Philippians 3

Wi Yeesus opora wiar opap baliwep ookowa-ke

Aria emar unowik, yo opora silewami feenap nia maakinen, ni Yeesus Krais wameiya ikeman nain naap kemelam-ikeka. Yo iiriw suule niem nain-ke eliw nia asipeya opor makena opap ikowen. Ne yo opora kuisow nainiw nia maakowa nain me karosiariyem. Ne wi Moses sira ookami mia kanima puukowa anane maemi kekanimik nain wia uru-urufami ikeka. Wi mua samora nain siow asia-ke wia naiyem. Moram makena, wi mua eena mia kanima puukimik nain wi Mua Maneka opora baliwep me ookimik. Ne is-na, me mia kanima puukowa-pa eliwa ikemik naimik, weetak. Ewar Eliwa-ke kema yieya Mua Maneka unuma fakerami Yeesus Krais muuta nain kemelimik. Naeya i kakeniw Mua Maneka teeria wiar ikok sira ookam-ikaimik. Wi mia-pa sira-sira onami wiam pirami wiam maimik, i Mua Maneka teeria akena-ke, naap wiam maimik. Ne yo iiriw mia-pa sira-sira onam-ikem nain wia nomakep ikem. Naapeya yos pun eliw naap yame pirekam. Yo feenap, yos pun Isrel-ke ne yiena kerekera maneka Bensamin, ne yiena teeria Iibru opora kakeniw aakunimik, yo aka nain-ke. Naapeya yo iiriw aite efa muukarek nain sande kuisow ikiweya Moses sira wuomakek nain ookami mia kanima puukomemik. Ne yo arimep Moses sira wuomakek nain kekanowa opam-ikem. Naeya wi Farisi teeria wiamiya ikok Farisi mua arem. Yo sira nain baliwep akena ookam-ikem. Moses sira wuomakek nain ookami kapa teekam. Naapeya wi Yeesus Krais ookimik nain wia samoram-ikem.

Aria yo yena iiriw naap yame maemi yame piram-ikem. Ne aakisa Krais ookowa muuta nain yo sira unowa iiriw eena kekanowa opap ookam-ikem nain iiwawun maa oram-ke maiyem. Ne maa oko fain pun, makena, yo aakisa yena Maneka Yeesus Krais baliwep amisarem nain maa manek akena-ke naiyem. Naep yo iiriw sira unowa eena opap ikem nain maa sakua-ke naep iiwawun sisina-pa wuam. Yo Yeesus Krais wameiya ikainen naep maa papako kema me wuiyem. Ne yo aakisa Krais epaskun akena ikainen naiyem. Yo iiriw Mua Maneka-ke mua kaken eliwa-ke efa mainok naep Moses sira wuomakek nain baliwep ookam-ikem. Nain aakisa wia, yo Krais opora wiar opamkun Mua Maneka mua kaken eliwa efa mainok naiyem. Yo fain muutiw kema suuwiyem. 10 Yo maa oko-ko me kema wuiyem. Krais waisow baliwep amisarep kekanowa aawinen, o umep iikirak kekanowa nain. Ne o sirirowa maneka aawemi umok nain mia me wame kema suuwak. Naeya yos pun sirirowa naap aawemi mia me yame kema suuwap eliw uminen. 11 Naep yo fain kemaiw yame tuupam-ikaiyem, yo umep wiimar kiiriw iikirinen.

Pol Yeesus Krais sira baliwep ookam-ikua

12 Aria yo maem nain me iiwawun urufowa ikem. Naeya yo mua kaken akena arem, naap me yame maiyem, weetak. Yeesus Krais-ke ona efa aawep mua eliwa imenarinok naep efa wuak. Naapeya sira baliwep wiar ookam-ikaiyem. Naap ookam-ikok ikip iiwawun mua kaken eliwa arinen. 13 Emar unowik, yo iiwawun pepek, naap me yame maiyem, weetak. Naep yo feenap oniyem, iiriw maa mauwa onam-ikem nain iiwawun mikikira-pa wuap yo ikoka kamenap ikowa nain yame waakaram-ikok urufinen. 14 Mua Maneka-ke yo efa farep Yeesus Krais teeria-pa efa wueya yo iinan owowa kemaiw ikaiyem. Naapeya yo wi mua karuowa wiam akimimik naap kema efefarep karuemi ikip epa neekeriw fuuninen.

15 I papako Yeesus Krais sira wiar ookowa kema fareremik. Naeya yo opora maem nain i unowiya kema epaskun maneka ikaikua. Ne ni mua papako kema ononaiya wuam-ikaiman nain Mua Maneka-ke kema nia fookomaya parinarowen. 16 Ne aakisa i Yeesus Krais sira wiar ookam-ikok baliwep ikemik, ne nainiw ookam-ikaikua.

17 Naapeya emar unowik, i Yeesus Krais sira ookimik nain, wi mua papako yia urufap sira yiokimik. Ne nis pun sira wiar urufap wiokami efa urufap yo yookeka. 18 Yo opora fain iiriw nia maakem-ikem, ne aakisa opora kuisow fainiw nia maakemi omow eka onaiya maiyem. Feenap, mua unowa Krais iiwuaremi nomokow moke-pa umok nain firekimik. 19 Wi Mua Maneka sira mikikira-pa wiar wuami wiena mia kookalowa welawowa nain kema manek akena efefarimik. Wi emin ururowa sira onimik, nain wiam irimik. Wi mua sira naap nain wiena sira wia kiripomaya wi umep iiwawun mesenalikuan. 20 Ne i sira onaiya ikemik, i owowa iinan-pa yiar ikua. Naapeya i kema kekanep ikok yiena Maneka Yeesus Krais owow iinan-pa orop yia aawowa nain kema nain manekiw ikaimik. 21 Os-ke ona kekanowa-pa miiw maa ne iinan maa iiwawun onamiarep urufam-ikainon. I mia kekanowa marew, ne wiimar ona kekanowa-pa mia yiar kiripeya ona mia kekanowa nain saarik imenariyen.

Copyright information for `MHL