Romans 11

Mua Maneka wi Isrel wia aawiya

Aria yo nia nokarowa oko feenap, i Isrel Mua Maneka opora fienamik, naeya kamenap maiyen? Mua Maneka-ke yia iirareya ona teeria-pa me wiar ikaimik-i? Weetak, naap-ko me yia onak. Moram yos pun Isrel-ke. Abraham yiena unowiya nomokow fiira-ke, ne yo ona nembesir Bensamin kerekera-pa imenarem. Naapeya maiyem, weetak, Mua Maneka i Isrel sisina-pa me yia wuak. Iiriw ekera yena teeria-ke yia naek. Naeya ni ona opor ara oko maek nain kema-ko suuwiman-i? Nain iiriw profet Elaiya nanar nain feenap. Os-ke Mua Maneka wi Isrel pina wia kiripominok naep manek akena omawak, feenap maek,

“Oo Mua Maneka, wis-ke nena profet teeria iiwawun wia ifakimemik, ne maa eneka patirowa nomon esimsa pun nefar te-teekamik. Ne aakisa yo yaisow akena arem, nain pun efa ifakimu naep onimik.”
(1 King 19.10,14)

Naeya Mua Maneka-ke kamenap maakek? Feenap maakek,

“Aa, no me naisow ikon. Wi mua unow akena, tausen ikur okaiwi-pa erup (7,000) naap efar ikemik. Wi teeria nain inasina Baal naimik nain yiena inasina-ke me naimik. Ne miir onoma-pa keema muuna me mikamik.”
(1 King 19.18)

Mua Maneka-ke naap maakek.
Ne aakisa pun naap, Mua Maneka ona i Isrel yia kemalep mua kui-kuisow yia nanikap yia aaweya ona teeria-pa wiar ikemik. Me i Moses sira wuomakek nain ookamkun yia aawok, weetak. Onaiw yia kemalep yia aawok. Moram i sira nain ookamkun yia aawekak-na me maekam, onaiw yia kemalep yia aawok.

Ne kamenap? Wi Isrel unowa-na feenap maemik, “I Moses sira wuomakek nain baliwep ookamkun Mua Maneka-ke pina marew yia nainok.” Naap maimik-na weetak, wi uferamik. Ne wi mua Mua Maneka ona wia nanikap aawok, wi nain-ke pina marew wia naek. Naeya wi teeria eena uferamik nain iiwawun emina kekan-afuramik. Naapeya Mua Maneka opor ara oko feenap wia maek,

“Mua Maneka-ke wi Isrel kema wia pinaroweya mokoka maa me urufimik, ne ifana maa me miimimik. Iiriw naap wia onak nain ekapep aakisa pun naap ikemik.”
(Lo 29.4, Aisaiya 29.10)

Ne i nembesir owow saria Dewit pun feenap wia maek,

“I eliwa ikaimik naemi wiam irimik. Naeya wiena sira kookalimik nain-ke wia ekereya maa anima-pa wiam wuauk.
10 Ne wiena mokoka foma pukep maa makena me urufuk. Wiena pina akuawimik nain maa pina aawowa saarik ineka kuep ikauk.”
(Someka 69.22-23)

Mua Maneka wi owow oko oko wia aawiya

11 Aria yo nokarowa fain-ke efar ikua. Wi Isrel oro-boonemik nain iiwawun naap ikaikuan-i? Weetak, naap wia, era wiar ikainon. Nain wi wiena oro-booniwkin Mua Maneka-ke wi owow oko oko wia aawiya. Naeya wi Isrel wi nain naap wia urufap kema wiisarep Mua Maneka kiiriw ookikuan. 12 Ne aria ni fain kema suuweka. Wi Isrel-ke Mua Maneka me ookiwkin miiw unowa owow unowa wia kemalep wia aawiya. Wi Mua Maneka sira ookowa wiar piipuiwkin owow oko oko-ke Mua Maneka ookap eliw ikaimik. Aria wi Isrel unowiya kema kirikuan-na, aa eliw akena, miiw unowa owow unowa, wi unowiya eliwa ikaikuan.

Wi Isrel ne wi owow oko teeria Yeesus ookuk naek

13 Ne aakisa ni owow oko oko mua nia maakiyem, makena yo Mua Maneka-ke efa sesekeya Yeesus Krais opor eliwa nia maakem-miawiyem. Naeya yo uuwowa fain onowa kema urupep kekanowa uuwam-miawiyem. 14 Ne oko feenap, yo ni niar uuwamkun yena opor epaskun wi Isrel kema wiisarep papako kema kirep Yeesus Krais teeria wiar ekuk. Yo muut nain uuwiyem. 15 Wi Isrel Mua Maneka mikikira iwiwkin os-ke sisina-pa wia wuap miiw unowa nain wia aaweya ona epaskun ikemik. Ne wi Isrel kema kiriwkin Mua Maneka-ke kiiriw wia aawinon-na, aa eliw akena. Wi mua umep ikok iikirimik saarik arikuan. Umep iikirowa nain maa eliwa-ke.

16 Aria wi Isrel feenap saarik, inasin emera kiripap lawisiw puukap aawimik nain Mua Maneka unuma-pa wuomikuan-na aria okaiwi nain pun iiwawun iriniya Mua Maneka ona wiar arinon. Ne nomokowa pun naapiw, fiira Mua Maneka wiarik, naeya ekeka pun naap, Mua Maneka ona wiar ikainon. 17 Aria maa oko feenap kema suuweka. Wi Isrel oliw nomokowa akena saarik. Oliw ekeka papako Mua Maneka-ke pu-puukap iiraromakek. Ne ni eena oliw asia saarik ikeman. Oliw asia nain arekeka kaisap aawep oliw akena pia-pa tana opawak. Ne fiira-ke eka iweya arimiya. 18 Naapeya ni unuma niam pirowa-ko me ikua. Naap me maeka, “I eliwa-ke, naapeya Mua Maneka-ke wi Isrel wia iiraremi yia aawok.” Fain kema suuweka, ni ekeka-ke fiira kekanowa me iwiman, weetak. Makena, fiira-ke ni kekanowa nieya arimiman.

19 Ne ni feenap maiman-i? “Mua Maneka-ke ekeka papako iiraromakep i yia aawep epasuma-pa neeke yia tana opawak.” Naap-i? 20 Ae makena, naap eliw maowen. Moram wi Isrel Mua Maneka opora me wiar opiwkin wia iirarek. Ne ni opora wiar opiwkin nia aawok. Naeya ni me niam ireka, weetak. Ni Mua Maneka ekima manek akena opap kema tootoneka. 21 Moram ni feenap kema suuweka, Mua Maneka-ke oliw ekeka iirarep oliw asia arekeka kaisap neeke tana opawak. Naeya ni emina kekaniwkin-na nis pun naap nia iirarinon. 22 Naapeya ni fain wiar kema suuweka, Mua Maneka mua yia kemaliya, naemi bagiaw pun yia ofakowiya. Wi wakiep oromik nain bagiaw wiar urufikuan. Wi o opora wiar opap ikaimik nain wia kemalep wia saliwiya. Naapeya ni kekanep opora wiar opap ikeka, oko nis pun naap nia iirarinon. 23 Mua Maneka kekanowa onaiya ikua. Naapeya wi Isrel eena Mua Maneka piipuamik nain kema kirep opora wiar opikuan-na nainiw wia aawep ona teeria-pa wia wuinon. 24 Ni owow oko oko, ni eena oliw asia arekeka saarik ikok oliw akena pia-pa me ikowa nain Mua Maneka-ke nia kaisap aawep nia tana opawak. Neemi fain pun eliw oninon, nain yoowa marew. Mua Maneka eliw wia aawep ona epa awona-pa wia tana opawinon. O eliw naap onap-puinon.

Mua Maneka miiw mua unowiya yia kemalep yia saliwiya

25 Aria emar unowik, wi Isrel papako emina kekaniwkin Yeesus Krais opor eliwa miiw unowa owow unowa ikip nia maakimik. Ne ni opora opap Mua Maneka teeria wiar ekowen. Oko ni niam purupemi feenap maowen, “I eliwa, ne wi Isrel weetak.” Nain naep yo maa kokot ikua fain amisareka naep nia maakiyem. Ni naap ekap pepek eriwkin wi Isrel unowiya nainiw wia aawinon. 26 Mua Maneka opora eena siisimep-puamik nain ona feenap maep-puak,

“Wi Isrel eena Yekop nembesir unowa nain pina onam-ikaimik. Ikoka wi wia aawow mua nain wiena owowa Saiyon-pa wiar imenarep sira wiar kiripinon.
27 Aria yo pina wiar iirarowa maiyem nain yena opora-ke. Yena wia maakep opora koonowiyem nain ookap naap oninen.”
(Aisaiya 59.20-21, 27.9)

28 Yeesus Krais opor eliwa nain Mua Maneka-ke ni miiw unowa owow unowa miimeka naep wi Isrel sisina-pa wia wuak. Naeya wi aakisa o iiwua saarik wiar ikemik. Nain Mua Maneka ona iiriw wiena nomokow fiira Abraham ame wiamiya opora koonowak. Naeya wi iiriw wia pepekimeya ona teeria kakeniw wiar ikemik. O manek akena wia kookalem-ikaiya. 29 Opora iiriw naap maek nain me kiripinon. 30 Feenap, ni owow oko oko iiriw Mua Maneka opora me wiar miimam-ikeman. Ne aakisa wi Isrel-ke Mua Maneka opora mikikira-pa wuiwkin o nia naep nia kemalep nia asipiya. 31 Ne aakisa wi Isrel pun naap, makena wi Mua Maneka opora mikikira iwemik. Nain ikoka pun wia kemalinon, ni nia kemaliya naap. 32 Moram miiw unowa owow unowiya emina kekanep Mua Maneka opora me wiar miimiwkin unow onaiya pina-pa yia wuak. Ne o yia kookalep ikoka unowiya yia saliwekam naep sira naap onak.

I Mua Maneka unuma wiar purupiyen

33 Aa Mua Maneka aa! Maa muutitik ne ele-eliwa unowa yia onomak. Ona amisa manek akena, iinan akena, kapa marew. O kema suuwowa-ke maa muutitik nomakek. O amis maneka nain i kamenap wiar amisarep maem-miawiyen? Ne o kema siisia wiar ikua nain pun i wiar mekawowa me pepek akena. 34 Ne Mua Maneka opora siisimep-puamik nain pun feenap maek,

“Mua naareke Mua Maneka kema wiar amisarek, ne mua naareke o emina-pa wiar iimarep kema iwiya?
(Aisaiya 40.13)

35 Ne mua naareke Mua Maneka maa iweya ikoka muuna kiripominon naiya?”
(Yop 41.11)

Opora naap maek.
36 Moram maa unowa Mua Maneka ona tawerarek, ne os-ke ikaeya maa unowa o kekanowa-pa ikaiya. Neemi ona maeya naap akena imenariya. Naapeya maiyem, oo Mua Maneka, no unum maneka anane naap nefar fakeram-ikaiyen. Makena.

Copyright information for `MHL