Revelation of John 7

Wi Isrel kerekera Mua Maneka siisia wia wuomamik

Aria maa sira-sira nain weesereya feenap urufam, wi ensel erepam miiw oko-okaiwi, oko-okaiwi-pa iimarep ikemik. Naap iimarep ikok ewar, gomi, mareg ne bug oko-okaiwi-pa wuuniya nain iiwkap ikemik, ewar wuunemi miiwa, ifera, nomokowa me wuunowinok naep. Ne yo mokoka wuam-na ensel oko urufam. O Mua Maneka ona siisia miiw mua mia-pa wia wuomow maa nain opap ikok ama urupow kame-pa kererem-ikua. Kererep wi ensel erepam nain wia farek. Wiam erepam nain iiriw Mua Maneka-ke miiwa ne ifera samoruk naep kekanowa wiek. Wia faremi maek, “Oi, me ewur, miiwa, ifera ne nomokowa ewur me samoreka. Yiena Mua Maneka uuwow teeria nain ekima-pa siisia wia wuomamkun oneka.” Yo naap ikemkun wi mua kamin Mua Maneka teeria-pa wiar ikemik nain siisia wia wuomap maiwkin miimam. Wi Isrel kerekera ten kuisow erup nain iiwawun wia tuunak nain teeria maneka akena, 144,000 naap. Kerekera ten kuisow erup nain kerekera kuisow kuisow mua tausen ten kuisow erup (12,000) naap wia pepekimemik. Wi kerekera teeria ten kuisow erup nain feenap: Yuuda, Ruben, ne Gat, Aser, Naptali ne Manase, Simeon, Liwai ne Isakar, Sebulun, Yosep ne Bensamin. Kerekera kuisow kuisow nain mua tausen ten kuisow erup Mua Maneka siisia wia wuomamik.

Mua teeria manek akena

Aria nain weesereya yo kiiriw nainiw mokoka wuam-na yakeyak maneka wia urufam, mua unow akena, wia tuunowa me pepek akena. Wi mua nain wiena mia sira-sira, aakunowa sira-sira, kerekera ononaiya ne owowa ononer. Wi mia suuwowa kia maala suuwap Saria maneka pokiya nain, aria Sipsip Muuka ikua, wiam erup nain miir onoma-pa wiar iimarep ikok kesakesa ifa opap ikemik. 10 Naap ikok feenap farem-ikemik, “Mua Maneka pokap ikua nain ne Sipsip Muuka ikos wis-ke yia aawowa-ke!” 11 Wi ensel unowa-ke Saria Maneka pokap ikua nain, wi iperowa ne maa erepam mokok enuma ikemik nain wia warikap ikemik. Naap wia warikap ikok momokraremi iima ifemakep Mua Maneka lotu onamik. 12 Feenap maem-ikemik,

“Makena! Yiena Mua Maneka, no unuma nefa fakeriyen, i sira eliwa nefa naakimik. No unum maneka ne parin maneka, kema suuwowa eliwa, kekanowa, anane maneka naap ikon. I manek akena ekima nefa opimik. Makena!”
13 Yo naap ikemkun iperowa oko-ke efa nokarek, “Nee, wi teeria mia suuwowa kia maala wuamik nain wi kaakewe-ke? Ne kaaneke ikok ekapemik?” 14 Naeya maakem, “Aa maneka, nos-ke wia amisaren.” Ne efa maakek, “Wi teeria maneka-na wia samoramik nain kekanep sirirowa maneka aawep fan ekapemik nain-ke. Wiena mia suuwow maala nain Sipsip Muuka aka-pa wiar yasuwiwkin kia kirek. 15 Naapeya Mua Maneka tempel koora-pa, ona pokiya neeke anane uura ne amirika o miir onoma-pa wiar iimarep ikok lotu onam-ikaimik. Ne ona wia kakaltam-ikainon. 16 Wi kiiriw nainiw me wuailikuan, kema me enekarikuan. Ama me wia kuuminon, ne wi epa ununa-pa eliw ikaikuan. 17 Moram Sipsip Muuka-ke wia urufam-ikaiya, eena Saria pokiya nain miimow ona-pa wiar ikua nain-ke. Os-ke eka anane luulunem-ikaiya neeke wia pikiwinon. Ne wiena omow eka Mua Maneka-ke wiar ipiwinon.” Opora naap efa maakek.

Copyright information for `MHL