Romans 8

Krais Ewar Eliwa sesekeya yia asipam-ikaiya

Aria i aakisa Yeesus Krais teeria-pa wiar ikemik fain, Mua Maneka yia mekawap epa samora me yia sesekinon. Moram i Yeesus muuta nain Ewar Eliwa-ke kema yieya ona sira-pa ikaimik. Naeya i iiriw Moses sira tepak-pa ikemkun pina-ke yia wasiep ikua nain kiiriw nainiw me yia wasiem-ikainon. Neeke i umep epa samora me ikiwiyen. Sira eena Moses wuomakek nain yia asipowa me pepek, weetak, pina onowa kema manek akena yiar ikua. Muut nain yiena pina Mua Maneka ona yiar iirarekam naep ona muuka sesekak. Ne muuka nain-ke yia asipekam naep miiwa orok, orop miiw mua puukak. Aria i pina mua-ke ikemik, ne o mua pina marew. Os-ke pina yia akuawomaya Mua Maneka-ke i pina muuta nain o opora-pa wuami sirirowa maneka iwok. O naap onak nain onoma feenap, i yiena kookalowa me ookiyen, Ewar Eliwa kema yiiya nain ookami Moses sira wuomakek nain ookap silewap pepek arowiyen.

Aria wi mua wiena mia kookalowa-pa ikemik nain ookami nain kema manekiw ikaimik. Ne wi mua Ewar Eliwa kookalowa wiar ookimik nain Ewar Eliwa maa mauwa kookaliya nain, nain kema manekiw ikaimik. Ne wi mia kookalowa kema manekiw ikaimik nain wi umep Mua Maneka wameiya me ikaikuan, wi mesenalikuan. Ne wi Ewar Eliwa kookalowa kema manekiw ikaimik nain anane Mua Maneka wameiya ikok kema sonom eliwiw ikaikuan.

Nain onoma feenap, wi mua mia kookalowa kemaiw ikaimik nain, Mua Maneka sira wuomakek nain wiar fienap mikikira iwimik. Ne pun wi o ookowa nain me pepek akena. Wi mua nain Mua Maneka-ke sira me wiar kemeliya. Ne ni weetak, ni me mia kookalowa-pa ikeman, ni Ewar Eliwa kookaliya nain ookiman. Ewar Eliwa mia-pa niar ikainon-na ni naap ikowen. Ne mua-ko Ewar Eliwa me wiar ikainon-na mua nain Krais teeria-pa me wiar ikainon. 10 Nain Krais ni niamiya ikainon-na ni feenap ikowen. Makena ni pina mua-ke, ne pina-ke nia ifakimok. Nain Krais muuta nain Mua Maneka-ke ni pina marew nia naep nia aawok. Naeya niena kukusa eliwa niar ikainon. 11 Aria oko pun feenap, Yeesus umep ikaeya Mua Maneka-ke iikirowak. Naapeya Mua Maneka Ewar ni niamiya ikainon-na o Krais iikirowak naap nis pun nia iikirowinon. Ona Ewar Eliwa eena ni niamiya ikua nain-ke uuwinon.

Ewar Eliwa-ke i Mua Maneka muuka yia arowak

12 Naapeya maiyem, i aakisa ikemik fain yiena mia kookalowa me ookiyen. Ewar Eliwa kookalowa ookowa-ke ikua. 13 Moram niena mia kookalowa ookowen-na makena, ni wiimar umep Mua Maneka wameiya me ikowen. Ne Ewar Eliwa nia asipeya niena mia kookalowa iiwawun piipuowen-na Mua Maneka wameiya ikok anane eliwa ikowen. 14 Ne pun, ni mua Mua Maneka Ewar opora nia maakeya wiar ookiman nain ni Mua Maneka muuk unowa-ke. 15 Moram iiriw ni Mua Maneka keker opam-ikeman. Ne aakisa Ewar Eliwa niamiya ikaeya ni kiiriw o me keker opiman, weetak. Ewar Eliwa nain-ke mia-pa yiar ikaeya Mua Maneka-ke yena muuk unowa yia naek. Naeya i wameiya ekami farimik, “O Auwa, yiena Auwa,” naap maimik. 16 Ne Ewar Eliwa kema yieya i feenap yiam maimik, makena i Mua Maneka muuk unowa-ke, naap yiam maimik. 17 Ne pun, i Mua Maneka muuk unowa wiar ikok o iinan owowa maa eliwa yia wuap-puomak nain makena urufiyen. Me nain muutiw, fain pun, wiimar Mua Maneka Krais unum maneka iwemi is pun o wameiya unum maneka yiinon. Krais sirirowa maneka aawok, ne i o wameiya sirirowa aawiyen-na Mua Maneka-ke o wameiya unum maneka pun yiinon.

I wiimar iinan owowa-pa eliwa ikowa imeniyen

18 Aria yo fain maiyem, i aakisa sirirowa aawimik nain maa oram-ke. Makena, Mua Maneka ona wiimar unum maneka yiemi owow iinan epa eliwa yia wuap-puomak nain maa maneka-ke. 19 Iir nain Mua Maneka i ona muuk unowa unum maneka yiemi ariman yia wuinon. Miiw maa muutitik ne iinan maa muutitik maa nain urufu naep kema manekiw ikaimik. 20 Moram, Mua Maneka miiw maa ne iinan maa onomakek nain eliwa ikainok naep tawerarek. Ne weetak, aakisa naap me ikomakek. Nain me wieniw naap aromakek, weetak. Mua Maneka ona maeya maa unowa nain naap samoraromakek. Nain anane naap me ikainon. Wiimar epa kirow epa-pa samorarowa marew anane eliwa naap ikainon naek. 21 Naeya maa muutitik aakisa samorarem-ikaiya nain wiimar kiiriw me samorarinon. Mua Maneka muuk teeria nainiw umep peelalowa marew, unum maneka ne parina onaiya ikaikuan, maa kuisow-ko me wia kaikinon. Ne miiw maa muutitik pun wueliwa ikomakinon.

22 Nain makena, moram i feenap amisaremik, Mua Maneka maa muutitik onomakek nain samorarep ererem-ikua. Eena wi emeria muukaru naep ererimik naap. Iiriw iiriw onoma wuak nain naap ikua, nain ekapep aakisa pun naap ikua. 23 Ne me maa nain muutiw, is pun naap, nain arewami ererem-ikok kema wiisarem-ikaimik. Makena, Mua Maneka maa eliwa yia wuap-puomak nain maep Ewar Eliwa kiikir yia sesekomaya i yiamiya ikua. Naeya ikoka Mua Maneka ona muuk teeria ariman yia wuowa nain, i kemaiw yiam tuupam-ikaimik. Iir nain i mia pun enuma yia arowinon. 24 Muut nain Mua Maneka-ke yia aawok. Ne i maa eliwa yia maek nain me urufowa ikok maimik, “Makena, i ikoka siisia eliwa urufiyen,” naap maimik. Maa maimik nain aakisa akena urufimik, nain siisia urufiyen me naimik, weetak. Maa iiriw urufamik nain-ko me arewimik, maken-i? 25 Ne aria i maa me urufowa ikemik nain urufekamik oo, naap maep kekelka ikok arewam-ikaimik.

Ewar Eliwa-ke Mua Maneka farowa yia asipiya

26 Ne maa oko pun feenap, i yiena bolonemkun Ewar Eliwa-ke yia ane-kekanowami yia asipiya. Feenap, i Mua Maneka faremi maa maakowa nain kema pinaremkun os-ke yia asipiya. O kema-pa yiar fuinem-ikok Auwa orawin yia maakomiya. 27 Mua Maneka kema wiar ookami i Yeesus teeria opora yia maakomiya. Naeya Mua Maneka eena kema tepak yiar pupep baliwep akena yiar amisarek nain Ewar Eliwa kamenap maakiya nain pun wiar amisarek.

Yeesus teeria-pa ikemik nain o sira epaskun ikemik

28 Ne i fain pun amisaremik, wi mua Mua Maneka kookalimik nain ona wia pepekimep wia fareya o teeria-pa wiar ikemik. Wi kema efar ookuk naep wia pepekimok. Ne wi nain maa kamenap wiar imenariya nain os-ke moresarep dubila kuisow wuinon. Naeya wi eliw ikaikuan. 29 Ne fain pun, Mua Maneka iiriw amisarek, wi mua kain-ke yo teeria efar ekikuan. Yiena teeria maneka nain wiena weepe iperowa Yeesus-ke wiar ikainok naep maek, “Wi teeria nain ikoka yena Muuka wameiya ikok sira epaskun ikauk.” 30 Ne oko pun feenap maep-puak, “Wi mua teeria nain wia faremkun yena teeria efar aruk. Ne wi mua wia farem nain pina wia kakenomami pina marew wia nainen. Ne wiimar wi unum maneka ne mia parina onaiya ikaikuan.” Ona naap maep sira naap oniya.

Maa unowa eliw yiar imenarinon, nain Mua Maneka-ke yia kookalem-ikaiya

31 Naapeya i nain kema suuwap kamenap maiyen? I feenap maiyen, Mua Maneka yiamiya ikaiya. Naeya mua oko-ko eliw yia samorinon-i? Weetak akena. 32 Moram ona muuka me sesekowa-ke me maek, i yia kemalep sesekak. Sesekeya ifakimiwkin umok. Nain-pa o manek akena yia asipak. Naap yia kemalep yia saalolokam-ikaiya, naapeya o me yia asipowa-ko me ikua. 33 Iiriw Mua Maneka ona yia aawep pina yia kakenomami pina marew yia naek. Naapeya ona mokok epa-pa opora-pa yia wuowa mua-ko ikemik-i? Weetak akena. 34 Ne pun naareke yia mainon, “Wi pina onow mua-ke, wi umep epa samora ikiwuk.” Weetak, naap yia maowa me pepek. Moram Yeesus Krais-ke umemi pina yia iiraromak. Ne pun, o umep ikaeya Mua Maneka-ke iikirowami ona aken ekeria-pa pokomowak. O nan ikok Mua Maneka orawin yia maakomiya. Naeya i eliwa ikemik. 35 Krais manek akena yia kookalep yia saalolokam-ikaiya. Makena, maa samora feenap nain eliw yiar imenarinon, pina imenowa, sirirowa unowa, enankowa yia erowawowa, wuailalem-ikowa, maa muutitik iiwarowa, maa anima-pa arowa, ne yia ifakimowa. Makena, maa nain naap yiar imenarem-ikainon, nain Krais-ke yia kookalem-ikaiya. 36 Ne Mua Maneka opora pun feenap wiar siisimep-puamik,

“I no muuta nain enankowa yia erowawami yia ifakimimik. I maa eneka sipsip saarik, yia ifakimowa-ke.”
(Someka 44.22)

Opora naap maek.
37 Makena sira nain eliw yiar imenarinon. Nain Yeesus Krais eena i yia kookaliya nain-ke yia asipam-ikaeya i iiwawun nomakimik. 38 Moram yo opora fain amisarep makena-ke naiyem, Mua Maneka yia kookalek nain naap yia kookalem-ikainon. Ne maa fain eliw yiar imenarinon, feenap, mokok enuma ikowa-i e umowa, wi ensel, wi ewar samora, maa muutitik aakisa ikomakek fain, e maa ikoka imenarowa nain. Wi kekanowa onaiya ikemik nain, ne maa iinan akena-pa ikomakek nain, e miiw tepak akena-pa ikomakek nain, ne maa mauwa eena Mua Maneka onomakek nain. Maa unowa nain eliw yiar imenarinon, nain Mua Maneka i yia kookaliya nain naap yia kookalem-ikainon. Moram ona Yeesus Krais sesekami o yia kookaliya nain ariman yia ofakowak.

Copyright information for `MHL