Romans 3

Sira samora sira eliwa me ifemakinon

Aria no naap mainan, “Naapeya i Yuuda ikemik nain maa oram-ki? Ne i mia kanima puukimik nain pun oram-ki?” Naap mainan. Weetak, i Yuuda-na Mua Maneka-ke iiriw maa eliwa sira-sira yiomakek. Ne maa manek akena nain feenap, ona opor unowa i wapena-pa yiar wuak. Makena, i Yuuda papako Mua Maneka opora me ookamik, nain kamenap? Wi naap oniwkin Mua Maneka opora maek nain pun makena me arowinon-i? Naap maiyen-i? Weetak akena, moram Mua Maneka ona opor ara oko siisimep-puiwkin ikua nain feenap maek,

“Mua Maneka, no opora maen nain-ke makena arinon. Ne wis-ke nefa maikuan-na ‘No opor onom marew nain yia mekawin,’ naap maikuan-na nos-ke sira kakeniw onami wia nomakinan.”
(Someka 51.4)

Naapeya wi mua unowiya iiwawun wadolalikuan, ne Mua Maneka-ke waisow opora ne sira makena anane naap ikaiya.
Aria i sira samora yiar urufap maimik, Mua Maneka waisow sira eliwa akena-ke. Naapeya i miiw mua kema suuwowa wiokami feenap eliw maiyen-i, “Mua Maneka i sirirowa yiiya nain kakeniw me oniya.” Naap-i? Weetak akena, naap me maiyen. Mua Maneka sira kakeniw me ikekak-na yia mekawowa me pepek.

Aria oko pun, mua-ko feenap wame mainon-na, “Yo opor wadola-ke Mua Maneka opor makena nain ariman wiar aroweya unum maneka naap wiar manekarem-ikaiya. Ne moram naep pina mua-ke efa naemi yoowa yiinon?” Naap eliw mainon-i? Weetak. Naapeya ni feenap maeka, “Arika, i sira samora naap onam-ikaiyen, naeya ikoka i sira samora-pa neeke Mua Maneka sira eliwa ariman wiar areya ileniyen.” I naap-ko me maemik, nain mua papako-ke oram maneka yia maimik, “Wis-ke naap maimik.” Wi naap naimik nain ikoka Mua Maneka-ke pina wia kiripominon.

Mua kuisow-ko sira eliwa me oniya

Aria i kamenap maiyen? I Yuuda-na Mua Maneka mokoka-pa mua kaken eliwa-ke, ne wi owow oko oko wia, naap maiyen-i? Weetak akena, naap maowa-ko me ikua. Yo iiriw nan maem naneka, i Yuuda, wi Grik, i unowiya epaskun, pina-ke yia wakesimep ikua. 10 Moram Mua Maneka opor unowa feenap maek,

“Mua kuisow kakeniw-ko me ikaimik, weetak akena.
11 Mua unowiya Mua Maneka sira baliwep-ko me wiar amisaremik. Ne mua unowiya Mua Maneka kema-ko me wuimik, weetak.
12 Wi unowiya Mua Maneka mikikira iwemik. Naapeya o mokoka-pa mua sira eliw marew ikaimik. Naeya wi weetak akena. Mua kuisow sira eliwa-pa-ko me ikaimik, weetak akena.
(Someka 14.1-3, 53.1-3, Saveman 7.20)

13 Wi opora aakunimik nain mudi wiarowa saarik arimik. Naeya opor wadola senam akena uuwunimik. Wi opora maimik nain-ke mua wia samoriya, ifa mueyarowa saarik.
(Someka 5.9, 140.3)

14 Mua oko kema wia bagiwirami opor samora wiemi wia sarinimik.
(Someka 10.7)

15 Aria mua wia ifakimu naep wia wuimik.
16 Epa kaanek ikiwimik nain sira samo-samora imenami emeria mua wia ekerimik.
17 Mua oko wiamiya sira eliwa-pa pokowa nain wi kema marew.
18 Mua Maneka me keker opimik.”
(Aisaiya 59.7, Someka 36.1)

Mua Maneka opora naap maek.
19 Aria i fain amisaremik, Mua Maneka-ke i Yuuda sira eliwa ookeka naep sira unowa Moses maakeya yiomakek. Naeya i sira unowa nain tepak-pa ikemik. Naapeya i mua kuisow feenap maep sailowa me pepek, “Yo me amisarep sira samora onam,” weetak. Ne i miiw mua unowiya Mua Maneka mokoka-pa pina onaiya ikemik. 20 Moram sira ookowa nain, mua kuisow Mua Maneka mokoka-pa pina marewa-ko me ikaimik, weetak. Mua Maneka sira yiomakek nain-ke kema yia fookeya sira samora ne sira eliwa amisaremik. Neeke i pina onimik nain yiam amisaremik.

Yeesus Krais opora opiwkin Mua Maneka-ke mua kaken eliwa wia maiya.

21 Ne aria, aakisa Mua Maneka emeria mua kaken eliwa yia naiya nain era ariman arek. Nain me i Moses sira wuomakek nain ookimik neeke kaken eliwa yia naiya, weetak. Era enuma wiimar imenarowa nain iiriw Moses opora siisimok nain maek, ne wi profet pun maemik nain era makena-ke naemik. 22 Nain feenap, Mua Maneka-ke Yeesus Krais ekima-pa wi o opora wiar opiwkin wi emeria mua kaken eliwa-ke wia naiya. Mua eena opora wiar opimik nain unowiya eliwqa ikaikuan, me wi owow oko oko muutiw, i Yuuda pun naap. 23 Moram i unowiya pina onami Mua Maneka sira eliwa onowa yia maakek nain i uferamik. 24 Nain, i eena Yeesus opora wiar opimik nain Mua Maneka-ke mua kaken eliwa yia naiya. O pina yia kema suuwap manek akena yia kemalep Yeesus Krais sesekak. Os-ke pina yiar aawep ona mia-pa wame wueya i pina marew ikemik. Naeya Mua Maneka mua kaken eliwa yia naiya. 25 Yeesus-na mua pina wiar iirarowa naep Mua Maneka-ke sesekak. O umep aka sawikak. Wi mua o opora wiar opimik nain pina wiar ipiweya Mua Maneka bagiaw me wiinon. Naap onami Mua Maneka ona sira kakeniw ookami yia mekawiya nain ariman wuak. Feenap, o iiriw wi pina onam-ikemik nain kema wiar suuwam-ikua, nain me wia samoram-ikua. 26 Ne aakisa pun ona sira kakeniw ariman wuiya, Mua Maneka kakeniw akena-ke, ne wi Yeesus opora wiar opimik nain kaken eliwa-ke wia naiya.

27 Naapeya i Moses sira wuomakek nain ookami unuma eliw yiam piriyen-i? Weetak. I unuma yiam pirowa nain onoma-ko me ikua. Aria i kamenap onamkun Mua Maneka i kaken eliwa-ke yia nainon? I Moses sira wuomakek nain baliwep ookamkun naap yia mainon-i? Nain weetak. I Yeesus opora wiar opiyen-na makena. 28 Moram i feenap maimik, i Yeesus Krais opora opowa-pa i Mua Maneka mokoka-pa kaken eliwa aremik, me Moses sira ookowa-pa eliwa aremik.

29 Aria i feenap maiyen-i? Mua Maneka i Yuuda muutiw yia kakaltiya, wi owow oko weetak-i? Naap weetak, wis pun wia kakaltiya. 30 Moram Mua Maneka waisow muuta, os-ke i mua mia kanima puukimik nain Yeesus Krais opora wiar opamkun-na kaken eliwa yia naiya, ne wi mia kanima me puukimik nain pun sira kuisow naapiw wia naiya. 31 Ne aria i feenap maimik, Yeesus Krais opora wiar opowa nain maa maneka-ke. Naap maemi sira eena Moses wuomakek nain sisina-pa wuiyen-i? Weetak. Yeesus opora wiar opimik neeke yiam kekanowap sira nain pun ookam-ikaiyen.

Copyright information for `MHL