Revelation of John 20

Mokoma tausen kuisow

Ne aria ensel oko owow iinan-pa orom-ikaeya urufam. Ona fuura onom marewa nain omopora teekow maa opap orok, ne sen kekanowa pun opap ikua. Oromi ifa awoniya maneka opap seniw kaikak. Nain urufowa suan saarik urufinan, nain maneka wenup. Ifa nain unum oko Sawur, naemi Satan naimik. Opap ona-pa nan wafurap ona irinap kiira nain baliwep tana opawak. Miiwa-pa feek ikok miiw mua nainiw me wia peeskimemi wia mufem-ikainok naep. Ona-pa ikowa nain mokoma tausen kuisow aawinon. Ne wiimar mokoma pepekimomak nain weesereya wasirkiwkin miiw iinan kiiriw urupinon. Ne urupiya nain epa eeya me ikainon.

Ne aria wi saria maneka pokow maa unowa urufam. Mua neeke pokap ikemik nain kekanowa wiiwkin wi miiw mua wia urufam-ikok wiena sira baliwep akena wia mekawikuan. Ne wi mua kukusa pun wiar urufam. Wi teeria nain iiriw Mua Maneka opora wiar opap Yeesus opor makena wiar maem-miawiwkin imakuna wia puukami wia ifakimemik. Wi teeria nain iiriw maa eneka asia ne miira siraremik nain lotu me wia onamik, ne wiena ekima-pa ne wapena-pa maa eneka siisia nain pun me wiar ikua. Wi kiiriw naapiw iikirap owow saria arep Yeesus wameiya ikok mokoma tausen kuisow miiwa urufam-ikemik. Wi mua papako me iikiramik, mokoma tausen kuisow iiwawun weesereya wi iikirikuan. Wi iiriw iikiramik nain miimowa-ke, ne wiimar mua papako iikirikuan. Wi mokomokoka iikiramik nain wi Mua Maneka teeria kakeniw wiar ikemik ne wi kema eliw akena ikaikuan. Moram ikoka Mua Maneka mua papako epa samora wia sesekowa nain wi me wia sesekinon. Wi ikoka anane maneka Mua Maneka ne Yeesus ikos lotu wia onami uuwowa nain opikuan. Ne mokoma tausen kuisow Yeesus wameiya ikok miiwa fain urufam-ikaikuan.

Mua Maneka-ke Satan samorak

Mokoma tausen kuisow nain weesereya Satan ona-pa ikua nain wasirkikuan. Wasirkiwkin urupemi miiw unowa wiar ikiwep wia mufinon, wi nain Gok ne Magok wia naimik. Irakowa ikiwowa naep mua unow akena wia aawinon. Teeria nain manek akena, wia tuunowa me pepek. Wis-ke iiwua ikiwemi Mua Maneka teeria ona wia kookaliya nain wia warikikuan. Wi owowa eena Mua Maneka senam akena wia kookaliya nain. Naap oniwkin iinan mukuna-ke oromi iiwawun wia kukumakinon. 10 Ne Satan eena wi mua wia momoriya nain opami ona fuura onom marew-pa nainiw neek wafurikuan, epa eena nomona awem-ikaiya nain ne iiriw maa eneka asia ne wadol profet nan wafuramik nain. Wi neek ikok anane maneka sirirowa naap aawem-ikaikuan.

Wi Mua Maneka opora me ookimik nain sirirowa aawikuan

11 Ne aria mua oko urufam, o pokow maa kia maneka-pa nan pokap ikua. Miiw maa ne aaperek maa iiwawun mesenalek. 12 Kiiriw me urufimik. Aria wi mua iiriw umemik nain wia urufam. Wi mua unumiya ne mua unum marewa wi unowiya mua nain miir onoma-pa wiar iimarep ikemik. Maifa unowa paaskap-puiwkin ikomakek ne maifa maneka oko pun paaskap-puiwkin ikua. Maifa nain wi mua kiiriw me umowa nain unuma nan wiar ikomakek. Aria wi iiriw umemik nain wiena iiriw pina onamik nan wia mekawamik. Pina eena iiriw maifa unowa-pa wiar siisimep-puamik naap. 13 Wi iiriw ifera-pa umemik nain ne umow owowa-pa ikemik nain pun iiwawun kereremik. Unowiya kereriwkin wiena sira iiriw mokok enuma ikok onam-ikemik nain wiar ookami wia kiripomak. 14 Wi pina wia kiripomami unowiya mukuna-pa wia wafuramik. Wi teeria nain aakisa umowa erup aremik. 15 Wi teeria wiena unuma maifa maneka-pa me wiar ikomakek nain iiwawun mukuna-pa wia wafuramik.

Copyright information for `MHL