Philippians 4

Kema kuisow wuap uuwam-ikowa

Aria emar unowik, yo nia kookal-afuriyem. Ni niamiya ikowa nain kema maneka wiisariyem. Ne ni sira eliwa-pa pokiman nain niar miimap manek akena kemeliyem. Ne ni maa bala ikiwosa-pa efa orowawaman nia naiyem. Naapeya yo opora nia maakiyem fain efar kema suuwami yiena Maneka kekanowa-pa kekanep naap ikeka.

Aria Yuodia ne Sintike, emawa, ni niam erup niam irewap ikeman nain piipueka nia naiyem. Aakisa yiena Maneka kema suuwap kema epaskun areka. Ne no yena uuwow epaskun akena, no eena iiriw ikos uuwam-miemik nain nefa maakiyem, wi emeria wiam erup wiam irewap ikemik nain wia asipeya weeser-wuauk. Wi wiam erup nain iiriw i yiamiya ikok i unowiya, Klemens ne yena uuwow epaskun papako, i unowiya Yeesus Krais opora uuwowa nain uuwam-miemik. Wi uuwow teeria nain wiena unuma iiriw owow iinan parosifa-pa wiar siisimiwkin ikomakek. Naeya neeke anane anane ikaikuan.

Ne ni anane maneka yiena Maneka naep kema sonom eliwiw ikok kemelam-ikeka. Yo nainiw mainen, ni kemelowiw ikeka. Yiena Maneka ekapowa nain epa mamaiya arek. Naapeya wi emeria mua baliwep wia saalolokami saria wiiwkin sira niar urufuk. Ne ni maa unowa kema unu-unowa me wueka. Ni kema kamenap niar ikua nain, Mua Maneka faremi nokarep sira eliwa naakem-ikeka. Naap oniwkin Mua Maneka kema sonom eliwa nieya ni naap ikowen. Kema sonomiw ikowa nain wiar kema suuwimik-na onaiya akena-ke. Ne ni kema naap ikok Yeesus Krais kema suuwam-ikok kema sonom eliwa naap ikowen.

Aria emar unowik, yo opora silewami feenap maiyem. Ni sira eliw akena muutiw kema wuam-ikeka. Feenap, saria wiowa sira, sira makena, kema suuwowa tumin marew, sira eliwa ne sira miililina niar urufap kakaimik nain. Ni naap akena ikeka. Yo opor unowa suule niem. Ne yo sira kamenap ikemkun efa urufaman nain pun kemaiw ikok naap yookam-ikeka. Naeya Mua Maneka ni niamiya ikainon, eena kema sonom eliwa niiya nain.

Wi Filipai Pol maa asipiwkin kemelap sira eliwa wia naakek

10 Ni iiriw efa karuem-ikeman nain piipuaman, ne aakisa kiiriw yo maa sesekomeman. Naapeya yo manek akena kemelami yiena Maneka unuma piriyem. Makena, ni yo efa asipowa kema suuwam-ikeman, nain era-ko me imenam-ikeman. 11 Ne yo maa mauwa iiwariyem nain yieka naep-ko me maiyem, weetak. Yo maa iiwariyem nain me maiyem, eliwa ikaiyem naiyem. 12 Yo iir oko maa iiwariyem ne iir oko saapa ikaiya. Maa kamenap efar imenariya nain oram eliw manekiw naiyem. Iir oko wuailiyem nain yam ikok iniyem, ne iir oko maa pepek enimiyem. Iir oko maa efar kiriya, ne iir oko maa iiwariyem. Nain me senam kema wuiyem. Yo yena naap ikowa nain iiriw yame paayap ikem. 13 Kekanowa nain Krais-ke yiek nan yo kamenap ikem nain pun eliw naiyem.

14 Yo naap maem, nain yo aakisa epa samora-pa ikemkun, sira eliwa, nis-ke wapena yieman. 15 Ni Filipai, ni amisareman, iiriw yo mokomokoka Yeesus opora nia maakemkun opaman. Iir nain yo Masedonia piipuap ikiwemi uuwam-miem nain ni niisow wapena yiem-ikeman. Wi Yeesus teeria papako naap-ko me onamik, ni niisow naap onaman. 16 Ne iir oko yo Tesalonaika-pa ikok maa iiwaremkun iir nain pun efa asipam-ikeman. 17 Yo me maa niar aawowa naep naap maem, weetak. Ni sira eliwa oniman nain wiimar nia kiripomowa maneka niar ikainok naep maem. 18 Aria ni maa sesekomeman nain Epafroditus-ke ekapemi nain pekapomek. Naapeya yo aakisa maa pepek, ne maa kirowa efar ikua maiyem. Ni sira eliwa efa onaman nain ariman niar naiyem. Ni sira eliwa nain Mua Maneka maa eliwa ikin eliwa onaiya iwiman naap saarik. Ne Mua Maneka patirow maa sira naap nain manek akena kookaliya. 19 Yena Mua Maneka ni nia saliwowa pepek akena. Yeesus Krais muuta nain nia asipami ni maa kamenap iiwariman nain eliw nia asipam-ikainon. 20 Yiena Mua Maneka, eena yiena Auwa nain unuma anane maneka fakeriyen. Makena, o unuma anane maneka fakeram-ikaiyen, me weeserinon.

Pol wi kema eliwa ikeka wia naek

21 Ni Yeesus Krais teeria-pa ikeman nain eliwa ikeka nia naiyem. Ne yena uuwow epaskun fan efamiya ikemik nain pun eliwa ikeka nia naimik. 22 Krais teeria unowa Rom owowa-pa fan ikemik nain pun ni eliwa ikeka nia naimik. Ne pun wi Yeesus teeria eena owow saria maneka Siisar koora-pa wiar uuwimik nain makena, manek akena nia kema suuwap eliwa ikeka nia naimik. 23 Yo feenap maiyem, yiena Maneka Yeesus Krais nia kemalemi nia asipam-ikainok. Makena.

Copyright information for `MHL