Acts 2

Vavi Vaambuung lukalaam voon

Hôôk busin Pentikos** tombe sil pin lavuh ti be dando, de pavis atombe daandun ti laam vu baandoni nambe sen vavi jambaa-to be lohvu bayêên alo sen dando hôôk-ato. Tonde layi vati nambe kin dalaan-ato laam-ambe nando lak sil ti ti pin, tonde Vavi Vaambuung lukala sil alondpayo lôôt, be lakaas bayêên bu ti ti lavand lohvu Vavi Vaambuung oo wiing-ambe sil lakaas-ato.

De hil Yuda vu taaku pin sen kand navu sapa Anutu be lala dando Yelusalem-ato, ond lango daandun-anju tombe sil pin lasupin lalaam-ambe daale dango de sinaale-so dakaas sil sen daalêê-jôôto lavand ti ti, om lavindis lôôt. Sil pin lavindis-ande kand yu-yuuh lôôt-ambe lanêêl nambe, “Ham gango. Hil pin sen dakaas-anjo sil vu Galili me malis? Nambe vaati om yiiy nango de dakaas yiiy lavangg sen ataak-aso lako yiiy-ambe yiiy nakaas-ato? Yiiy vu taaku Patia, de Midia de Ilam, osin yiiy vu Mesopotemia de vu Yudia, de vu Kapadosia yuuh Pontas de Esia**, 10 de vu Plisia, Pampilia, osin Ijip, de vu Libia vahaan sen ngaaho vu Sailinii-to, de yiiy vu Lom sen yalaam nandôô-jo. 11 Yiiy Yuda de hil vaalu sen lako Yuda-te gambum-ato, de yiiy vu Klit osin Alebia, yiiy pin hango de danêêl va bopaata sen Anutu wiing-ato langaah hôôk yiiy lavangg ti ti.” 12 Om sil pin lavindis lôôt-ambe kand yu-yuuh, tombe yoo lanêêl vu sil nambe, “Vaa-jo dangga nambe vaati?” 13 Lemu vaalu danêêl sil pale nambe, “Ma-o, lanum wain moos ngeeyaata lôôt.” - (1) Lev 23:15-21 Diu 16:9-11* - (3) Matai 3:11* - (4) Sinaale 4:31 10:44-46 Sinaale 19:6 Maak 16:17* - (7) Sinaale 1:11* - (9) 2 Timoti 1:15*

Pita nêêl vakasin

14 De Pita naale having sil nomaayuuh-ambe laam tii-to tombe nêêl bopaata vu hil pin nambe, “Ham Yelusalem de ham Yuda pin, sa tatekin vaa-jo vu ham-ambe ham gango le. 15 Hamambe hil-anjo lanum wain ngeeyaata? Malis lôôt. Manyinjo naahen samiinaanôôn-anjo, 16 lemu Joel-ate vakasin bôôy-ato nôôn ak nambe,

17 
  • ‘Anutu nêêl nambe, “Vu busin taamusin e mem sale aambiing-ambe sate Vavi Vaambuung jakana hil pin, be noom-aso nomaavêêh-aso le daanêêl vakasin langaah, de hamate himbop-aso le lanji mavin, tonde hamate maanggêêm-aso le lanji taahu taahu.
18 Keen, hôôk busin-anju sale aambiing sate Vavi Vaambuung jakana sate hil moow osin vêêh in daanêêl vakasin langaah. 19 Tonde sale aambiing taahu taahu bopaata vu yendak osin saambiing taahu taahu niwêêk vu voon. Nihees de kin osin ahelu, 20 de taaku mekaalus e mekanu dôôk, tonde kwaav e nihees dôôk vêêl e mem Omaaho Bop-ate busin bopaataa-to naatok naam. 21 Tombe hil pin sen lavand nahôôk Omaaho Bop haalêê-to ond le dôôvu sil.’” 22 “Ham Islel, ham gango sate vakasin-anjo le, naambe Yesu Nasaalet ond ham alak ni nambe Anutu taato yi vu ham lak taahu taahu bopaata osin niwêêk vaha vaha, de kaandu yi be wiing vu ham ambaam-ato. 23 Vu bôôy ond Anutu yoo ka vu be samu vakasin lung la le mem vu Yesuu-jo lukala ham namam, tombe sim ham avu yi lukala hil sen me-lawii-having tanasin-ato namand-ambe layiis ak haah pako be yimb. 24 Le sim Anutu vu vêêl yi in nivaane yimbin-ate de wiing-ambe kandi lak laah, de yimbin-ame lohvu nambe naapuvu yi lôôt e, 25 in Devit nêêl vakasin lak yi nambe,

  • ‘Saahe Omaaho Bop naale sa mengg osin sa namangg vasa lak busin pin in nambe vati me-le biing-ambe saandupake le.
26 Om nambêênja sa longgpayo nivasa de sa dalaangg naapêêlis vu Anutu, de sa ningg naavi mando mongganggin va nivasa, 27 in game le gavuuh sa kanungg na mando hil yimbin-ate taaku lôôt e, de game le gambiing-ambe gate Omaaho Vaambuung naavi panyek e. 28 Otaato mopaatôôv sen sa mando metumin-ate lung la vu sa, de gale mando gaving sa om sale naapêêlis lôôt.’ 29 “Halingg-aso, sa naanêêl langaah vu ham naambe yate himbop Devit yimb bôôy-ambe lahaav, de yite bandumb neep hôôk yiiy lavuun-ambe gêên-anjo. 30 Devit-anjo yi omaaho sen nanêêl Anutu-te vakasin langaah-ato be yoo lak ni nambe Anutu nêêl vu keen baandoni nambe, ‘Sa navu aambiing-ambe gate hil vu taamusin-ato ti le gako haale lulemak dukanaah gahembaan.’ 31 Ond Devit oo lak ni munggin ondeey nêêl vakasin lak omaaho sen Anutu yoo holin yi vulôôt in nambe dôôvu yiiy-ato nambe le kandi jak naah, om nêêl nambe, ‘Anutu me-havuuh yi la nando hil yimbin-ate taaku lôôt osin ninaavi me-panyek e.’ 32 Ond Yesuu-ja, Anutu wiing-ambe kandi lak-ambe hey pin aahe yi lung la ondeey hey naanêêl langaah-anjo. 33 Om gêên Anutu hako lakalaah baandoni be la nando nama vasa lung la, de wiing Vavi Vaambuung sen Mangganaan nêêl vu yii-to lom-ambe Vavi Vaambuung yoo wiing va sen ham nahe osin ham nangôô-to. 34 Devit-ame la baandoni le, lemu Devit nêêl nambe,

  • ‘Omaaho Bop nêêl vu sate Omaaho Bop nambe, “Omando sa namangg vasa,
35 de sale aambiing-ambe hil sen dayi hong payaa-to le langgulis hong vaalu kambi.” ’ 36 “Om ham Islel pin ond yanjak ni vanuh naambe Yesuu-jo sen ham ayiis ak haah pakôô-to, ond Anutu wiing-ambe tu Omaaho Bop osin omaaho sen Anutu yoo holin yi vulôôt in nambe dôôvu yiiy-ato.” - (17-21) Joel 2:28-32* - (21) Lom 10:13* - (22) Jon 3:2* - (23) Sinaale 4:28 1 Pita 1:20* - (24) Sinaale 3:15* - (25-28) Saam 16:8-11* - (27) Sinaale 13:35* - (29) 1 King 2:10 Sinaale 13:36* - (30) 2 Sml 7:12 Saam 89:3-4 132:11* - (31) Saam 16:10* - (32) Sinaale 1:8* - (33) Maak 16:19 Sinaale 1:4 7:55-56 1 Pita 3:22* - (34-35) Saam 110:1* - (36) Sinaale 5:30-31*

Hil ngeeyaata lahilin londpayo de lalipis bel

37 Hil lango vakasin-anjo be la hanggwang sil alondpayo, tombe lanêêl vu Pita having sinaale-so nambe, “Halingg-aso, hey aambiing vaati peey?” 38 Le Pita nêêl vu sil nambe, “Ham anggilin ham alompayo de ham pin anjipis bel jak Yesu Kalisi** haale in kawiiy hamate nipaya na, le mem Anutu le biing Vavi Vaambuung naas vu ham. 39 Yik Anutu yoo nêêl nambe bu vu ham o noom-aso osin omaahonôôn pin vu taaku diin. Keen, yate Omaaho Bop Anutu nêêl lung la nambe le bu vu hil pin sen teey

sil-ato.”

40 De Pita nêêl tanasin ngeeyaata lôôt vu sil, osin vu kôôvu sil nambe, “Ham ganggin ham in hil anipayaa-ja.” 41 Tombe hil sen lawii-having Pita-te vakasin-ambe lalipis bel-ato ond sil ngeeyaata lôôt lohvu 3 taosen lalukalaam having Omaaho Bop-ate hil hôôk busin tii-ju. - (37) Luk 3:10,12 Sinaale 16:30* - (38) Luk 24:47 Sinaale 3:19* - (39) Ais 57:19* - (40) Diu 32:5 Pilipai 2:15* - (41) Sinaale 2:47 4:4 5:14*

Kalisi-te hil

42 Hil-anju yoo dangoyin sinaale-sote tanasin, de sil alondpayo lavuh ti be daya vanôôn hôôk ti osin dalohak navuh ti. 43 Tombe yik hil pin layêênin lôôt in sinaale-so lawiing taahu taahu ngeeyaata lak Anutu-te niwêêk. 44 Tonde hil pin sen lawii-having Yesuu-to dando lavuh ti, de va sen silate vaa-to ond sil pin-ate va. 45 Tonde lavu silate ngaanggis ayuuh kupak-ambe hil laanggo de lako mone be lala latiiy vu hil sen dativak in va yuuh amêê-to. 46 De sil lavuh ti be dala Anutu-te dumb bop alo lak busin pin, tonde daya vanôôn hôôk sil ambaand ond daya osin ahend anivasa be dapêêlis, 47 de sil lavand nahôôk Anutu tombe hil pin dayi sil anivasa, de Omaaho Bop oo nahilin hil vaalu londpayo nalak busin pin-ambe dalukalaam having sil. - (42) Sinaale 20:7* - (43) Sinaale 5:11-12 6:8* - (44-45) Sinaale 4:32-35* - (46) Luk 24:53* - (47) Sinaale 2:41 6:7 11:21,24*

Copyright information for `MMO