Matthew 6

Mua wia asipowa sira

Aria ni baliwep kema suuweka, unuma niam pirami me naeka, mua unowa yia urufam-ikaiwkin mua wia asipiyen, naap me naeka. Oko niena Niawi owow iinan-pa ikua nain ni sira eliwa onam-ikeman nain me nia kiripominon. Aria no mua oorpowa maa wiu naep-na unuma name pirami mua unowa mokok epa-pa me wie. Sira nain wi wadol mua-ke onimik, lotu koora-pa ne era-pa iimarep ikok naap onimik, mua unowa nain yia urufap unuma yia fakeruk naep. Nain yos-ke makena nia maakiyem, wi sira naap onimik nain wia kiripomowa pepek nanek. Nain no mua maa-ko wiekam naep-na kokot akena wie. Feenap saarik, wapen akena maa oniya nain wapen asowa me amisarinok nae. No sira eliwa onin nain kokot nefar ikainok. Naeya nena Niawi maa kokot onin nain nefar urufap eliw kiripominon.”

Mua Maneka farowa sira

(Luk 11.2-4)

“Aria ni Mua Maneka faru naep-na wi wadol mua sira me wiar ookeka. Wi mua unowa yia urufuk naep lotu koora-pa ne era opopora-pa iimarep ikok Mua Maneka farimik. Nain yos-ke feenap nia maakiyem, wi kiripowa pepek nan aawemik. Ne aria, no Mua Maneka faru naep-na nena koor kemena ikiwep omopora upep-puap naisow muuta ikok Mua Maneka fare. Mua unowa me nefa urufuk. Naap oneya nena Niawi me urufimik nain-ke nefa urufap maa mauwa nokarin nain nefa apekarinon. Ni o faremi daawalow opora me aakuneka, wi owow oko mua onimik naap. Wi kema naap maimik, i opora maala akena mufiyen-na eliw yiar miiminon, naap maimik. Wi onimik naap me oneka. Niena Niawi maa mauwa nokaru naep oniman nain iiriw niar amisarek. Naapeya ni Mua Maneka faremi-na feenap maeka,

‘O Auwa, owow iinan-pa ikon nain. No unum maneka nefa fakeram-ikaiyen.
10 No miiw mua pika kemena-pa yia wuowa epa nain kererinok. Wi owow iinan-pa opora nefar ookimik ne i miiwa-pa ikemik fain pun opora nefar ookam-ikaiyen.
11 Nos-ke yia urufam-ikaeya i enowa pepek yiar ikainok.
12 Mua oko sira samora yia onimik nain i me wiar kema suuwimik. Naapeya i pina onimik nain yiar iirare.
13 I akimowa-pa me yia wue, ne i sira samora onu naep onamkun-na yiar puuke. Owow iinan ne miiwa fain nos-ke urufin ne kekanowa ne unum maneka nena nefarik, anane naap ikainon. Makena.’
Ni Mua Maneka faremi-na naap maeka.

14 Aria mua oko sira samora nia oniwkin nis-ke pina nain wiar iirareka. Ni naap onowen-na niena Niawi owow iinan-pa ikua nain pun pina niar iirarinon. 15 Ne sira samora nia oniwkin pina me wiar iirarowen-na niena Niawi pun pina me niar iirarinon.”

Mua Maneka kema suuwap maa enowa emi wuowa

(Luk 12.33-34)

16 Ne aria ni Mua Maneka faru naep maa enowa emi wuap-na me maatarem-miaweka. Moram wi wadol mua-ke naap onimik, wi mua unowa yia urufap sira eliwa yia nauk naep. Nain nis-ke naap me oneka. Yo maken akena nia maakiyem, wi sira naap onimik nain mua unowa ‘ni sira eliwa’, naap wia maimik nain wi kiripomowa pepek nanek. 17 Nis-na maa enowa emi wuowa naep mia niam dubileka, ne afifa fienap palanow manekiw soomareka. 18 Naeya nia urufap me nia mauk, ‘Wi faa, maa enowa emi wuap ikemik’, naap me nia mauk. Ni sira naap onowen-na Niawi me urufimik nain-ke waisow niena sira naap niar urufap ni maa kookalem-ikaiman nain eliw niinon. 19 Ni miiw maa ele-eliwa fain kerew akena me opaka. Moram miiwa fain maa unowa kuina-ke samorinon, ros opinon ne ikum mua-ke koora fookap ikum niar aawikuan. 20 Owow iinan sira nain kema suuwami sira oneka. Naap onowen-na ikoka owow iinan-pa kiripowa nain niar ikainon. Nain kuina-ke me samorinon, ros me opinon ne me niar ikumarikuan. 21 Ni miiw maa unowa niar ikainon-na oko ni kema nain manekiw ikowen. Aria owow iinan maa manek akena kema suuwap-na aa, kema nain manekiw ikowen.”

Mokoka-ke mia parina iwiya

(Luk 11.34-36, Luk 16.13)

22 Aria mokoka yiena mia parina saarik. Mokoka eliwa nefar ikainon-na nena mia tepak parina manekiw nefar ikainon. 23 Ne mokoka nefar samorarinon-na kokom miiriw ikainan. Ne sira naap nain no parina-pa ikowa nain parina nefar umeya, aa no kokomiw ikainan.

24 Mua kuisow saria erup maa wiar uuwowa nain me pepek. O-ko saria oko kookalep oko mikikira iwinon. Neemi saria oko balisow uuwowa onami saria oko mokoka kapi urufinon. Ne sira naapiw, ni maamuma kookalowa-pa uuwami Mua Maneka uuwomowa nain me pepek.”

Kema unu-unowa wuowa sira

(Luk 12.22-31)

25 Naapeya nia maakiyem, ni miiwa-pa feek ikowa nain kema me samoraremi maeka, ‘I maa mauwa enimiyen, e eka dabela kaanin aawep enimiyen, ne maa mauwa ainiyen?’ I miiwa-pa ikowa maa enowa ne mia suuwowa muutiw kema suuwiyen-i? 26 Nepa iinan-pa birinem-miawimik nain urufeka. Maa enowa-ko me isakimik ne aawep wiena koora-pa-ko sepa me wuimik, weetak. Nain niena Niawi owow iinan-pa ikua nain-ke maa enowa wia urufiya. Ne ni emeria mua, ni me wi nepa saarik maa oram-ke, maken-i? Naapeya kema unu-unowa me wueka. 27 Mua eena maa muutitik kema unu-unowa wuiya nain, lawisiw eeyarep uminon-i? Weetak. 28 Ne ni moram mia suuwowa muuta nain kemaiw ikaiman? Ni kakala sira kamenap eliwariya nain urufeka, maa uuwowa-ko me onimik ne wiena mia suuwowa-ko me onimik, nain urufowa eliwa. 29 Yo makena nia maakiyem, iiriw owow saria maneka Solomon maa bala wuam-ikua nain mua wiar urufap mokoka kuemik. Nain kakala-ke urufowa Solomon maa bala wiar nomakek. 30 Aria sipir wowosa ikoka naap ikainon, uurika saniwareya puukap mukuna-pa wafurikuan, maa oram-ke naep. Nain Mua Maneka-ke bala baliwep wiek. Ne ni bala baliwep me nia opawinon-i? Ni faa, naap maemi Mua Maneka baliwep me yia urufiya naeman-yon aa. 31 Naapeya ni kema me niam atupeka. I maa kain enimiyen, eka kain enimiyen, ne maa bala kaaneke imeniyen, ni kema naap me wueka. 32 Miiw unowa mua unowa maa kookalemi sira nain kema unu-unowa naap wuimik. Ne ni sira naap me ikeka. Ni maa mauwa iiwareman nain niena Niawi owow iinan-pa ikua nain iiriw niar amisarek. 33 Naapeya ni Mua Maneka pika kemena-pa wiar ikowa sira nain kiikir wiar ookami baliwep ikeka, ne ni naap ikaiwkin miiw maa unowa fain nia wuominon. 34 Naapeya ni karanemi feenap me maeka, ‘Yo uurika kamenap-ko arinen?’ Uurika ona epa onaiya, ona pina onaiya wiar ikua. Naapeya fofa kui-kuisow epa ononer wiar ikua.”

Copyright information for `MHL