2 Timothy 3

Busin ahus ond va nipaya ngeeyaata le naatok naam

Goo ganjak vakasin-anjo ni naambe vu busin taamusin ond nimeen ngeeyaata lôôt e naatok naam. Tombe omaaho ti ti ahe yoo le gaving yi, tonde ahend e gaving mone lôôt, tombe sil oo le gako sil haalend jak, osin sil gatee sil jak danjeen-ambe daanêêl hil pale, de sil e kalêêh maandin ayuuh taandin lavand. Sil-ame le daapêêlis vu hil sen davu samu sil-ato le, nganjo sil e lanji va nivasa yuuh ame naambe va malis. Sil ahend-ame le gaving halindin-aso noondin-aso daka le, de sil ahend-ame le naakuuh daka le, malis, yik sil e daanêêl vakasin anipaya jak hil noh nanye, tonde sil-ame lalohvu nambe me-le lanjakin sil daka le, nganjo yoo le lambiing navu dees vu hil lôôt, osin le lanji va nivasa pin paya. Tonde le lambu halindin landukana vaavis namand in nambe lanyiis, de pavis atombe sil lambiing va nindanjeen, tonde sil e gatee sil jak naambe sil bop, osin ahend oo le gaving liiy vaha vaha voon-ate, de ahend-ame le gaving Anutu daka le. Sil e kaasiiy sil naavind ak Anutu-te vakasin malis amu, lemu sil-ame lawii-having yite niwêêk e. Hil-anja ond goo ganoh nanye in sil.

Hil-anja sil vaalu dasengg-ambe dalakala bayêên vu vêêh sen lundkook maa-to be dalu sil nalund ak vakasin tatuhin. Vêêh-asôônju ond va nipaya ngeeyaata nawiing-ambe sil alondpayo nimeen, tombe kakook vaha vaha naanjiihin sil having. Vêêh-asôônju yoo mondango vakasin amu, lemu sil-ame lalohvu nambe lanjak vakasin keen ani le. Bôôy ond Janis ayuuh Jamblis dawiingin nambe daanggôôl Mose, om yik hil sen-anja ond dawiingin nambe daanggôôl vakasin keen. Sil alundkook la paya lung la, tonde sil-ame lalohvu vakasin keen sen yaawii-having-ato daka le, malis lôôt. Lemu hil ngeeyaata me-le lambiing gaving sil e, malis. Yik hil pin e lanji hil-anju dawiing va osin lundkook ma, naambe sen bôôy hil layi Janis ayuuh Jamblis lawiing va osin yuuh alundkook maa-to. - (1) 1 Timoti 4:1* - (2) Lom 1:29-31* - (5) Matai 7:15,21 Lom 2:19-20 Titus 1:16* - (6) Titus 1:11* - (7) 2 Timoti 2:25* - (8) Eks 7:11,22 1 Timoti 6:5*

Gamem oo sapa Anutu-te vakasin

10 Lemu hong ond gahem having sa be galak sate vakasin ani sen sa navu tatekin vu hil-anjuuto lung la, osin va pin sen sa naawiing-ato, tonde mopaatôôv sen sa navu sapaa-to, osin va sen soo aawii-having Anutu niwêêk-ato, tombe same ahekalin pavi-pavis e, nganjo soo naawiing kul vu hil lôôt. Tonde galak sa ningg nambe sahengg oo naving hil osin soo naale niwêêk-ambe naaku nimeen. 11 Tonde va nindanjeen pin sen hil dawiing vu sa osin nimeen pin sen tovu saa-to, tonde va sen tovu sa neep Antiok-ande Ikoniam osin vu Listlaa-to ond yik galak ni nambe hil lawiing nindanjeen vu sa lôôt vuu-ju, lemu Omaaho Bop oo lôôh sa vêêl in nimeen pin-anju. 12 Keen, hil pin sen lawiingin nambe lanjalak Yesu Kalisi

be lambiing va sapa Anutu kaa-to, ond omaahonôôn e lambiing nindanjeen vu sil.
13 Tonde hil anipaya osin tatuhin ambu-so le tatuhin hil, de sim Saalang oo

le tatuhin hil anipaya-sôônju, tombe mem sil pin daatu hil anipaya valok-ate.

14 Lemu hong ond gamem oo sapa vakasin sen ohango be gawii-having niwêêk-ato, in hey sen hey taahu hong-ato ond galak hey aningg lung la. 15 Tonde galak ni having nambe bôôy sen goo naahen unoopasiv-ato, ond goo monangoyin vakasin hôôk Anutu-te kaapiya be galak ni, tombe kaapiyaa-ju lohvu nambe naanggiiy hong-ambe onaatokak mopaatôôv sen galompayo na timu vu Yesu Kalisi in nambe mem Anutu gako hong naah vu yii-to.

16 Yik Anutu-te vakasin pin sen lukaneep kaapiyaa-to ond Anutu yoo vu vu hil-ambe sil kaavu, tombe vakasin-anjo ond nivasa lôôt in nambe tatekin vakasin keen vu yiiy, tonde taato yate va nipaya vu yiiy, osin

naanggiiy yiiy dukanaah Anutu-te mop, tonde taahu yiiy hôôk va nivalok.
17 Om mem yiiy sen yaatu Anutu-te hil-ato, ond yiiy oo aatu hil aniwêêk lung la be yaalohvu lôôt in nambe yaambiing kul anivasa pin. - (11) Sinaale 13:50 14:5,19 Saam 34:19* - (12) Matai 16:24 Jon 15:20 Sinaale 14:22* - (14) 2 Timoti 2:2* - (15) Jon 5:39* - (16) Lom 15:4 2 Pita 1:21* - (17) 2 Timoti 2:21*

Copyright information for `MMO