Revelation of John 11

Opor wafurowa mua wiam erup

Aria nain weesereya yo maa pepekimowa kuuma yiemi efa maakemik, “Iikirap ikip Mua Maneka tempel koora pepekimemi patirow esimsa pun pepekime. Nain pepekimep-puap wi teeria tempel koor kemena-pa lotu onimik nain wia tuune. Ne tempel koora owaruma epa oko sisin kame-pa ikua nain me pepekime, neek ikainok. Moram epa nain wi owow oko-oko teeria wia wuomamik. Wis-ke ikoka siiwa ten erepam nainiw erup naap Owow Eliwa Yerusalem akup-ititami iiwawun samo-samorikuan. Ikoka yena teeria mua wiam erup wia sesekamkun yena opor kokosa efar maemi maa samora ikoka imenarowa nain manekikuan. Wi mia suuwowa iriniya nain suuwap mokoma arow enakiwa naap uuwam-ikaikuan.” Wiam erup nain Mua Maneka miiw unowa urufiya nain miir onoma-pa wiar iimarep ikaimik nain-ke. Ne feenap wia maiyem, oliw nomokowa erup ne arua poka erup nain. Wi mua oko-ke wia samoru naep onikuan-na wiena opaimika-pa mukuna nomiwkin imenaremi wia kuumeya umikuan. Wi kekanowa feenap wiar ikua, ipia me orainok naiwkin makena ipia me orainon. Naeya Mua Maneka opor kokosa maem-miawiwkin ipia me orainon. Ne sira fain pun eliw onikuan, maiwkin eka kirep aka arinon, ne wiena kookalowa-pa napuma ne sirirowa sira-sira eliw wiem-ikaikuan.

Aria wi Mua Maneka opora wia wafuromap welawiwkin maa eneka asia maneka-ke epa fuura ona-pa ikok urupep wiamiya irakinon. Wiamiya irakep wia nomakep wia ifakimeya wiena napuma nain owow maneka nain era-pa neeke ikaikuan, owowa nain wiena Maneka iiriw nomokow moke-pa sererimemik nan. Owow maneka samora nain unuma ariman me mau naep Sodom naimik, Isip naimik. Miiw unowa mua ne opora ononer aakunimik, mia sira-sira unowiya nan taanep wiam erup umemik nain napuma wiar urufami me wia soopeka naikuan. Naeya fofa arow enakiwa naap ikaikuan. 10 Owow unowa wiam erup umemik nain meta miimap wia goowami kemelap maa ele-eliwa wiam iwikuan. Moram wiam erup nain-ke iiriw wi miiw mua sirirowa maneka wiem-ikemik.

11 Naap ikok fofa arow enakiwa aaweya Mua Maneka ewar kekanowa-ke oromi wia iikirowinon. Wi iikiriwkin mua unowa nain naap wia urufap manek akena keker opikuan. 12 Wiam erup nan iimarep ikaiwkin opora oko iinan-pa feenap wia farinon, “Feek urupeka!” Wiena iiwua naap wia urufam-ikaiwkin maa ipisia-ke wia mueya iinan urupikuan. 13 Wi iinan urupem-ikaiwkin maa ofofona maneka-ke imenaremi owow maneka nain kame kuisow iiwawun samorinon. Mua unow akena tausen ikur okaiwi-pa erup (7,000) naap umikuan. Ne wi me umimik nain naap urufap manek akena keker opap Iinan Mua Maneka kekanowa onaiya ikua nain faremi maikuan, “Oo Mua Maneka, i unuma nefa pirimik,” naap maikuan. 14 Aria sirirowa nain nan weeserek, oko lawisik akena imenarinon.

Puuw murarow akena nain fuurinon

15 Aria ensel murarow akena nain-ke puuw fuurak. Fuureya opora-ke iinan-pa feenap imenaremi maemik, “Aakisa miiw unowa ne owow iinan yiena Maneka-ke urufiya ne Krais eena ona iiriw pepekimep-puak nain pun maa unowa nain urufiya. Os-ke anane Saria maneka naap ikainon!” 16 Ne aria wi iperowa ten erup erepam Mua Maneka wameiya-pa wiar pokap ikemik nain orop momokraremi iima ifemakep Mua Maneka lotu onami 17 maemik, “Mua Maneka Kekanowa Akena, no iiriw naap ikon, aakisa pun naap ikain! No nena kekanowa ariman wuami maa unowa nena urufam-ikain. Naapeya i sira eliwa nefa naimik! 18 Wi miiw unowa owow unowa maneka akena kema bagiwiramik. Nain aakisa epa fan imenareya wi bagiaw nefar urufimik. Ne wi iiriw umemik nain nos-ke wia mekawinan. Aakisa nena uuwow mua wi profet sira eliwa wia kiripomami unow onaiya pokow eliwa wiinan. Ne nena teeria unuma nefa purupimik nain, wi mua unumiya ne mua oram pun, wi iiwawun epaskun pokow eliwa wiinan. Aria wi miiwa samoram-ikemik nain kiripomami wia samorinan!” Naap maemik.

19 Aakisa owow iinan tempel koora omopora paaskap-puiwkin ikaeya bokis oko ariman arek, eena iiriw Mua Maneka ona opora wi Yuuda wia maakep koonowak nain nan wuamik nain. Ne aapereka wilinemi paranomakek, maa ofofona ne ipia maneka oromi ipia mokok mane-maneka orok.

Copyright information for `MHL