Hebrews 1

Anutu vu vakasin vu Noow-ambe nêêl vu yiiy

Vu bôôy ond Anutu nêêl vakasin ngeeyaata vu hil sen danêêl yite vakasin langaah-ato lak mopaatôôv vaha vaha be lanêêl vu yate himbop-aso bôôy, le sim busin taamusin sen gêên-anjo tombe Anutu yoo vu vakasin vu Noow-ambe nêêl langaah vu yiiy. Yik Noow-anju sen Anutu nêêl-ambe yoo hatung yendak osin ngaanggis pin, tombe holin yi be mem vu va baandoni osin voon pin lukala nama. Yik yii-ju Anutu-te melangaah nikaapulis-ate, tombe yik ni nambe Anutu keen-ato, de yoo navu kaandu va pin sen hatung-ato lak yite vakasin aniwêêk. Yoo kawiiy hil-ate nipaya lung la, de laah nando having Anutu sen niwêêk danggakook-ato ond nando nama vasa having yi vu baandoni. - (2) Saam 2:8 Matai 21:38 Jon 1:3 Kolosi 1:16* - (3) 2 Kolint 4:4 Sinaale 2:33-34 Kolosi 1:15 Hiblu 8:1*

Anutu Noow savok angela-so

Ke, om Anutu Noow tu bopaata lôôt-ambe savok angela-so la, tonde yik hako haale bopaata vu Anutu be savok sil haalend la. Lohvu Anutu nêêl nambe,

  • “Sa noongg hong in gêên soo hako hong.”
Tonde yik nêêl ango nambe,

  • “Sale naatu yite mangganaan, de le naatu
  • sa noongg.”
Mak naangelis Anutu nêêl vakasin-anjo lak angela ti? Malis.
Yik busin sen Anutu navu biing nowaatuk timu dukanaam voon-ato ond mem nêêl nambe,

  • “Sate angela pin yoo gatung kaatu vu yi.”
Tonde nêêl ak angela-so nambe,

  • “Sa samu sate angela-so nambe vavi, de
  • sa naawiing-ambe sil lalohvu kin dalaan.”
Tonde sim nêêl angôô-jo lak Noow nambe,

  • “O Anutu, gatu omaaho lulemak-ambe goo le mando mongganggin gate hil jak vakasin anivalok danggata osin danggata.
In gahem oo having va nivalok amu, de ganimbaya vakasin kalêêsin, ondeey yik sa sen gate Anutu saa-to ond saaholin hong, tombe saawiing-ambe gakam vasa lôôt savok gate hil pin.” 10 Tonde nêêl boow ango yesin laah nambe,

  • “Omaaho Bop, goo hatung ngaanggis vu munggin, tombe yik osamu yendak ak onamam having,
11 lemu yendak osin ngaanggis e na menama pin, nganjo hong ond le nama, goo nando in mando danggata-te. De yendak osin ngaanggis ond le nimbôôy jak naambe lolop animbôôy ak-ato, 12 tombe gale baahinin naambe sen hil daahinin tôômb-ato, de gale ganggilin va naatu moos dukanaah naambe sen hil dalop lolop moos lukalaah sil-ato. Lemu hong Omaaho Bop, goo le mando naambêênja danggata lôôt, de game le tata jak e.” 13 In bôôy Anutu nêêl nambe,

  • “Omando sa namangg vasa gaving sa de sale aambiing-ambe hil sen dayi hong payaa-to le langgulis hong vaalu kambi.”
Tombe mak Anutu nêêl vakasin-anjo vu angela-so ti? Malis.
14 Angela-so pin ond sil latu Anutu-te va kul-ate, tombe Anutu nawiing-ambe sil dala in nambe landôôvu hil sen navu gako sil lanom vu yii-to. - (4) Pilipai 2:9* - (5) Sinaale 13:33 Hiblu 5:5 2 Sml 7:14 Saam 2:7* - (6) Lom 8:29 Saam 97:7* - (7) Saam 104:4* - (8) Saam 45:6-7* - (10) Saam 102:25-27* - (13) Saam 110:1* - (14) Saam 34:7 91:11*

Copyright information for `MMO