Hebrews 13

Yahengg oo gaving halingg-aso

Ham sen ham atu Kalisi-te hil lung laa-to ond ham ahem oo monggaving mango-so. Tonde vaatêêvak-aso ond ham gako sil lanjakana hamate bayêên-ambe ham ganggin sil nivasa, in hil vaalu

lako vaatêêvak-aso lak nambêênju bôôy, tombe silate vaatêêvak-asôônju ond sil angela, lemu hil-anju doosin,

in sil akand vu nambe manyinjo omaahonôôn heey.

De ham akam oo bu mango-so sen dando hôôk kalaambus-ato be ham baaku nimeen gaving, yik nambe sen ham ahondoos oo nando hôôk kalaambus-ato. Tonde ham oo kam pasiv in hil sen vaheey dawiing nindanjeen vu sil-ambe nind naavi nango nivaane lak Kalisi haalêê-to, in yik ham ahondoos anim naavi voon-ate neep ti.

De ham moow ayuuh vêêh pin sen ham hako ham lung laa-to, ond ham amem oo sapa ham nivasa, de ham-ame ambiing va nipaya le. In taamusin ond Anutu le bu nipaya nyevahaan dukanaah vu hil sen dawiing kand yuuh-ato osin vu hil baayamb.

Tonde ham-ame ambiing menôôn in mone le, nganjo va sen nando vu ham-ato ond ham alompayo nivasa naambe lung, in Anutu nêêl lung la nambe, “Same le gavuuh hong e. Keen, same le galuuh damingg vu hong e, malis lôôt.” Om yik yiiy oo naanêêl osin yalonggpayo timu naambe,

  • “Omaaho Bop oo nahôôvu sa om same le aanjêênin e, in hil e lambiing vaati vu sa?” - (1) Jon 13:34* - (2) Lom 12:13 1 Pita 4:9 Jen 18:1-8 19:1-3* - (3) Matai 25:36 Hiblu 10:34* - (4) Galata 5:19,21 Epesas 5:5* - (5) 1 Timoti 6:8 Diu 31:6,8 Jos 1:5* - (6) Saam 118:6*

Yiiy oo sapa hôôk yêêv-aso bôôy vahand

Ham akam oo bu hamate yêêv-aso bôôy sen lanêêl Anutu-te vakasin vu ham-ato, osin ham akam bu silate mopaatôôv sen sil sapa be silate kul nôôn ak-ato, tombe yik ham sapa sil vahand-ambe ham ambiing gaving naambe sen sil dawii-having-ato. In Yesu Kalisi yoo nawiing va nivalok amu vasêên-ande gêên-ambe danggata osin danggata. Hil vaalu-te kakook vaha vaha le balup, lemu ham-ame sapa de ham gavuuh Anutu-te mopaatôôv e, nganjo Anutu-te samu samu kaandu ham alompayo ond mem nivasa, de yalonggpayo me-gako niwêêk vu tanasin sen lak vahivak vaha vahaa-to le, in hil sen davu sapa hôôk tanasin lak vahivak ayuuh amêê-to ond me-nahôôvu sil e. - (7) 1 Kolint 4:16 Hiblu 6:12* - (9) Epesas 4:14 Lom 14:17*

Salivangin anivasa sen Anutu nawiingin-ato

10 Yesu tu yate salivangin in nambe kawiiy yate va nipaya naa-to, lemu hil sen davu samu dumb sel-ate kul-ato ond me-lalohvu nambe gako yate salivangin-anju daka be lanja le. 11 Tonde kul vaha sen datung salivangin-ato ond silate yêêv bop nako bik sipsip osin kao nihees-ambe nalukala dumb alopayo ti sen vaambuung-ato be mem natung salivangin in nambe kawiiy nipaya na, tonde bik naavi sen taahu taahu lak omaahonôôn-ate va nipayaa-to ond dako be lala dasi lak kin vu taaku nanyendangga be navu tapuv la. 12 Ondeey Yesu ond yik hako nivaane be yimb ak haah pako neep taaku nanyendangga, in nambe yite nihees kawiiy omaahonôôn-ate va nipaya na. 13 Om yik yiiy having, yana taaku nanyendangga be yiiy baaku nimeen gaving Yesu. 14 In yalak ni nambe yambaangg dangga dosin-ato me-neep vu voon-anjo le, nganjo yiiy oo monaawiingin yambaangg keen sen yoo naahen-ato. 15 Om yiiy oo naapêêlis na vu Anutu lak Yesu haale, tombe pêêlisin-anjo yaambu vu Anutu naatu salivangin jak busin pin, tonde yavingg oo gako haale jak. 16 Tonde ham akam-ame jingin samu samu osin ngaatum sen ham andôôvu mango-sôôto le. Yik va sen nando vu ham-ato ond ham ambu vaalu na in dôôvu hil sen dativak in va yuuh amêê-to, in Anutu yoo nawiingin samu samuu-ju nambe salivangin anivasa.

17 De hamate yêêv-aso ond dahôôvu ham-ambe danggin ham lohvu busin pin, tonde taamusin ond sil e tatekin kul pin sen dawiing vu ham-ato vu Anutu, om yik ham oo nanyem vuun vu sil-ambe ham anggulis sil baambund. Ke, ham ambiing naambêênjo ond mem sil e lambiing silate kul lôôt osin kand vasa, tombe vaa-ja le samu ham nivasa, de sil alondpayo me-le nimeen e. - (11) Lev 16:27* - (12) Matai 21:39 Jon 19:17* - (13) Hiblu 11:26 12:2 Matai 7:13-14* - (14) Hiblu 11:10,16 12:22* - (15) 2 Kro 29:31 Saam 50:14,23 Hos 14:2* - (16) Pilipai 4:18* - (17) Esi 3:17 1 Tes 5:12*

Ham anohak in Anutu dôôvu hey

18 Ham akam oo bu hey hôôk lohakin, in hey alak ni nambe hey alonggpayo yoo neep nivalok hôôk Anutu me, in hey naawiingin nambe hey aambiing va nivalok amu jak busin pin. 19 Om sa kataangg ham naambe ham anohak in Anutu dôôvu sa be saanos balu-vu ham pavis.

20 Anutu sen vakasin melaas danggakook-ato ond wiing-ambe yate Omaaho Bop Yesu kandi lak vu hil yimbin-ate. Yesuu-ju ond tu bik sipsip-asote heendin bop lak sen kaasêêh yite nihees-ambe wiing vakasin sen Anutu jôôy-ato neep niwêêk. 21 Ond Anutuu-ju yoo biing samu samu nivasa vasa pin vu ham, in nambe ham ambiing va nohvu sen ka navuu-to, tonde biing-ambe Yesu Kalisi-te kul nôôn jak hôôk yalonggpayo, nohvu sen Anutu nayi nivasaa-to, tombe mem yiiy gako Yesu Kalisi haale jak naatu bopaata be nanjip danggata osin danggata. Keen. - (18) Sinaale 24:16 2 Kolint 1:12* - (20) Sek 9:11 Ais 55:3 Jer 32:40 Esi 37:26 1 Pita 2:25*

Vakasin ahus

22 Halingg-aso, sa naanêêl niwêêk naambe ham oo gatung nanyem in vakasin sen sa naanêêl in nambe kaandu ham ak-anjo, yik kaapiya sen sa kaavu laas vu ham-anja ond yik ngaaho daka mu. 23 In saawiingin nambe ham anjak ni naambe sil kavaayin yiiy halingg Timoti de me-nando hôôk kalaambus laah e, om naambe naatok balu-vu sa pavis ond mem haay ahondoos e anaas aangge ham.

24 Ke, om ham naanêêl sa lavangg samu samuu-jo vu hamate yêêv-aso pin osin ham naanêêl vu Anutu-te hil. Tonde hil sen latu Kalisi-te hil-ambe dando Itaali nganjôô-to lanêêl vakasin samu samu laas vu ham having.

25 Yik vakasin lung laa-ja. Anutu-te samu samu naas mando gaving ham pin.

Copyright information for `MMO