Revelation of John 1

Parosifa fain opora kamenap imenarek

Aria opora eena parosifa fan ikua nain Mua Maneka-ke Yeesus Krais iwok, os-ke maa unowa epa me ekowa imenarinon nain ona uuwow mua wiarik ariman wuinok naep. Ona ensel sesekeya Yon wiar imenarep maa muutitik ofakoweya urufak. Ne Yon-ke maa unowa urufak nain makena-ke wiar naek. Mua Maneka opor makena nain eena Yeesus Krais-ke maeya Yon-ke ariman wiar wuak. Maa muutitik fain imenarow epa fan tiil arikua. Naapeya wi parosifa fain urufimik nain eliw kemeluk, ne wi mua maa ikoka imenarowa nain opora fan ikomakek nain miimap ookimik, wi nain pun eliw kemeluk!

Sios ikur okaiwi-pa erup wia kakenowa opora wia maakek

Aria yo Yon-ke ni sios teeria ikur okaiwi-pa erup Esia kame-pa ikeman nain opora nia maakiyem. Mua Maneka anane ikaiya, iiriw ikua, ne ikoka ekapinon nain-ke nia kemalep nia asipami kema sonom eliwa niinok. Ne wi ewar ikur okaiwi-pa erup ona miir onoma-pa wiar ikaimik nain wis pun naap nia nauk. Ne Yeesus Krais pun naap nia nainok. O eena maa muutitik urufiya nain opor makena maiya, ne o umep ikok iikirak nain o kiikir miimep iikirak, ne wiimar ona teeria pun iikirikuan. O Saria maneka ikaeya owow saria unowa iiwawun o tepak-pa wiar ikemik. I yia kemalep ona aka wiar oreya i pina yiar iirareya eliwa ikemik. Ne pun o kemena wiar ekimik nain teeria maneka kuisow yia wuami uuwowa yieya ona Wiawi Mua Maneka lotu onami o patiram-ikaimik. Naapeya feenap maiyen, “Oo Yeesus Krais, no unum maneka, kekanowa anane naap nefar ikainok. Makena.”

Urufeka, o maa ipisia onaiya orom-ikaiya. Wi unowa nain ikoka urufikuan, o iiriw patot waremik mua nain pun o urufikuan. Miiw unowa ikoka o urufap kema samorarep omomikuan. Nain pepek naap imenarinon. Makena akena. Mua Maneka ona wame maek, “Aria maa unowa onoma yos-keriw ne murarowa weeserow

epa pun yos-keriw.
1.8Grik opora-pa maek nain feenap, “Yo Alfa ne Omega-ke.” “Alfa”-na Grik opora siisia onoma-pa wuiya nain-ke, ne “Omega” murarowa akena nain-ke.
Kekanowa akena naap ikaiyem, iiriw naap ikem, aakisa pun naap ikaiyem, ne naap ikok ikoka ekapinen.”

Mua Muuka-ke imenarek

Yo Yon-ke ni i unow onaiya Yeesus teeria-pa ikemik. I unowiya Yeesus pika kemena-pa wiar ikemkun yia samoriwkin sirirowa aawem-ikaimik, nain kekanep ikok o arewap ikemik. Naapeya unowiya epaskun ikemik. Yo Mua Maneka opora ne Yeesus sira makena onam-ikua nain wiar maem-miem, muut nain efa opap Patmos mot-pa efa wuamik. 10 Ne nan ikok iir oko Sande-pa Mua Maneka Ewar Eliwa-ke mia-pa efar ikaeya feenap furewam, maa-ko puuw fuurowa saarik mikikira-pa efa farem-ikaeya miimam. 11 Feenap efa maakek, “Maa unowa ikoka imenarinon nain urufap siisimep wi sios ikur okaiwi-pa erup fain wia sesekoma, wi Efesus, Smerna, Pergamum, Taiyataira, Sardis, Filadelfia ne wi Laodisia.”

12 Yo naareke efa maakiya naep kirem-na arua ikur okaiwi-pa erup mikikira-pa efar wilinem-ikua. Arua nain gol manekiw. 13 Ne arua nain gone-pa mua-ko, Mua Muuka saarik iimarep ikaeya urufam. Mua nain mia suuwowa kia maala suuwak, iiwawun orop meren esimsa wakesimok, ne inakirowa iiman epira-pa kaikak. Inakirowa nain pun gol manekiw. 14 Ona afifa-na kia akena, gawien kurura e maa ipisia kia saarik, ne ona mokoka mukuna saarik wilinem-ikua. 15 Ona kepura nomon oka awilawila saarik wilinem-ikua ne ona aakunowa-ke eka maneka duunowa saarik. 16 Ona wapena-pa mokoma ikur okaiwi-pa erup opap ikua, ne bainat maala opaimika-pa wiar fuunep ikua. Bainat nain oko-okaiwi anim onaiya ikua. Ona miira-ke ama amirika kekanow akena wiliniya naap wilinem-ikua.

17 Yo mua nain urufap miir onoma-pa wiar wakiemi iiwawun puem, mua umep ikowa saarik puep ikem. Puep ikemkun wapen akena-pa efa opami maek, “Me keker opa! Maa unowa onoma yos, ne ikoka maa unowa weeserowa pun yos. 18 Yo mokok enuma ikem nain-ke. Yo efa urufe, yo umem nain iikiram, ikoka anane maneka naap ikainen. Umowa ne umow owowa yos-ke urufam-ikaiyem.

19 No maa urufan fain siisime, ne maa unowa aakisa imenarem-ikaiya nain, ne wiimar imenarowa nain pun iiwawun siisime. 20 Mokoma ikur okaiwi-pa erup urufan nain feenap, wi ensel sios ikur okaiwi-pa erup nain wia urufam-ikaimik nain-ke. Ne arua ikur okaiwi-pa erup urufan nain feenap, wi sios ikur okaiwi-pa erup nain-ke.”

Copyright information for `MHL