Titus 3

Maa eliwa nain eliw onowen

No anane wia maakeya wi anim onoma ne wiena uuwow mua opora wiar miimuk. Ne sira eliwa onowa kemaiw ikok naap onuk. Mua oko opor samora me wia onuk, irakowa me imenuk, ne kekelka wia wuami saria wiuk.

Is pun iiriw feenap ikemik, momor sira onam-ikemik, emina kekanem-ikok pina onam-ikemik. Wadol sira ookami sira samora ne miiw sira-sira nain kookalow manekiw ikemik. Mua wia samo-samoram-ikemik, maa kema wiar kuem-ikemik. Ne sira samora onami mua oko kema wia bagiwirowam-ikemik, ne pun anane kema bagiawiw ikemik. Ne i sira samora-pa naap ikemkun Mua Maneka-ke yia kemalep yia aawow era ariman wuami yia aawok. Nain me i sira ele-eliwa onamkun yia aawok, weetak. Ona yia kemalep pina yiar iirarek. Ne Yeesus Krais muuta nain Ewar Eliwa yia sesekomaya manek akena yia asipeya mua enuma saarik aremi kema suuwowa pun enuma aawemik. Ona yia kemalep pina marew yia naek, ni yo muuk teeria efar ikok owow iinan-pa anane ikowa nain kema manekiw ikeka naep naap onak. Aria yo opora maem nain makena-ke.

Naapeya yo feenap nefa maakiyem, nos-ke wia maakemi yo opor unowa maem nain wia kemapawam-ike. Naeya wi Mua Maneka opora wiar opimik nain sira eliwa onowa nain kemaiw ikok naap onam-ikauk. Naap onowa nain eliw akena, ne i mua yia asipiya.

Aria wi momor opora maimik nain me wiar miime, wi nembesir teeria wiam mikap ookimik nain me wiamiya aakune, oporiw me wiamiya irake, ne Moses sira wuomakek nain maemi opor oko imenuk-na wiamiya me irake. Moram opor unowa nain oram-ke, me yia asipinon. 10 Mua-ko sira nain oneya-na no maakeya nain piipuinok. Naapiw oneya-na nainiw maake. Ne opora me nefa miimap nainiw oneya-na, aa me maake, neek ikainok. 11 Makena, mua sira naap nain eliw paayarinan, oro-boonek ne sira samorak nain ikoka ariman arinon.

Opor papako

12 Aria yo Atemas e Tikikus sesekiyem. O ikiwep nefar fuuneya no era akupowa ewurare, ne era imenap-na Nikopolis ikiwe. Moram yos pun Nikopolis ikiwep, neek ikok eremin saana kerereya neekeriw ikainen. 13 Aria Senas, mua eena kot-pa opora wia asipiya nain Apolos ikos soomarimik nain wia naape. Wi maa mauwa iiwariwkin-na wieya feekiya soomaruk. 14 Aria no Yeesus teeria wia maakeya wi oram maneka me yiawem-miuk. Wi uuwowa-pa baliwep ikok wiena enowa imenam-ikauk, ne mua papako pun wia asipuk.

15 Aria wi teeria yo efamiya ikemik nain unowiya ni eliwa ikeka nia naimik. Ne yena emar unowa Mua Maneka opora wiar opimik nain wia maake, yo Pol-ke eliwa ikeka wia naiyem. Mua Maneka nia saliwami anane nia asipam-ikainok.

Copyright information for `MHL