Hebrews 2

Anutu hako yiiy lom-ato ond manyinjo va bopaata ti keen

Om vakasin sen yiiy hangoyin-ato ond yakangg bu be yiiy oo naapuvu niwêêk, de yame yanitambo jak-ambe yiiy gavuuh na le. In bôôy ond Anutu vu vakasin vu angela-so be lanêêl langaah, tombe vakasin-anju ond nôôn keen, om hil pin sen nanyend doos-ambe sil kalêêh vakasin-anjuuto ond lako nipaya nyevahaan ak. Lemu gêên ond Anutu hako yiiy lom, tombe manyinjo va bopaata ti keen lôôt, om naambe yiiy galuuh damingg vu va bopaataa-ju ond yale napak in yate nipaya nyevahaan-ambe yana tana? Malis. Yik Omaaho Bop oo nêêl vakasin munggin nambe le gako yiiy nom, tombe hil sen lango yite vakasin-anjuuto ond lanêêl langaah vu yiiy nambe vakasin-anju keen lôôt. Tonde yik Anutu yoo

kaandu vakasin-anju lak sen vu niwêêk vu yite hil-ambe lawiing taahu taahu ngeeyaata osin niwêêk, osin hatiiy Vavi Vaambuung-ate niwêêk kul-ate nyemalis amu vu hil lohvu yoo ahe having-ato. - (2) Galata 3:19* - (3) Hiblu 10:29 12:25* - (4) Maak 16:20 1 Kolint 12:4,11*

Yesu tu yate omaaho sen hako yiiy lom-ato danggakook keen

Kul sen ganggin omaahonôôn nohvu taaku pin sen yiiy nakaas in-anjo, ond Anutu me-vu kul-anjo lukala angela-so namand e, malis. In omaaho ti kaavu boow ti neep hôôk kaapiya be nêêl langaah nambe,

  • “O Anutu, omaahonôôn ond sil vaati ondeey gakam navu sil? De omaahonôôn noondin ond sil vaati ondeey onanggin sil nivasa?
Le sim olaanggôôl omaahonôôn-ambe haalend pasiv de angela-so haalend bop savok omaahonôôn la daka, le ma de gavu nikaapulis osin haalend bop vu sil-ambe mem ohako sil lak, tonde gawiing-ambe va pin lahulis sil vaalu kambi in nambe sil oo ganggin pin.” Keen, Anutu hatung va pin lahulis omaahonôôn baambu, de me-havuuh vati be nando malis in nambe me-gulis baambu le, lemu gêên yaahe nambe va pin-ame lahulis omaahonôôn baambu le, malis. Nganjo Yesu ond mem, in yaahe nambe Anutu laanggôôl Yesu be haale pasiv de angela-so haalend bop savok yi daka vêêl e, tombe hako nivaane be yimb, le sim gêên Anutu hako yi lak-ambe vu va nikaapulis-ate vu yi, osin wiing-ambe haale tu bopaata lak. Keen, Anutu-te samu samu bopaata ondeey Yesu yimb in dôôvu hil pin.

10 De Anutu sen yoo hatung va pin-ambe va pin danggakook yii-to, ond nawiingin nambe naanggiiy hil ngeeyaata lana vu yi in sil daatu yite noow-aso be gako yite nikaapulis. Om yoo wiing va lohvu be vu nivaane vu Yesu, tombe nivaanêê-ju wiing-ambe Yesu tu omaaho nyemalu nivasa nôôn in nambe gako sil nom.

11 Ke, Yesuu-ju nawiing-ambe hil datu vaambuung, tombe yoo having hil pin sen nawiing-ambe sil datu vaambuung-ato, ond sil ahondoos pin maandin timu, ondeey Yesu nanêêl sil nambe yite halindin, de me-yi

sil nambe va malis-ambe natu ka in sil e.
12 Tonde nêêl nambe,

  • “O Anutu, sale naanêêl ohaalem langaah vu sa halingg-aso. Keen, sale aambiing laalo in sa gako ohaalem jak dôôk hil bel-ate lavuun.”
13 De yik nêêl ango laah nambe,

  • “Sa longgpayo le na timu vu Anutu keen.”
Tonde sim nêêl ti laah nambe,

  • “Angge, sa de sate unoopasiv-aso sen Anutu
  • vu vu saa-to nganjo.” - (6) Saam 8:4-6* - (8) 1 Kolint 15:27* - (9) Pilipai 2:8-9* - (10) Lom 11:36* - (11) Matai 25:40 Maak 3:35 Jon 20:17* - (12) Saam 22:22* - (13) Ais 8:17-18*

Yesu tu omaahonôôn keen in nambe dôôvu yiiy

14 Om unoopasiv-asôônju ond sil omaahonôôn, tombe yik Yesu tu omaahonôôn-ambe ni nambe sil having. Wiing nambêênju in nambe yoo jimb, tombe yite yimbin-anju daanggôôl Saalang sen yite niwêêk neep-ambe nayiis hil dayimb-ato na. 15 In omaahonôôn dayêênin yimbin, tombe lak busin pin sen dando voon-anjôôto ond niyenin-anjo nanduuh sil tatin, om Yesu yimb in nambe nôôh sil vêêl in niyenin-anju. 16 Keen lôôt, me-nawiing in nambe dôôvu angela-so le, nganjo nawiing in nambe dôôvu hil sen silate danggakook neep vu Abalaam-ato. 17 Nambêênju ondeey yoo tu ni nambe halindin-asôôto keen, in nambe mem naatu yêêv bop salivangin-ate be yoo ka pasiv in omaahonôôn osin biing Anutu-te kul nivasa lôôt, tombe yik yoo gatung yi naatu salivangin in kawiiy hil-ate nipaya na. 18 De yoo hako nivaane pin sen tovu yi be sahi yii-to, om yik yoo lohvu nambe dôôvu hil sen sahisin natovu sil-ato. - (14) Jon 12:31 1 Jon 3:8 Taato 12:10* - (16) Ais 41:8-9* - (17) Pilipai 2:7 Hiblu 2:14 1 Jon 2:2 4:10* - (18) Hiblu 4:15*

Copyright information for `MMO