Revelation of John 21

Aapereka ne miiwa enuma

Aria maa unowa nain weesereya aapereka ne miiw awona iiriw ikua nain mesenalek, ne ifera pun iiwawun loonek. Ne aapereka miiw enuma onaiya urufam. Naap ikok owow enuma Yerusalem iinan-pa orom-ikaeya urufam, owowa nain Mua Maneka-ke sesekeya orok. Maa bala eliw akena. Emeria muewekam naep muewow fofa-pa maa bala opap mua arewam-ikaiya, naap akena imenarek. Ne mua pokap ikua nan iwakara oko feenap kerew maem-ikaeya miimam, “Aakisa Mua Maneka orop miiw mua wiamiya ikua. Ne wi o teeria-pa wiar ikaikuan. Ne feenap maem-ikaikuan, ‘Mua Maneka yiena Mua Maneka-ke,’ naap maem-ikaikuan. Os-ke mokok eka wia ipiwominon. Miiw awona sira-sira iiwawun mesenalek. Naapeya umowa marew, kema damolalowa ne mia tiitinowa marew ikaikuan.” Naap maek.

Ne aria mua pokap ikua nain-ke efa maakek, “Aakisa sira enuma imenam. Opora fain makena maiyem, naapeya siisime, ikoka maa naap nain imenarinon.”

Ne nainiw maek, “Aakisa weeserek! Yo iiriw ikem ne aakisa pun naap ikem. Maa unowa onoma yos-keriw ne murarowa weeserowa pun yos-keriw. Mua-ko kema enekarinon-na eka ona-pa urupem-ikaiya nain onakinen, eka nain ore wuap-puam. Enep anane eliwa naap ikainon. Mua-ko akimowa nomakinon-na yo o Mua Maneka-ke aawep urufam-ikainen. Ne o yena muuka efar ikainon. Ne wi teeria fain wiena owowa nomon mukuna onaiya ikua neek ikaikuan: wi yo opora efar miatinep baurarimik nain, wi opora me efar opimik nain, wi mua oko wia ifakimemi sira samora unowa onimik nain, wi uruw mia samora nain, wi epia mua, ne wi maikua-pa maa fiimik nain, wi mua miira sirarep lotu onimik nain, wi wadolalimik nain, wi iiwawun samor aawikuan. Nain umowa erup arowa-ke.”

Yerusalem enuma

Ne aria ensel oko epira ikur okaiwi-pa erup murarow akena-pa maa samo-samora iiriw miiwa-pa sawikak nain-ke ekapep efa maakek, “Aria, ekapeya Sipsip Muuka emeria aawok nain nefa ofakowinen.” 10 Ne Ewar Eliwa-ke efar ireya ensel-ke efa aawep ema maneka iinan akena efa pikiwok. Ema mokoka-pa iimarep ikok Yerusalem enuma efa ofakowak. Owowa nain eliw akena, Mua Maneka-ke owow iinan-pa sesekeya orom-ikua. 11 Mua Maneka parina-ke owowa nain parina iweya wilinem-ikua. Nomona galas saarik nain ne ofa sira-sira nain-ke awilawila kuem-ikaeya urufowa eliw akena. 12 Owowa nain pika iinan akena. Nomon mane-maneka ten kuisow erup nainiw wui-ikiwep iinan-pa pika maneka karuok. Sipsip Muuka aposel teeria ten kuisow erup nain wiena unuma nomona-pa nan wia siisimep-puamik. Pika nain omopora mane-maneka ten kuisow erup. Omopora arow arow ikua, ama urupow ekeria omopora arow, ama orow ekeria arow ne kame kiira okaiwi arow ne okaiwi pun arow, naap ikomakek. Ne ensel ten kuisow erup omopora kuisow kuisow urufam-ikaimik. Wi Isrel kerekera ten kuisow erup nain kerekera kuisow unuma omopora kuisow-pa naap wiar siisimep-puamik.

15 Aria ensel yo efa maakem-ikua nain maa pepekimowa kuuma opap ikua. Ikoka maa nain-pa owowa, omopora ne pika pepekiminon. Kuuma nain goliw onamik. 16 Owowa nain maala 2,200 kilomita naap ne moke puukowa oko-okaiwi pun naap. Ne iinan urupok nain pun naap. 17 Owow pika kurum akena, koor kuow mua maa pepekimimik nain-pa pepekimok nain 65 mita naap. 18 Pika nain nomona siisia sira-sira aawep oniwkin siisiarem-ikaiya ne owow kemena epa uruma gol manekiw nain galas saarik dubil akena. 19 Pika onoma nomona galas saarik wilinem-ikaiya nain ofa sira-sira nain onoma-pa wuamik. Nomona oko galas saarik wilinem-ikaiya nain wuamik, feenap, ofa kia akena, ne oko kia nain wuamik ne nain oko ofa enuma nain wuamik. 20 Ne oko ofa oka ne kia sii-siisia nain wuamik. Ne oko ikua nain, nomona nain ofa oka akena nain wuamik. Ne oko ofa ligam. Ne oko ofa enuma sii-siisia ne oko ofa ligam. Ne oko, ofa enuma. Ne oko ofa ekapina. Ne oko oka see-seera. 21 Aria omopora ten kuisow erup nain kuisow kuisow omod maneka nainiw omopora sirarek. Ne owow kemena era maneka gol manekiw, galas saarik wilinem-ikaiya.

22 Aria yo tempel koora-ko me urufam, moram Mua Maneka kekanowa akena Sipsip Muuka ikos wi kakeniw nan ikemik. 23 Owowa nain Mua Maneka parin maneka epa aawok, ne Sipsip Muuka pun parina iwem-ikaiya. Naeya ama ne siiw parina uuwowa marew. 24 Miiw unowa mua unowa owowa nain parina-pa soomarem-ikaikuan, ne wi owow saria wiena maa unowa ele-eliwa neek pikiwikuan. 25 Owowa nain omopora mane-maneka nain paaskap-puiwkin anane maneka naap ikainon, me upikuan. Moram epa nain me kokomarem-ikainon. 26 Ne owow unowa Mua Maneka lotu onowa naep wiena maa ele-eliwa nain owowa neeke pikiwikuan. 27 Maa samora ne sira samora neeke me ikainon. Wi mua sira samora onimik nain ne wadol sira onimik nain neeke me ikaikuan. Wi mua unuma Sipsip Muuka maifa maneka-pa wiar siisimeya ikomakek nain muutiw neek ikaikuan, eena anane eliwa ikowa nain.

Copyright information for `MHL