Philippians 1

Aria parosifa fain yo Pol-ke Timoti ikos ni Yeesus Krais teeria Filipai-pa ikeman nain nia siisimomimik; ne ni woos mua ne ni uuwow mua nain pun nia naimik. I eena Yeesus Krais uuwow mua nain-ke maimik. I feenap nia naimik, Mua Maneka ne yiena Maneka Yeesus Krais nia kemalemi nia asipam-ikaiwkin ni kema sonom eliwa ikowen.

Pol wi Filipai wia kema suuwap Mua Maneka farek

Yo anane ni nia kema suuwap Mua Maneka sira eliwa naakiyem. Moram i iiriw ikiwep Yeesus opor eliwa nia maakemkun wiar opaman. Ne opor eliwa nain wia maakem-miawowa nain yia kekanowami yia naapam-ikeman. Iiriw onoma wuam nain ni efa asipaman, ne nain ekapep aakisa pun naap efa asipam-ikaiman. Naapeya yo anane ni nia naep kemelowiw Mua Maneka faremi maakiyem. Yo feenap maiyem, makena, ni yia asipowa onoma wuaman nain Mua Maneka-ke kema niem-ikua. Naeya ni uuw-ikiwem-ikaiwkin Yeesus Krais nainiw ekapiya epa neeke ni uuwowa baliwep akena kapa niar silewinon.

Mua Maneka uuwowa yiek nain i uuwowa onoma wuami wia maakem-miawem-ikemik. Ne Yeesus opora nain makena-ke naemi wi opora sira oko maimik nain wiar ifemakemi iinan iram. Mua Maneka yo uuwowa nain efa ane-kekanowami nis pun nia kekanowam-ikua. Ne aakisa yo koora ekap ikemkun nis pun efa asipam-ikaiman. Naapeya yo manek akena kema nia wuiyem. Ne ni muuta nain kemeliyem, nain eliwa-ke. Naapeya pepek, ni muuta nain kemeliyem. Yo opor makena nia maakiyem. Yo kema fufurarowa-ke Yeesus Krais eena ni kema nia fufurarek naap efar imenariya. Opora fain Mua Maneka-ke makena-ke efar nainok.

Naapeya ni nia naep Mua Maneka farep feenap maakiyem, ni niam kookaliman nain naap niam kookalem-ikok manek akena niam kookalem-ikowen. Neemi Mua Maneka kema baliwep akena wiar amisarep kema pukep kema farerep ikowen. 10 Naap kema farerep ikok ni sira kain eliw akena ne sira kakeniw ookam-ikowen. Naeya Yeesus Krais ekapow epa-pa neeke ni pina marew ne opor marew ikowen. 11 Naap ikaiwkin Yeesus Krais kema nieya ni sira eliwiw ookam-ikowen. Naeya ni sira niar urufap Mua Maneka unuma wiar pirikuan. O waisow unum maneka aawinon.

I Krais ookami baliwep ikaiyen

12 Aria emar unowik, ni fain amisareka naep nia maakiyem. Makena yo efa opap koora-pa efa wuiwkin fan ikem. Nain Yeesus opor eliwa wia maakowa nain era me yiar irinarek, weetak, naap ikim-ikaiya. Moram, yo Krais muuta nain koora-pa efa wuamik, opora nain epa iiriw fiifinarek. Naeya wi irakow mua owow saria maneka eena koora urufomimik nain meta efar miimamik, ne wi mua papako pun yo meta efar amisaremik. Naap amisarep Krais opor eliwa pun miimamik. Naapeya opora nain manekaremi epa fiifinarek. 14 Wi Yeesus teeria-pa ikemik nain, iiriw o opor eliwa mua papako wia maakowa lawisiw keker opam-ikemik. Ne aakisa yo koora ekap ikem muuta nain wi keker opowa marew, kekanep anane opora nain wia maakem-miawimik.

15 Makena, wi mua papako-ke yo murarow opora efa onami wiena unum maneka purupemi Krais opor eliwa wia maakimik. Ne wi papako uuwowa nain kookalep uuwimik. 16 Wi nain efar amisaremik, Mua Maneka-ke yo efa pepekimeya Yeesus opor eliwa wia maakem-miem. Ne aakisa sirirowa aawem. Naeya wi efa kemalep uuwowa nain onimik. 17 Ne wi murarow opora efa onimik nain-na wi kema maken marewa. Wi maimik, “I Krais opora wiar maemkun mua unowa yookiwkin Pol kema neek samorarinok,” naap maemi uuwimik. 18 Wi naap onimik nain me wiar kema suuwiyem, nain oram-ke wiar naiyem. Ne yo woosa wuiyem nain, wi ikiwosa onaiyik ikok Krais uuwowa uuwimik-i e kema eliwa-pa uuwimik-i, yo nain eliw muutiw wiar naiyem. Wi naap onimik nain oram kemeliyem.

Ne fain pun naep kemeliyem.
19 Yo amisarem, ni yo muuta nain Mua Maneka faremi nokarem-ikaiman. Naeya Yeesus Krais-ke Ewar Eliwa sesekeya yo efa asipeya koora-pa ikem fain efa welawuk. 20 Yo kema manek akena feenap wuiyem, yo emin ururowa marew kekanep uuwam-ikominen. Naeya Krais yo mia-pa unum maneka aawem-ikua naap aawem-ikainok naiyem. Yo mokok enuma ikok uuwowa-pa unum maneka aawinok, ne uminen-na nain pun unum maneka naap aawinok. 21 Moram yo feenap maiyem, yo mokok enuma ikok Krais waisow kemaiw ikainen. Ne yo efa ifakimiwkin uminen pun eliw, yo pokow eliwa aawinen naiyem. 22 Ne yo me umowa, naap ikainen pun eliw. Naeya uuwowa nain eliw anetirami uuw-ikim-ikainen. Aria yo kamenap mainen, mokok enum ikowa eliw-i e umowa eliwa? Kamenap ikowa nain eliwa-ke nainen? 23 Yo kema yame irakiyem. Kema maneka wuiyem nain feenap, yo umep Krais wameiya anane ikowa nain eliw akena naiyem. 24 Nain yo ni muuta nain feek ikowa-ke eliw, naeya ni nia asipam-ikainen. 25 Aa, naap-yon, yo me uminen. Ni niamiya ikok nia asipam-ikowa-ke eliwa naiyem. Nia asipamkun ni Yeesus opora kekanowa wiar opap ookam-ikowen, ne naap irami kemelam-ikowen. 26 Ne yo nainiw ikiwep niar fuuninen-na ni yo muuta nain manek akena kemelami Yeesus Krais unuma fakerowen.

Wi Yeesus muuta nain sirirowa eliw aawikuan

27 Aria maa manek akena feenap, ni Krais opor makena baliwep wiar ookiman nain naap akena ikeka. Naeya yo ikiwep niamiya ikainen-i e feek ikok ni sira eliwa oniman nain meta muutiw niar miiminen. Miimap mainen, ni kekanep uroma kema kuisow ikok Krais opor eliwa wia maakowa nain kerew uuwam-ikaiman nainen. 28 Neemi ni kekanep niena iiwua sira kamenap nia onimik nain me wia keker opiman. Wi nia iiwuarimik nain era ariman wiar ikua, wi ikoka iiwawun mesenalikuan, ne ni wia. Mua Maneka ona nia asipeya ni eliw ikowen. 29 Moram ni Krais opora wiar opaman, ne pun o muuta nain sirirowa eliw aawiman. 30 Yo iiriw ona opor eliwa wia maakowa muuta nain efa iiwuarem-ikemik, nain efa urufaman, ne aakisa pun naap efa miimaman. Nain yo kekanep ikem. Ne wi aakisa nia iiwuariwkin nis pun eliw naap kekanep ikowen.

Copyright information for `MHL