Philippians 2

Kema kuisow ikowa opora-ke

Aria ni feenap ikeman-i? Ni kema epaskun ikok kekanep ikowa, Krais ona nia asipam-ikaeya kema iikirowa, ne ona nia kookaleya kema eliwa ikowa, ne Ewar Eliwa wameiya ikok kema kuisow arowa, ne pun ni niam kookalemi niam saalolokam-ikowa. Ni naap niam naep-na ni kema kuisow ikeka. Ne niam kookalem-ikeka, ne kema epaskun wuap uuwowa faem-ikeka. Ne yo sira naap niar miimap-na kemelap kema onaiya goronep orainen. Ne ni i kuisow niam naemi niam irami me niam pireka. Ni niam porop niam maeka, yo mua amis marew, mua oko-ke ikiwosa efar nomakek, naap maeka. Neemi maa unowa niena muutiw me niam kema suuweka, wi mua papako pun mokakiya wiokeka.

Yeesus Krais wame poreya Mua Maneka-ke unum maneka iwok

Krais wame porok nain wiar kema suuwap nis pun sira naap oneka. O sira feenap, o Mua Maneka-ke, nain “Yo Mua Maneka epaskun ikem,” naap wame maemi me kekanek, weetak. Naemi ona kekanowa ne unum maneka wame sailowap, miiwa-pa ikok ona mia i miiw mua epaskun arep ikua. Ne taar teekow mua wame puukowak. Naap ikok mua meta marewa wame puukowap Mua Maneka osiw ookami nomokow moke-pa umowa eliw naek. Naap maep umok nain Mua Maneka-ke iinan akena amapurupemi unum maneka iwok, unuma nain unum unowa nomakep melin akena nain aawok. 10 Ne i unum muuta nain unufami emeria mua unowa owow iinan-pa ikemik nain ne miiwa-pa fan ikemik fain pun keema muuna mikami ariman maikuan, “Yeesus Krais yiena Maneka-ke.” Naap maemi Auwa Mua Maneka unuma fakerikuan. Ne wi umow owowa-pa ikemik nain pun sira naap onikuan.

Yeesus teeria sira eliwa-pa ikok mokoma saarik wilinem-ikaikuan

12 Naapeya emar unowik, yo feenap nia maakiyem, yo iiriw niamiya ikem nain ni opora efar miimam-ikeman. Ne aakisa nia piipuap ekapep fan ikem nain feenap mainen, yo opora baliwep akena yookam-ikeka. Mua Maneka anane ni niamiya ikok ona sira kookaliya naap kema nieya o uuwowa kema sonom eliwiw onomiman. Naapeya Mua Maneka nia aawok nain wiar kema suuwap kema tootonep karanemi sira eliwa-pa ikeka.

14 Ni uuwow unowa nain onami me niam muninowami kaka me niam tuuneka. 15 Naeya ni Krais opor eliwa eena pokow eliwa imeniya nain kekanowa opap ikok wueliwa pina marew ikowen. Miiwa fain wadol mua ne pina mua unowa ikaimik. Ne ni Mua Maneka muuk eliwiya niena sira eliwa nain-ke ariman ikok mokoma saarik wilinem-ikowen. Naap ikowen-na yo uuwow maneka onam nain kua me efar ekak, naap mainen. Ne Krais ekapow fofa neeke yame irinen. 17 Ni Yeesus Krais opora opam-ikaiman nain ni Mua Maneka wiar niam patiriman. Ne yo efa ifakimiwkin umowa pun eliwa naiyem. Ni Mua Maneka patiriman neeke yo aka fuiyem nain wain eka sawikowa saarik ikainen. Muut nain yo ni niamiya manek akena kemelinen. 18 Ne nis pun yena efamiya naap kemeleka.

Pol Timoti wi Filipai wiar sesekowa maek

19 Aria yiena Maneka Yeesus era yia wuomaya-na yo Timoti sesekinen naiyem. O ni niar ikiwep ni kamenap ikeman nain nia urufap nainiw kirep ekapemi efa maakinok. Naeya yo miimap kema teninen. 20 Mua unowa efamiya ikemik, nain os-ke waisow ni nia asipowa naep kema manekiw ikaiya. 21 Wi mua unowa Yeesus Krais uuwowa me wiar kema suuwimik, wi wiena uuwowa muutiw kema urupimik. 22 Ne o Mua Maneka uuwowa baliwep uuwomiya nain ni sira iiriw wiar amisareman. I yiam erup Mua Maneka opora nia maakemi opora nain kekanowimik. I ikos kema epaskun wuap uuwowa faimik. Muuka-ko eena wiawi uuwowa naapiya, o anane naap efa naapam-ikua. Ni nain amisareman. 23 Naapeya kema feenap wuiyem, yo yena kiikir yame ifanpap-puami o sesekamkun niar ikiwinon. 24 Ne yo feenap amisarem, yiena Maneka ona efa asipeya yo koora ekap ikem fain epa maala me ikainen. Efa weeserowiwkin-na yena ni niar ikiwinen.

Pol Epafroditus wi Filipai wiar sesekowa maek

25 Ne yo kema-ke feenap, yo Epafroditus sesekamkun kirep ni niar ikiwowa-ke ikua. Nis-ke yo efa asipam-ikainok naep fan sesekiwkin ekapep manek akena efa asipam-ikaiya. O yena emar eliwa-ke, ne fan ikok epaskun baliwep uuwam-ikaimik. 26 O napumarep ikua nain ni meta wiar miimaman. Naapeya o aakisa ni naep kema moke maneka ikua. Ne kirep ni nia urufowa nain kemaiw wame tuupam-ikaiya. 27 Makena, o iiriw napumarep lawisiw akena umekak, nain Mua Maneka-ke kemalep saliwak. Ne me o muutiw kemalep saliwak, weetak, yos pun efa kemalek. O umekak-na yo kema fufurarekam. 28 Ne naapeya yo kema maneka feenap, ni niar sesekamkun nainiw ikiwinok naiyem. Naeya ni o urufap kemelowen, ne yo kema moke ikem nain pun efar teninok. 29 Ni efa asipowa nain epasia-pa ikaiwkin os-ke fan ikok efa asipam-miok wame ekerap napumarep umekak. Naapeya wi mua naap nain ekima wia opap baliwep wia saalolokeka. Naeya o ikip fuuneya yiena Maneka Yeesus Krais kema suuwap kemelami aaweka.

Copyright information for `MHL