Revelation of John 9

Aria nain weesereya ensel oko-ke puuw fuurak. Fuureya feenap urufam, mokoma eena iiriw iinan piipuap orop ikua nain omopora teekow maa iwemik. Maa nain opap epa fuura ona nain omopora teekowa-ke. Mokoma nain-ke ona nain omopora teekeya kawus beela akena urupok. Kawus beela nain-ke urupemi ama umukeya kokoma-ke epa iiwawun wakesimok. Miiw unowa kawus beela nain-ke ifemakeya kame unowa aawa manekiw imenarek. Aawa nain samor akena, waasisirowa saarik nefa kueya tiitinowa samor akena aawinan. Aawa nain wia maakep-puamik, “Ni sipira, nomokow ifa ne maa papako me samoreka. Wi mua Mua Maneka siisia ekima-pa me wia wuomamik nain muutiw wia samoreka,” naap wia maakemik. Wi mua me iiwawun wia ifakimowa wia naakemik, wi siiwa ikur muutiw sirirowa wieka wia naakemik. Sirirowa nain waasisirowa yia kueya tiitinowa aawimik naap akena aawem-ikauk. Siiwa ikur nain sirirowa maneka aawemi maem-miawikuan, “I umekamik-na eliw oo!” Naap ikaikuan nain me umikuan.

Aawa unowa nain oos saarik wia urufam, irakowa ikiwemi wia aawimik naap. Wi ikiwos maa bala gol-pa onimik nain orowawap ikemik ne wi miira mua miira saarik. Wi afif fuula wi emeria afifa saarik, ne eneka laiyon eneka saarik anima wenup. Wi iiman epira wiam wakesimow maa kaapa kekanowa saarik wiar urufam, ne wi birinemi eewua aluowa-ke oos eena karis mufep irakowa ikiwemi kuru-karan-iwimik naap. Kerew akena karuiwkin miiw onaiya duuniya naap wia miimam. 10 Wi alew maala waasisirowa alewa saarik, nain-ke wia kuiya. Wi kekanowa alewa-pa wiar ikua, wia kuem-ikaiwkin siiwa ikur arinon. 11 Wiena saria maneka nain ensel samora-ke. Os-ke epa fuura ona nain urufiya. O unuma Iibru opora-pa Abadon unufimik ne Grik-ke Apolion naimik. (Nain kemena feenap, “Wia samoriya nain-ke”.)

12 Aria sirirowa aawem-ikemik nain weeserek, aakisa puuw fuurowa erup ikua.

13 Aria ensel erup ikemik nain oko-ke puuw fuurak. Mua Maneka miir onoma-pa gol patirow esimsa nain kua erepam-pa opora oko imenareya miimam. 14 Iwakara nain ensel puuw fuurak nain maakek, “Wi ensel erepam Yufretis eka pona-pa wia kaikap-puamik nain wia wasirkeya ikiwuk!” Naap maakek. 15 Wi ensel erepam nain naap arewap ikemik, ikoka miiw mua unowa teeria arow nain teeria kuisow wia ifakimowa nain. Ne mokoma nain, ona siiwa imenareya, fofa pepekimok nain ama kakeniw-pa wia wasirkiwkin ikiwemik. 16 Wi irakow mua teeria oos-pa karuemik nain wia tuunap efa maakemik nain 200 milion naap.

17 Maa unowa aakisa maem-ikaiyem fain yena kakeniw mokoka-keriw kirep urufam. Aria wi mua oos-pa irakowa ikiwemik nain wiena iiman epira wiam wakesimow maa nain oka akena, mukun oka saarik, ekapina ne ligam. Wiena oos ikiwosa-ke laiyon ikiwosa saarik urufam, ne mukuna kawus onaiya aria nomona ligam awiya nain mukun oposia mane-maneka saarik opaimika-pa wiar imenarek. 18 Maa arow nain-ke oos opaimik ona-pa wiar imenaremi miiw mua teeria arow nain teeria kuisow saarik napum samora wiemi wia ifakimok. 19 Wi oos kekanowa opaimika ne alewa-pa wiar ikua. Wiena alewa ifa imakuna saarik, nain-ke mua wia kuemi yoowa wiem-ikua. 20 Wi teeria me wia ifakimemik nain pun kema me kiremik, wiena sira-sira onam-ikemik nain me piipuamik. Wi inasina farimik ne mua miira sirarep wiena inasina arowamik, sira nain me piipuamik. Mua miira gol, siliwa, nomon oka ne nomokowa maa naap aawep sirarimik. Maa nain me aakuniya, mokoka marew ne me soomariya, nain yiena inasina-ke naemik. 21 Ne pun me wiam kemalemi wiam ifakimem-ikemik, mudi-pa wia kuem-ikemik ne maikua sira-sira onam-ikemik, uruw mia samora naap ikemik ne ikumarem-ikemik, sira unowa nain kema kirep me piipuamik.

Copyright information for `MHL