa faremi umok. 51 Ne aria are nain akena tempel koor kemena-pa konim maneka sererep ikua nain-ke onaiw gone-pa perenep kakawa erup arek. Ne maa ofofona urupemi nomon mane-maneka-ke pukomakek. 52 Ne matmat epa nomona pun pukomakeya Mua Maneka teeria unowa iiriw umemik nain kiiriw iikiramik. 53 Iikirap naap ikemik. Ne ikoka Yeesus umep ikok iikiriya nain wi unowiya Yerusalem ikiwep ariman yiawiwkin wia urufikuan. 54 Ne aria are nain maa ofofona ne maa unowa naap imenaromakeya ami woos mua ona teeria onaiya Yeesus urufam-ikemik nain kema tootonep maemik, “Makena ya, mua fain Mua Maneka Muuka-ke!”

55 Ne wi emeria papako pun lawisik epasia-pa ikok Yeesus urufam-ikemik. Wi teeria eena iiriw Galili-pa uuwam-ikaeya ookap kakaltam-miok ekapep fan ikemik. 56 Wi emeria papako unuma feenap: Maria, ona owowa Makdala, Maria oko Yems Yosep ikos wiena onak ne Sebedi emeria.

Yosep Yeesus soopak

(Mak 15.42-47, Luk 23.50-55, Yon 19.38-42)

57 Aria maamuma mua oko unuma Yosep, ona owowa Arimatia. Ne os pun Yeesus opora wiar opam-ikua. Ne aria urera ama orom-ikaeya o Pailat wiar ikiwep maakek, “Yo Yeesus sawi napuma eliw aawep soopinen-i e kamenap?” Ne Pailat-ke eliw naakek. Naeya oromi ikiwok. 59 Ikiwep Yeesus sawi napuma nomokow moke-pa amaporop konim kia enumiw wasiep amapikiwok. 60 Pikiwep miiw ona enuma Yosep ona kuap-puomamik nan wuak. Nan wuap oromi nomon ebebiria maneka kiripap ekap miiw ona nain ofomap-puami ikiwok. 61 Naap onam-ikua nain Makdala owow emeria Maria, ne Maria oko nain, wis pun lawisiw epasia-pa iimarep urufam-ikemik.

62 Aria kokomarep epa wiimeya wi pris woos mua ne wi Farisi wiam aawep Pailat wiar ikiwep 63 maakemik, “Saria, i mua wadola nain iiriw mokok enuma ikok opora feenap maek nain wiar kema suuwimik. ‘Ikoka fofa arow weesereya yo kiiriw iikirinen,’ naap maek. 64 Naapeya no mua papako-ko wia sesekeya ikiwep matmat-pa neeke fofa arow naap wia wuap ikauk. Oko ona teeria-ke ikiwep sapuka nain ikum aawep-puap wadolalemi maikuan, ‘O iikirak.’ Iiriw wadolalek nain lawisiw naa-naap. Ne ikoka wadol opora fain-ke iiwawun epa fiifinarinon.” 65 Naeya Pailat-ke wia maakek, “Eliw, niena naap kema suuwap-na ami mua wia sesekiwkin iwap baliwep wia wuap ikauk.” 66 Naap wia maakeya ikiwep miiw ona nomona nain miiw tanaiw kiira ookap ilenap-puamik. Naap onap-puap mua wia pepekimiwkin epa nain wuap ikemik.

Copyright information for `MHL