Romans 6

I Yeesus Krais wameiya umemik naimik

Naapeya i eliw feenap maiyen-i? Mua Maneka yia saliwowiw ikaiya, naapeya manek akena naap yia saliwam-ikainok naep i pina naap oni-ikim-ikaiyen, naap-i? Weetak akena, naap-ko me ikua, i pina onam-ikowa nain iiriw piipuamik, kamenap kiiriw nainiw pina onam-ikaiyen? Ne ni fain pun me kema suuwiman-i? I Yeesus Krais unuma-pa yia yasuwamik. Naeya i o epaskun aremik. Ne o umok nain is pun naap o wameiya umemik naimik. Naapeya i yia yasuwamik nan o wameiya eruwa-pa yia wuamik naimik. Ne yiena Auwa ona kekanowa-pa o iikiroweya iikirami mia enuma kirek. Naeya is pun sira enuma-pa ikok naap ookam-ikaiyen.

I Krais wameiya ikok eliwa ikaimik

I feenap amisaremik, i o wameiya nomokow moke-pa umemi iiriw mua sira kamenap ikemik nain iiwawun piipuamik. Neeke sira samora iiriw yia kaikap-puak nain kekanowa weeserek. Naeya i pina onam-ikowa nain kema marew. Moram i mua umemik yiam naimik nain pina onowa kema-ke me yia kaikap ikainon. Makena, i o wameiya umemik, naapeya kiiriw o wameiya iikirap sira enuma-pa ikaiyen. Naapeya feenap maimik, makena i Krais wameiya epaskun umemik. Ne Krais umep ikaeya Mua Maneka-ke iikirowak. Ne o nainiw me uminon. Umowa-ke kiiriw me ifemakep ikainon. Moram o umowa kuisow aremi i pina onimik nain yia weeser-wuomak. Ne kiiriw me uminon. Ne aakisa o ikaiya nain Mua Maneka wameiya epaskun ikemik. Naeya i o wameiya epaskun ikok yeeliw akena ikemik naimik. 11 Aria sira naapiw, ni feenap niam maeka, “Aa, wi mua umemik naap saarik ikok i pina kiiriw me oniyen. Ne Yeesus Krais wameiya epaskun ikok Mua Maneka kookalowa wiar ookam-ikaiyen.”

12 Naapeya pina onowa kema-ke me nia mufem-ikainok. Naeya niena mia kookalowa me ookam-ikowen. 13 Ne pina onow kema me niar urupinok akena. Naeya niena mia ara-ke pina kuisow me onowen. Ne ni Mua Maneka wapena-pa niam wuami o nia maakiya naap onam-ikeka. Onoma feenap, ni umowa saarik ariwkin Mua Maneka-ke nia iikirowak. Naapeya niena mia ara unowiya iiwawun o wapena-pa niam wuami sira eliwa ne kakeniw ikeka. 14 Moram Mua Maneka-ke pina niar iirarep nia saliwowiw ikaiya, ne ni Moses sira wuomakek nain tepak-pa me wiar ikaiman. Naapeya ni pina onow kema nain-ke me nia wasiep ikainok.

Sira eliwa onowa kemaiw ikowa

15 I Moses sira wuomakek nain tepak-pa me ikemik. I aakisa Yeesus opora opamkun Mua Maneka-ke yia asipami yia saliwowiw ikaiya, nain makena. Aria nain naep pina naap onam-ikaiyen, naap maiyen-i? Weetak akena, naap maowa-ko me ikua. 16 Sira naap ikua, no mua oko uuwow tepak-pa wiar aremi osiw ookam-ikainan. Ne no pina onowa tepak-pa ikainan-na no pina onow manekiw ikainan. Naeya no Mua Maneka wameiya me ikainan, samor akena aawinan. Ne no Mua Maneka opora wiar ookam-ikainan-na no pina marew kakeniw ikainan. 17 Ni iiriw pina onowa tepak-pa ikeman, nain Yeesus opor unowa nain ona uuwow mua-ke anane ifana baliwep niarem-ikaiwkin aakisa opora wiar opap ookam-ikaiman. Naeya pina onowa kema-ke me nia opap ikua, weetak. Ni sira eliwa onowa kemaiw ikok sira eliwa manekiw onam-ikaiman. Naapeya yo Mua Maneka unuma fakerami sira eliwa naakiyem. 19 Oko yo opora maem nain kemena me efar aawowen naep yiena owow sira maemi uuwow mua sira nain maep naap pepekimem. Ni iiriw mia kookalowa ookow manekiw ikok emin ururowa sira-sira niena mia-pa onami Mua Maneka sira wiar puukap sira samora onam-ikeman. Naeya sira makena ookowa kema marew akena ikeman. Ne ni aakisa feenap oneka, niena mia ara unowa nain Mua Maneka tepak-pa niam wuami o sira kookaliya nain ookam-ikeka. Naeya ni sira kakeniw ikowen.

20 Ni iiriw pina onowa nain-ke kema nia opap ikaeya sira eliwa onowa nain kema marew ikeman. 21 Aria ni iiriw naap onam-ikeman nain maa eliwa-ko niar imenarek-i? Weetak, ni aakisa nain kema suuwap emina ururiman. Moram sira samora onowa nain-ke epa samora yia pikiwiya. 22 Ni pina onowa nain-ke nia opap ikaeya Mua Maneka-ke nia wasirkap aawok. Naeya ni aakisa kamenap ikaiman? Ni aakisa Mua Maneka tepak-pa wiar ikok o opora muutiw ookam-ikaiman. Neemi o sira kookaliya nain ookam-ikok anane o wameiya eliw akena ikowen. 23 Moram pina onimik nain, nain kiripowa umep epa samora ikiwowa-ke. Nain i yiena Maneka Yeesus Krais epaskun ikok anane eliwa ikaiyen. Nain Mua Maneka ona yia kemalep oram yia asipak.

Copyright information for `MHL