Revelation of John 13

Nain weesereya ifa nain orop ifer pona-pa iimarep ikua.

Maa eneka asia erup imenaremik

Aria naap ikok maa eneka asia maneka ifer tepak-pa urupem-ikaeya urufam. Maa nain ikiwosa ikur okaiwi-pa erup ne ikiwos suusa ten kuisow wiar ikua. Ona ikiwos suusa unowa nain kuisow kuisow maa bala onaiya ikua. Ne ikiwos unowa Mua Maneka unuma firekami ona unuma saarik wame siisimep-pueya ikua.
Maa eneka urufam nain urufowa eena kasi saarik nain manek akena. Ona kepura maa eneka maneka oko bea naimik nain kepura saarik, ne opaimika laiyon opaimika naap. Ifa maneka nain-ke ona kekanowa ne unum maneka maa eneka asia nain iwemi maa muutitik iiwawun urufam-ike naakek. Maa eneka nain ikiwos oko iiriw wiar fookiwkin ikemika maneka aawep lawisiw akena umekak nain kiiriw sariarek. Miiw mua unowa naap urufap kakaemi ookamik. Ifa maneka maa eneka asia nain maa muutitik urufowa kekanow maneka iwok. Naapeya mua unowa ifa nain yiena maneka-ke naep unuma fakerami maa eneka nain pun lotu onami maem-ikemik, “Se-ek, mua o saarik-ko me ikemik, weetak. Ne mua kuisow o wameiya irakowa pun me pepek.” Naap maemik.

Mua Maneka-ke neek onam-ikainok naeya maa eneka asia nain unuma wame purupemi Mua Maneka unuma wiar firekam-ikainon. Ne pun mokoma arow enakiwa naap kekanowa onaiya ikok miiw mua kema wia mufem-ikainon. Ne aria ona unuma wame purupemi Mua Maneka firekam-ikua. Firekami owow iinan ne wi teeria owow iinan-pa ikemik nain pun iiwawun unuma wia samoram-ikua. Ne kekanowa onaiya ikok Yeesus Krais teeria wiamiya irakemi eliw wia nomakinon. Ne pun kekanowa maneka aawep wi miiw unowa wia urufam-ikainon, miiw unowa, wi kerekera unowa, wiena opora ononer aakunimik ne wi mia sira-sira, wi nain. Naeya miiw mua unowiya o yiena maneka-ke naep lotu onam-ikaikuan. Aria teeria fain-ke unuma me wiar fakerikuan, eena Mua Maneka miiw maa muutitik me onowa ikok unuma Sipsip Muuka maifa-pa wiar siisimeya ikua nain. Sipsip Muuka eena ifakimiwkin umok nain.

Aria ni ifan onaiya ikok-na opora fain miimeka! 10 Wi teeria wia opap wia kaikuk maek nain makena, ikoka naap wia onikuan. Ne wi teeria bainat-pa wia mikuk maek nain ikoka wia mi-mikikuan. Naapeya maa sira naap nain imenareya wi Yeesus teeria kekanep kekelka ikok o opora wiar opam-ikauk.

Maa eneka asia oko miiwa-pa imenarek

11 Naap ikok kiiriw maa eneka asia maneka oko miiw tepak-pa urupeya urufam. Ona ikiwos suusa erup, sipsip muuka ikiwos suusa saarik wiar ikua. Ne o aakunowa-ke ifa maneka nain aakunowa saarik. 12 Maa eneka eena iiriw lawisiw akena umekak nain kiiriw sariarek nain-ke ona kekanowa maa eneka asia aakisa fan imenarek nain iweya o asipam-ikua. Ne os-ke miiw mua unowa wia maakemi maa eneka oko nain lotu onowa wia suuwam-ikua. 13 Maa miililina unowa imenam-ikua nain maa oko feenap onak, mua unowa mokok epa-pa mukuna fareya aapereka iinan-pa orok. 14 Maa eneka ookikir imenarek nain epa wiar aawep maa miililina imenami mua unowiya wia peeskimemi wia mufem-ikua. Wi mua wia maakemi maa eneka eena iiriw bainat-pa mikiwkin puep kirek nain miira wiar sirarep nain lotu onam-ikeka wia naakek. 15 Ne kekanowa iweya mua miira sirarep-puamik nain ewar iweya aakunem-ikua. Wi teeria o lotu me onimik nain ona maeya wia ifakimikuan. 16 Maa eneka nain-ke wia maakek, “Ni mua unowiya niena wapen akena e ekima-pa siisia niar wuauk,” naap wia maakemi onowa wia suuwak. Wi mua unowiya wi mua unum marew, wi mua unumiya, wi maamuma mua ne wi maa marew akena ikemik nain, wi sesa marew uuwimik nain ne wi wiena miiwa-pa uuwimik nain, wi unow onaiya siisia wueka wia maakek. 17 Aria wi mua maa eneka siisia nain wiar wuowa miatinimik nain maa me sesekikuan, maa pun me sesenarikuan. Ne wi siisia onaiya ikemik nain-ke maa eliw sesekikuan ne maa pun sesenarikuan. Moram siisia nain maa eneka nain unuma-ke, unuma nain namba-pa siisimemik. 18 Aria i maa fain kema pukep amisarowa-ke. O mua firia ikok-na namba eliw wiar tuunap imeninon. Moram namba fain mua unuma pepekimok, 666.

Copyright information for `MHL