Acts 16

Pol hatup hôôk kul tu balon yuuh

Pol ayuuh Silas latok lala Debi osin Listla, tombe sim yuuh latokak Yesu-te omaaho ti vuu-ju haale nambe Timoti, ond tangganaan vêêh Yuda ti wii-having Yesu de mangganaan vu Glik**. Tombe Omaaho Bop-ate hil vu Listla osin Ikoniam lanêêl vu Pol nambe, “Timotii-ju omaaho nivasa.” Tombe Pol wiingin nambe Timoti na gaving yi, om hako be la halaah ninaavi in nambe hil Yuda sen dandôô-juuto lanji Timoti naambe Yuda keen ti, in sil pin lalak ni nambe mangganaaname Yuda ti le. Tonde mem yaal latup hôôk bayêên ti ti be yaal lanêêl tanasin sen sinaale-so himbop-aso lanjôôy lung la vu Yelusalem-ato vu Yesu-te hil pin nambe, “Yik ham oo taamuyin-anja.” Tombe mem hil bel-ate lawii-having niwêêk lôôt-ambe datu ngeeyaata nalak busin pin. - (1) Sinaale 14:6 2 Timoti 1:5* - (2) Pilipai 2:19-22* - (3) Galata 2:3-5* - (4) Sinaale 15:23-29* - (5) Sinaale 2:47*

Pol yi omaaho ti vu Makedonia

Vavi Vaambuung nêêlin yaal nambe yaal-ame daanêêl tanasin vu hil Esia le, om yaal lala taaku Plisia yuuh Galata. Yaal lato ngaaho vu Misia be yaal lawiingin nambe lana Bitinia, le sim Yesu-te Vavi Vaambuung nêêlin yaal, om yaal laloh mop Misia be latok lala Toloas. Tonde busin atombe Pol yi taahu taahu ti, ond yi de omaaho ti vu Makedonia naale be kataangg yi nambe, “Ganjakanaam lôôy vaalu in gandôôvu hey vu Makedonia.” 10 Pol yi taahu taahuu-ju lung la, tonde sa having yaal-ambe hey salo mop in nambe hey ana Makedonia pavis, in hey alak ni nambe Anutu teey hey in nambe hey ana naanêêl banye nivasa vu sil. - (6) Sinaale 18:23*

Lidia hilin lopayo

11 Om sip hako hey vu Toloas-ambe la nivalok vu Samotles, tombe hey naahop-anju be heendiiy e mem hey aatok ala Niapolis, 12 tombe sim hey hatup voon vuu-ju be hey aatok ala hil Lom-ate taaku Pilipai sen tu Makedonia-te taaku bopaataa-to, be hey nando busin heey vuu-ju. 13 De busin sawaasin atombe hey aaloh taaku nanyendangga be hey ala hato bel ti, in heyaambe mak taaku sen Yuda dasupin osin dalohak hôôk-ato neep-anju, tombe sim hey aatokak vêêh heey lasupin-ambe dando, om hey hato nando having sil-ambe hey vakaas vu sil. 14 Tombe vêêh ti vu taaku bop Taiataila haale nambe Lidia, de yite kul nambe navu tôômb amembu be hil daanggo vu yi, ond vêêh-anju nalohak vu Anutu lak busin pin, om Omaaho Bop wiing-ambe lopayo ahelavis ak, de yoo wii-having vakasin sen Pol nanêêl-ato. 15 Om lipis bel having yite hil, tonde kataangg hey-ambe nêêl niwêêk nambe, “Ham sahi nambe saawii-having Omaaho Bop keen ond ham andukanaam mando dôôk sate bayêên.” Om hey ala nando having yi. - (15) Sinaale 16:33 18:8*

Latung Pol ayuuh Silas hôôk kalaambus vu Pilipai

16 Busin ti hey ala in nambe ana taaku sen dalohak nandôô-to, tombe vêêh kul vaha malis ti tovu hey vu mop. Vêêh-anju mamu nando having yi, om nanêêl vakasin sen nôôn jak vu taamusin-ato langaah, tombe hil daanggo yi om yite yêêv-aso daluh mone bopaata. 17 Ond vêêh-anju laam-ambe navu taamuyin hey o Pol-aso, tombe nateey lôôt nambe, “Hil-anja latu Anutu baandoni-te hil kul vaha-so om danêêl Anutu-te samu samu sen gako ham jak-ato vu ham-anja.” 18 Vêêh-anju yoo monateey nambêênju lak busin pin tombe Pol ahekalin ak, om hilin-ambe nêêl vu mamu sen lukando vêêh-ato nambe, “Sa naanêêl vu hong jak Yesu Kalisi

haale naambe onggavuuh vêêh-anja de gana.” Tombe mamu hato la in vêêh-anjuuto pavis.

19 Tombe sim vêêh-anjute yêêv-aso layi nambe me-datovu mone laah e, om lalôôh Pol ayuuh Silas-ambe laandiiy yuuh lala talind vu yêêv bop-aso, 20 tombe lako yuuh lala vu yêêv-aso be lanêêl nambe, “Omaaho yuuh-anja yuuh Yuda om yuuh lawiing-ambe hil-ame dando nivasa le, 21 yuuh danêêl vakasin lak gambum sen me-lohvu in nambe yiiy Lom sapa hôôk-ato le.” 22 De yik hil bayêên-anju lanêêl vakasin ak yuuh having, om yêêv-aso lakaah yuuhate lolop, tonde lanêêl nambe hil gaveek yuuh. 23 Om laveek yuuh lôôt, le mem latung yuuh

lukala kalaambus, de lanêêl niwêêk vu omaaho sen nanggin kalaambus-ato nambe yoo ganggin nivasa.
24 Tombe yêêv kalaambus hango de lanêêl niwêêk nambêênju vu yi, om la hatung yuuh la bayêên alo sen neep lavuun-ato, le mem having yuuh vahand lak haah.

25 Tonde la busin lavuun atombe Pol ayuuh Silas lalohak-ambe lawiing laalo vu Anutu, be kalaambus-aso pin deep dangoyin. 26 Tonde jemaapi bopaata ti valup pavis-ambe taapinin ak bayêên kalaambus lôôt, tombe sim pavis atombe vinavi pin hataahin osin hees aniwêêk sen sil talu kalaambus-aso lak-ato kavaayin pin. 27 Tombe yêêv kalaambus kandi le yi nambe vinavi pin hataahin, tombe sim ka vu nambe mak kalaambus-aso pin lapak-ambe lala, om hatul yite yipak in nambe yoo nyiis yi be jimb, 28 lemu Pol teey bopaata lôôt nambe, “Êê, game ganyiis hong e, hey pin oo nando.” 29 Tombe yêêv-anjuuto teey-ambe sil taalungg kin la, tonde hatup-ambe lukala bayêên kalaambus alo be la hato pataav baambu neep voon-ambe monahees hôôk Pol ayuuh Silas vahand. 30 Tonde hako yuuh-ambe la voon, le mem lingin yuuh nambe, “Himbop ayuuh, saambiing vaati in nambe Anutu gako sa jak?” 31 Le yuuh lanêêl nambe, “Galompayo na timu vu Omaaho Bop Yesu ond mem Anutu le gako hong jak gaving vanem o noom-aso.” 32 Tonde yuuh lanêêl Omaaho Bop-ate tanasin vu omaahôô-ju osin hil pin sen dando having yii-to. 33 Tombe yik hôôk busin-anju omaahôô-ju hako yuuh-ambe la lipis payêês sen laveek yuuh-ato, tonde yuuh lalipis yi having yite hil pin pavis lak Yesu haale. 34 Tonde hako Pol ayuuh Silas-ambe lalakala yite bayêên, be vu vanôôn-ambe yuuh laya, de having yite hil pin sen sil dando hôôk bayêên tii-to be lapêêlis lôôt in lawii-having Anutu.

35 Tonde langaah ak atombe yêêv-aso lawiing ahevaavu heey lato be lanêêl vu yêêv kalaambus nambe, “Onggataahin vinavi in omaaho yuuh-anjaato be yuuh lana.” 36 Tombe yêêv kalaambus laah nêêl vakasin-anju vu Pol ayuuh Silas nambe, “Yêêv bop-aso lawiing vakasin laam nambe sa gataahin vinavi de mana, om muuh gato ana osin malompayo melaas.” 37 Le Pol nêêl vu ahevaavu-so nambe, “Haay-anjo haay Lom
Sinaale 16:37 *Hil Lom vaalu ond sil vu Lom nivalok, de vaalu ond sil-ame Lom nivalok e. In omaaho ti wiingin nambe gako haale Lom ond baanggo jak mone bop, tonde silate gambum ango neep nambe yêêv Lom ji omaaho ti nivasa ond naanêêl haale Lom jak yi. De Pol ond yi Yuda lemu mangganaan ayuuh tangganaan lako haale Lom lung la, om Pol ond yi Lom having. Gangge Sinaale 22:27-28
, le yoo laveek haay lak hil pin amend, de latung haay hôôk kalaambus malis amu, de me-latovu haayanêêngg vakasin ti le, ma. Le nambe tana sen davu lambiing-ambe haay gato ana kaatokin-anjo, malis lôôt. Yoo lanaam-ambe gako haay ana ond mem.”

38 Tombe ahevaavu-so lako vakasin-anjo be lalaah lanêêl vu yêêv bop-aso, tombe yêêv-asôônju lango nambe yuuh Lom, om layêênin lôôt. 39 Tombe sil lato be samu vakasin osin melaas vu yuuh vêêl e mem lako yuuh-ambe lato lala voon, tonde sil kataangg yuuh nambe yuuh gavuuh taakuu-ju de yuuh lana. 40 Om Pol ayuuh Silas lavuuh bayêên kalaambus-ande yuuh lala Lidia baan, tombe yuuh lakaas having Omaaho Bop-ate hil-ambe yuuh kaandu sil lak tanasin vêêl e mem yuuh lala. - (16) Sinaale 19:24* - (17) Maak 1:24,34* - (18) Maak 16:17* - (20) Maak 13:9 Sinaale 17:6 Matai 5:11* - (22) 2 Kolint 11:25 Pilipai 1:30 1 Tes 2:2* - (27) Sinaale 12:18-19* - (30) Sinaale 2:37* - (33) Sinaale 16:15* - (37) Sinaale 22:25* - (39) Matai 8:34*

Copyright information for `MMO