Revelation of John 7

Isrel on mataw 144,000 nazaq God ago tow gisanib waqiy

Nagah nagan tugwahtiqan abeb ya ime a ta lehim angelo aweweqmo og ago abeqil aweweqmo nab tursa ya gibiy. In tim aweweqmo og abeqil ban sibayta na wasihim tur yaqay, tim na leheq ogib teq kamisib a hi sibad teq in ay araq a hi woldaqmo haqad. Sa teq angelo ta araq saw zeq gwalaqta ban osim bolsa ya ahol way. Na in God Kayeqmo Osaqta na ago atowun wazim ad bolyaq. Bolad in atoranmo lileyim angelo aweweq God zaway negan in og teq kamis inaq gimeqin tongo osayta na gibilan. In bilam, Ne og teq kamis teq ay hidmo hi gimeqin toniysa ham. I gigo God ago kabibiy on mataw gimaqbelab i tow emid teq ham. Ari in on mataw ganim diq gimaqbelab tow emiyta na ya hurit. Na in Jekob atatniz 12 na gigo gem bunmo gigo hib Isrel on mataw 144,000 nazaq in tow na waqiyta.

  • Juda ago gemub on mataw 12,000 nazaq tow waqiy.
  • Sa Ruben ago gemub on mataw 12,000 nazaq tow waqiy.
  • Sa Gat ago gemub on mataw 12,000 nazaq tow waqiy.
  • Sa Aser ago gemub on mataw 12,000 nazaq tow waqiy.
  • Sa Naptaliy ago gemub on mataw 12,000 nazaq tow waqiy.
  • Sa Manase ago gemub on mataw 12,000 nazaq tow waqiy.
  • Sa Simeon ago gemub on mataw 12,000 nazaq tow waqiy.
  • Sa Liway ago gemub on mataw 12,000 nazaq tow waqiy.
  • Sa Isakar ago gemub on mataw 12,000 nazaq tow waqiy.
  • Sa Zebulun ago gemub on mataw 12,000 nazaq tow waqiy. Sa Josep ago gemub on mataw 12,000 nazaq tow waqiy. Sa Bensamin ago gemub on mataw 12,000 nazaq tow waqiy.

    On mataw dauh biyahta God abin iluwiy

    Ari nagah na abeb ya saw a ta waqim on mataw dauh biyah diqmo humab wolim tursa ya gibiy. On mataw na kuluwmo diq iyan mat araq ginulin bugdaqta biyab haiq. Teq in on mataw en bunmo teq og saw bunmo teq gisan bunmo teq nan bunmo gigo asor kabemmo bolim humab nab turiyta. In tubusan husta sisaqta giholib emim teq in King ban tawontab osaqta na ayow Sipsip Amidon na inaq ginognib turad in gibenab guren anan wazim turiy. 10 Turad in atoranmo lileyeq kazaq bilaq yaqay,

    • I gigo God ban tawontab osaqta na ayow Sipsip Amidon na inaq haq yaqay,
    • in gimomo on mataw gilumsihim giwaqim giqeman ban dimuntab osayta haq yaqay.
    11 Sa angelo bunmo in King ban tawontab osaqta na teq mataw marorta 24 na teq nagah aweweq kayeqmo osayta na gililut negim turad in bunmo gibakbakan ulum laquwim turad teq in ginobun mulbunim ogib wom. Woqan in God abin tiqiluw yaqay. 12 Ad in bilaq yaqay,

    • Hel diqtaqmo haq yaqay.
    • I gigo God amomo anan i ginad dimniyan haq yaqay.
    • Ad i in abin ayahta na iluwuq haq yaqay.
    • In amomo anad awaz meqin diqta haq yaqay.
    • I in amomo wazineq esey diq uguq haq yaqay.
    • In awaz diq meqniysa ago zaway ayah diqmo haq yaqay.
    • In nazaqmo kuluwa-kuluwmo osan haq yaqay.
    • Hel diqtaqmo haq yaqay.

    Yesus ago on mataw gigo santitiy tihiqiy

    13 Ari mataw marorta 24 na gigo araq in ya kazaq susumun yag. On mataw tubusan husta sisaqta giqemiyta ko in gingan diq? ham. In edob diq boliyta? ham. 14 Haqan ya in ago gamuk amenin emim bilay, Mat ayah hay ninmo hurit hay. An in ya kazaq ibilan, On mataw ko bab gibenab afaqan teq santitiy kabemmo diq waqim sorad in giquriyam bugim teq boliyta ham. In gigo tubusan na in Sipsip Amidon anednib suholan hus diq tiqiy ham.

    15 
    • Nazaq iyan in God ago ban tawonta na anognib tituray ham.
    • Ad in taromab teq zeqab inaqmo God ago bitab osad ago kabiy emayta ham.
    • God in ago ban tawonta nab osad inmo on mataw na giwamuzad nenaq tuqosdaqta ham.
    16 
  • Osad in on mataw na giwamuzsa in gigem a ta hi moqdaq ham.
  • Teq in ginatguman a ta hi ziziqdaqmo ham.
  • Zeq a ta hi ginoysa in saw afanta a ta hi loyin daqaymo ham.
  • 17  Na ezaqgo Sipsip Amidon King ago ban tawonta anognib turaqta na inmo tigiwamuzdaqta ham. Bilaqne mat ago sipsip giwamuzaqta nazaqmo ham. Giwamuzad in giqad yuw yayibta araq mataw uluwim kayeqmo kuluwa-kuluwmo osayta nab in giqad tilehdaqta ham. Teq God in gimeqil woqaqta na suholid in a ta hi gaq daqayta ham.
    Copyright information for `MLP