Matthew 9

Yeesus napum mua oko saliwak

(Mak 2.1-12, Luk 5.17-26)

Aria Yeesus ame epa nain piipuap oromi aasa irap kiiriw eka puukap epamik. Aasa-pa orop ona owowa Kapeneam urupok. Urupeya mua wapena kepura iiwawun wiar uumarek nain ika-pa wuap o wiar pekapemik. Ne os-ke yo kekanowa efar kema suuwimik naep mua nain maakek, “Emar, no kema tene, no pina iiwawun nefar iirarem.” Naap maeya wi sira amis mua papako nan ikemik nain-ke wieniw opora senam aakunemi wiam maakem-ikemik, “Mua faa, Mua Maneka firekami naap maiya.” Nain Yeesus wi kema iiriw wiar amisarek. Ne wia maakek, “Ni moram maa samora kema suuwiman? Opora erup fain, ‘No pina nefar iirarem,’ e ‘No iikirap soomare.’ Opora erup fain opora kain maemkun makena urufowen? Yo Mua Muuka miiwa-pa fan ikem nain pina eliw nia iirarominen. Nain ni amisareka naep feenap oniyem.” Naap maemi napum mua nain maakek, “No iikirami nena inow maa aawep koora ikiwe!” Naap maakeya iikirap ona koora ikiwok. Ne aria wi unowa nain naap urufap keker opap maemik, “Aa, maa faa, maa miililina akena-ke.” Naemi Mua Maneka unuma fakeramik. Moram o kekanowa naap nain mua wieya maa onimik.

Yeesus Matiu fareya ona teeria wiar arek

(Mak 2.13-17, Luk 5.27-32)

Aria Yeesus epa nain piipuap ikiwem-ikok mua oko urufak. Mua nain unuma Matiu, ne o takis aawow mua-ke. O uuwow epa-pa nan pokap ikaeya urufap maakek, “Yo yooke.” Naap maakeya iikirap ookak.

10 Aria Matiu koora wiar ikiwok. Ne ona teeria pun nan pokap ikok maa enem-ikemik. Ne wi takis aawow mua, ne wi pina mua pun nan wiamiya pokap maa enem-ikemik. 11 Ne wi Farisi
9.11Wi Farisi kema feenap wuamik, no pina mua wiamiya ikok maa eniminan-na nos pun pina mua arinan.
papako naap wia urufap Yeesus teeria wia nokaremik, “Niena somek mua nain moram wi takis aawow mua ne wi pina mua wiamiya pokap maa enimiya?”
12 Naeya Yeesus-ke miimap wia maakek, “Mua napum marewa nain ikemika kaikow mua me wiar ikiwimik. Napum mua-ke makena, wis-ke ikemika kaikow mua wiar ikiwimik. 13 Ni ikiwep Mua Maneka opor ara oko maek nain kemena baliwep kema suuweka. Mua Maneka-ke maek,

‘Ni mua wia kemalep wia saliwiman nain niar kookaliyem, ne maa eneka aawep yo efa patiriman nain yo me niar kookaliyem.’
(Hosea 6.6)

Ni nain kema suuweka. Moram yo me wi mua eliwa wia aawowa nain ekapem, weetak, wi pina mua wia aawowa ekapem.”

Maa enowa emi wuowa sira nain Yeesus nokaremik

(Mak 2.18-22, Luk 5.33-39)

14 Naap ikok wi teeria Yon Baptais ookam-miemik nain-ke ekapemi Yeesus nokaremik, “I fofa pepekimep maa enowa emi wuimik, ne wi Farisi pun naap onimik. Ne moram no teeria-ke naap-ko me onimik?” 15 Naap maiwkin anian wia kaisomami maek, “Mua oko emeria aawep enuma ikaeya ona womar eliwa o wiar ekapimik nain o wameiya ikok maatarem-miawemi enowa emi wuikuan-i? Weetak. Wiimar mua nain umeya iir nain makena, maa enowa emi wuikuan.

16 Yo sira enuma feenap saarik, mia suuwowa awona pereneya konim enuma katiwa aawep iinan-pa wuap feekiya me warimik, weetak. Naap onikuan-na konim enuma katiwa wame mufep aaweya mia suuwowa perenep ikua nain iiwawun samorarinon. 17 Ne oko feenap, wain enuma meme kanima reenep kekaniya neeke me ototimik, weetak. Naap onikuan-na wain enuma awowa-ke arimep mika-suuweya meme kanima nain pukinon. Ne wain nain fuinon. Ne meme kanima nain pun samorarinon. Naapeya wain enuma meme kanima enuma-pa ototimik. Nain eliw naap ikainon.”

Yeesus lotu woos mua wiipa wiar saliwak

(Mak 5.22-3, Luk 8.41-56)

18 Aria Yeesus opora nain wia maakem-ikaeya lotu koora woos mua-ke ekapemi keema muuna mikami maakek, “Yo wiipa aakisa akena fan efar umok. Sira eliwa nos-ke ikip wapena mia iinan-pa wiar wueya iikirinok!” 19 Naap maakeya iikirami ookap ikiwok. Ne ona teeria pun wiokap ikiwemik. 20 Aria ikiwem-ikaiwkin emeria oko-ke Yeesus murarowa-pa ekami mia suuwowa wiar tiimak. Emeria nain mia akaiyarem-ikua nain mokoma ten kuisow erup. 21 O feenap kema suuwap konim miirfa wiar tiimak, “Mia suuwowa wiar tiiminen-na sariarinen.” Naap maek. 22 Tiimeya Yeesus kirep urufap maakek, “Aite, no me keker opa. No yena kekanowa efar naep naap onan, naep sariaren.” Naeya mia akaiyarem-ikua nain wiar weeserek.

23 Aria Yeesus ikiwep mua nain koora-pa wiar fuunek-na wi pia fuurow mua nan pia fuuram-ikemik. Ne wi mua papako pun nan ikok aakunowa maneka aakunemi omemi nunubarem-ikemik. 24 Naap wia urufap wia maakek, “Ni unowiya eenap oreka, emeria gelemuta fain me umok, weetak, inep ikua!” Naap maeya o amap-niiremik. 25 Aria wi unowa oraiwkin koor kemena ikiwep emeria gelemuta nain wapena-pa opap iikirowak. Ne o iiwawun iikirami iimarek. 26 Wi unow onaiya naap urufap ikiwemi meta manekiwkin owow unowa miimamik.

27 Aria Yeesus owowa nain piipuap ikiwok. Ikiwem-ikaeya mua mokok opa wiam erup o fare-ookamik, “Dewit nembesir oo,
9.27Yuuda-ke maemik, wia aawow mua Mesaiya nain Dewit kerekera-pa imenarinon. Mokok opa wiam erup nain Yeesus mua nain-ke naep “Dewit nembesir” naap faremik.
ia kemale aa!” Naap maemik.
28 Yeesus ikiwemi koor kemena ikiweya wiam erup nain pun ookamik. Ne os-ke wia maakek, “Ni kema maneka naap efa wuiman-i, yo eliw nia saliwinen, naap-i?” Ne maemik, “Ae, saria naap-na!” 29 Ne aria mokoka wiar tiimami wia maakek, “Ni kekanowa efar naeman, naeya niena kookaliman naap imenarinok!” 30 Ne wi mokoka wiar wilinek. Ne Yeesus opor kekanowa wia maakek, “Ni ikiwemi mua oko-ko me wia maakeka.” 31 Naap wia maakek-na weetak, wi ikiwemi opora nain manekamik.

32 Aria Yeesus ona teeria onaiya ikiwem-ikaiwkin mua oko pekapemik. Mua nain sawur-ke anirawiwkin me aakuniya. 33 Pekapiwkin Yeesus-ke sawur mia-pa wiar ikua nain iirareya kiiriw aakunek. Wi unowa nain naap urufap soranep kakaemi maemik, “Sii, i iiriw Isrel-pa fan maa feenap nain-ko me imenareya urufam-ikemik!” 34 Ne aria wi Farisi-ke maemik, “Sawur wia iirariya nain wi sawur woos mua-ke kekanowa iweya maa naap oniya.”

Yeesus owow unowa wiar ikiwok

35 Aria Yeesus owowa unowa wiar ikiwep lotu koora-pa Mua Maneka opora wia wafuromam-miek. Mua Maneka pika kemena wiar ekowa nain wia maakemi napum sira-sira nain wia saliwam-miek. 36 Naap uuwami emeria mua unowa nain wia urufap manek akena wia kemalek. Moram, wi eliwa me ikemik, wi sipsip saarik wia urufow mua mareweya kema samor manekiw ikaimik. 37 Naap wia urufap ona teeria opora anian wia kaisomak, “Nee, manina maa enowa-ke kerew akena ikomakek, nain iwap enowa aawow mua-ke unow marew. 38 Naapeya ni manin onoma nokariwkin uuwow mua papako wia sesekinok.”

Copyright information for `MHL