Revelation of John 4

Owow iinan opora

Aria maa unowa nain weesereya yo feenap urufam. Owow iinan omopora paaskap-puamik. Ne iwakara oko iiriw puuw fuurowa saarik miimam nain-ke efa maakek, “Feeke urupeya maa ikoka imenarowa nain nefa ofakowinen.” Naap maem-ikaeya Ewar Eliwa-ke mia-pa efar oreya feenap urufam. Owow iinan-pa mua-ko saria maneka pokow maa-pa nan pokap ikua. Urufam nain nomon sira-sira nain awilawila kuem-ikaiya nain saarik wilinem-ikua. Ona saria pokow maa nain iwamerena-ke saawirinowap ikua. Iwamerena nain nomona oko awilawila kuem-ikua nain naap wilinem-ikua. Ne wi mua iperowa ten erup erepam o warikap wiena pokow maa-pa pokap ikemik. Mia suuwowa kia suuwap wiena ikiwosa bala orowawap ikemik nain gol manekiw. Saria maneka pokap ikua nan aapereka-ke wilinemi paranem-ikua. Ne arua ikur okaiwi-pa erup o miir onoma-pa wilinem-ikua. Arua nain Mua Maneka Ewar ikur okaiwi-pa erup nain-ke. Wi pokap ikemik nan maa oko melina galas saarik kuem-ikua naap nain-ke wi miir onoma-pa epa ifemakep wilin-ikiwok.

Ne aria maa sira oko mokok enuma ikemik nain erepam, nain-ke mua pokap ikua nain warikap ikemik. Wiena mia ara unowa faa, iiwawun mokok manekiw.
Oko maa eneka maneka laiyon naimik nain saarik urufam, oko bulmakau morena saarik, oko mua miira saarik ne oko saragum maneka birinem-ikaiya nain saarik, naap wia urufam. Maa erepam nain eewua ikur okaiwi-pa kuisow wiar ikomakek. Ne wiena mia ara iiwawun mokok manekiw, eewua tepak pun naap. Anane amirika ne uura Mua Maneka unuma fakerami feenap maem-ikemik, “Mua Maneka Kekanowa Akena, o eliw oram, o waisow eliw akena, iiwawun sira onaiya. Iiriw naap ikua, aakisa pun naap ne anane maneka naap ikainon.” Maa erepam nain-ke mua pokap ikua nain unuma wiar fakerami sira eliwa naakem-ikemik. Mua eena anane naap ikowa nain. 10 Wi naap onam-ikaiwkin wi mua iperowa ten erup erepam nain mua pokap ikua nain eena anane ikaiya nain warikap miir onoma-pa keema muuna mikap lotu onamik. Ne wiena ikiwos maa bala o pokiya neeke wafuromami maem-ikemik, 11 “Mua Maneka yiena Maneka! Nos-ke maa unow akena imenan. Nena kookalep wia imenan. Ne ewar wiomakeya eliw ikemik. Naapeya no unum maneka ne kekanowa akena, ne mua unowa unuma nefa fakeram-ikauk. Naap nefa onam-ikowa-ke.”

Copyright information for `MHL