Romans 16

Aria aakisa yo yiena uuwow epaskun Fibi maiyem, emeria eliwa-ke. Wi Yeesus teeria Senkria owowa-pa ikemik nain wiamiya ikok uuwiya. O ikiwep niar fuuninok-na yiena Maneka teeria-ke naep aawiwkin niamiya ikainok. I Mua Maneka teeria sira naap onowa-ke. O teeria unow akena wia asipami yos pun efa asipam-ikua. Naapeya maiyem, maa-ko iiwarinok-na asipeka.

Aria Prisila ona mua Akuila ikos neek wia maakeka, yo wi eliw ikauk wia naiyem. Wi yena uuwow epaskun-ke, i unowiya Yeesus Krais uuwomimik. Wiam erup iir oko yo efa asipam-miok lawisiw akena umekamik. Wi manek akena yia asipamik. Naeya maiyem, me yo yaisow muuta sira eliwa wia naiyem, wi Yeesus teeria oko oko pun sira eliwa wia naimik. Ne wi Yeesus teeria papako anane wiam erup koora-pa wiam fiirimep Mua Maneka lotu onimik nain pun neek wia maakeka, wi eliwa ikauk wia naiyem. Ne yena emar Epenetus pun maakeka, o eliw ikainok naiyem. Esia kame nain o kiikir Krais teeria wiar ekak. Ne Maria pun maakeka, yo eliw ikainok naiyem, o ni nia naep uuwowa kerew uuwak. Ne Andronikus Yunias ikos neek wia maakeka, wis pun eliw ikauk wia naiyem. Wi i Yuuda epaskun-ke, ne Yeesus muuta nain efamiya koora ekamik. Wi kiikir uuwowa nain aawep ikaiwkin yo aakisa fan aawem. Ne wi Krais uuwow mua aremik nain unum onaiya ikemik.

Aria yena uuwow epaskun Ampliatus, o eena manek akena kookaliyem nain pun efar maakeka, eliw ikainok naiyem. Ne yiena uuwow epaskun Urbanus ne yena emar oko Stakis, wiam erup eliw ikauk wia naiyem. 10 Ne Apeles pun eliw ikainok naiyem, o Krais ookami sirirowa aawok nain fienap nomakek. Aria wi Aristobulus teeria nain pun eliw ikauk wia naiyem. 11 Ne yena kaka epaskun Erodion pun maiyem, eliw ikainok naiyem. Ne wi Narsisus ona teeria onaiya pun wia maiyem, eliw ikauk wia naiyem.

12 Ne emeria wiam erup, Trifina Trifosa ikos wia maiyem, eliw ikauk wia naiyem. Wiam erup yiena Maneka uuwowa yoow akena onomamik. Ne Pesis yiena ekera, os pun yiena Maneka uuwowa kerew akena onam-ikua. Os pun eliw ikainok naiyem. 13 Ne yiena Maneka uuwow mua oko Rufus, ona onak ikos eliw ikauk wia naiyem. O onak-ke muuka efa arowap efa kakaltak. 14 Aria wi teeria fain, Asinkritus, Flegon, Ermes, Patrobas, Ermas ne mua papako wi wiamiya ikemik nain pun unow maneka eliw ikauk wia naiyem. 15 Ne Filologus ona emeria Yulia ikos, aria Nereus ona wekera ikos ne Olimpas ne wi Mua Maneka teeria papako wi wiamiya ikemik nain pun unow maneka eliw ikauk wia naiyem. 16 Aria ni teeria nain unowiya eena Yeesus Krais teeria-pa ikeman, sira eliwa, nis pun eliw ikeka niam naakeka. Ne Yeesus Krais teeria owow unowa-pa ikemik nain pun ni eliw ikeka nia naimik.

17 Aria emar unowik, ni Yeesus Krais opor eliwa aaweman. Nain ni maa urufami, oko wi wadol opora onami mua wia peeskimimik nain era oko-pa nia pikiwikuan. Naeya niam fo-fookami Yeesus Krais ookowa pinarowen. Naapeya wi wiamiya me areka. 18 Moram wi mua naap nain wi me Krais uuwowa onomimik, weetak. Wi wiena mia kookalowa ookimik. Ne opora wia daiberow aremi wi mua amis marew nain era samora-pa wia pikiwiwkin oro-boonimik. 19 Aria ni Krais opora wiar ookiman nain meta niar manekarek. Naapeya yo muut nain manek akena kemeliyem. Nain yo feenap nia maiyem, ni maa baliwep kema suuwap oneka, sira eliwa kema manekiw ikeka ne sira samora onowa kema marew ikeka. 20 Aria epa me ekinon, Mua Maneka kema eliwa yiiya nain Satan samorami ni kepur tepak-pa niar wuinon. Ne yiena Maneka Yeesus niamiya ikok nia asipam-ikainok.

21 Aria yena uuwow epaskun Timoti eliw ikeka nia naek, ne yena kerekera epaskun wiam arow, Lusius, Yeson ne Sosipater wis pun naapiw, eliw ikeka nia naemik. 22 Aria Pol ona opora maem-ikaeya yo Tertius-ke siisimem. Yos pun naap nia maiyem, yiena Maneka unuma-pa eliw ikeka nia naiyem. 23 Aria Gaius pun eliw ikeka nia naek. Yeesus Krais teeria unowiya o koora-pa yiam fiirimimik mua nain. Ne Erastus Kartus ikos pun eliw ikeka nia naemik. Erastus-na Korin owow maneka fain maamuma wia urufomiya. 24 Yiena Maneka Yeesus Krais ni niamiya ikok nia asipam-ikainok. Makena.

25 Aria i Mua Maneka unuma wiar fakerikua. Os-ke eliw nia kekanowami Krais opor eliwa yo wia maakem-miawiyem nain kekanowa opaka naep nia asipiya. Opora eena iiriw kokot wiar ikua ne aakisa ariman arek nain. 26 Opora nain iiriw Mua Maneka-ke ona profet wia maakeya siisimep-puamik. Ne aakisa is-ke opora nain ariman wia maakem-miawimik. Naeya miiw unowiya Krais opora wiar miimap opora wiar opikuan. 27 Oo, Mua Maneka, no naisow amis maneka. Naeya i Yeesus Krais unuma-pa no unum maneka anane maneka nefar fakeram-ikaiyen, me piipuiyen. Makena.

Copyright information for `MHL