Mark 1

Jon sen nalipis hil-ato nêêl Anutu-te vakasin

(Matai 3:1-12 Luk 3:1-9,15-17 Jon 1:19-28)

Anutu Noow Yesu Kalisi-te** banye nivasa dangga nyendoos-anjo, ond Anutu-te omaaho Yesaia kaavu munggin nambe,

  • “Anutu nêêl nambe, ‘Onggango le, sa navu aambiing sate omaaho ti na naamunggin vu hong in samu gate mop.’
Omaaho ti nando taaku lumbalaamb-ambe navu teey lava nambe, ‘Ham samu Omaaho Bop-ate mop, ham galo yite mop nanjip nivalok.’” Tombe yik Jon sen nalipis hil-ato ond la nando taaku lumbalaamb-ambe nanêêl tanasin nambe hil langgilin londpayo de lanjipis bel in nambe Anutu kawiiy silate nipaya na. Tombe hil vu taaku Yudia pin osin hil Yelusalem pin lôôt lala vu Jon-ambe lanêêl silate va nipaya langaah, tonde lipis sil hôôk bel bop Yoladan.

Jon lop lolop sen hil davu samu lak bik kamel anivalus-ato de havêêh let bik naavi, tonde naya sapeek osin bayiiluk natu yite vanôôn, de nanêêl tanasin nambe, “Omaaho ti navu taamuyin sa, ond yite niwêêk savok sa. Sak sa omaaho nipaya, same sa ningg vasa in nambe sa kavaayin yite suul osin saambiing kul

vaalu naambe hil kul-aso dawiing vu silate yêêv e.
Sak saalipis ham lak bel amu, de yik le biing-ambe ham anim vasa jak Vavi Vaambuung-ate niwêêk.” - (2) Mal 3:1 Matai 11:10* - (3) Ais 40:3* - (4) Sinaale 13:24 19:4* - (6) 2 King 1:8 Matai 11:8* - (7) Sinaale 13:25*

Yesu lipis bel

(Matai 3:13-17 Luk 3:21-22)

Tonde sim Yesu vu bayêên Nasaalet Galili be la vu Jon, tombe lipis yi hôôk bel Yoladan. 10 Yesu naahen nahôôk bel-ambe nalakala, tombe yi baandoni kahe, de Vavi Vaambuung hato nambe manak tumbaliiy-ambe lakando yi. 11 Tombe lava ti laam vu baandoni nambe, “Sa noongg hong. Sahengg having hong lôôt osin sahengg anivasa vu hong.” - (11) Saam 2:7 Ais 42:1 Matai 12:18 Maak 9:7*

Saalang sahi Yesu

(Matai 4:1-11 Luk 4:1-13)

12 Tombe sim Vavi Vaambuung wiing-ambe la taaku lumbalaamb. 13 La taaku lumbalaamb sen bik bamaan-ate taakuu-to ond la nando busin doo-yuuh-ambe Saalang sahi yi, de angela dahôôvu yi. - (13) Saam 91:11-13*

Yesu hako kul ak vu Galili

(Matai 4:12-17 Luk 4:14-15)

14 Latung Jon hôôk kalaambus lung la, tonde Yesu la Galili be nêêl Anutu-te banye nivasa langaah nambe, 15 “Busin sen Anutu navu ganggin yite hil-ato laam ngaaho lak lung la, om ham anggilin ham alompayo be ham ambiing gaving banye nivasa.” - (14) Maak 6:17* - (15) Matai 3:2 Galata 4:4*

Yesu teey hil paahuung dangga-so yumbeyuuh

(Matai 4:18-22 Luk 5:1-11)

16 Yesu monaloh betum Galili nanyendangga tombe sim yi omaaho paahuung dangga yuuh, Simon ayuuh hali Endru, ond yuuh mondaate govak lukala betum, 17 tombe Yesu nêêl vu yuuh nambe, “Manaam taamuyin sa in saambiing-ambe muuh gako omaahonôôn naambe sen muuh nako paahuung-ato.” 18 Om yik pavis atombe yuuh lavuuh yuuhate govak-ande yuuh sapa yi be yaal lala. 19 Tonde sim la daka having atombe yi Sebedi noow ayuuh Jems ayuuh hali Jon**, yuuh dando lak kaanu be yuuh mosamu yuuhate govak, 20 le pavis atombe teey yuuh lala vu yi. De yuuh lavuuh mangganaan Sebedi osin yite hil kul vaha dando lak kaanu, de yuuh taamuyin yi be lala. - (17) Matai 13:47*

Yesu hatiiy mamu nipaya la in omaaho ti

(Luk 4:31-37)

21 Latok lala bayêên Kapenaum le mem Yuda-te busin sawaasin**, tombe Yesu lukala dumb alo be wiing tanasin vu hil. 22 Tombe sil lavindis lôôt in yite tanasin, in me-nawiing tanasin nambe tanasin dangga-so le, yoo nawiing tanasin lohvu yêêv bop ti. 23 De omaaho ti nando hôôk dumb alo ond mamu nipaya hôôvu yi, tombe teey nambe, 24 “Yesu Nasaalet, gayêêvu hey in? Galaam

in nambe kawiiy hey na? Sa lak ganim nambe Anutu-te omaaho vaambuung hong.”
25 Le Yesu nêêl mamuu-ju nambe, “Olavam nama, onggavuuh omaahonôôn-anja de gana.” 26 Tombe mamu hangeeyak bopaata be handu omaahonôôn-ande hato be la. 27 Tombe hil pin lavindis lôôt-ambe lanêêl vu sil nambe, “Vaatii-ju? Tanasin moos tii-ju mava? Nanêêl va osin niwêêk om mamu nipaya nanyend vuun in lava.” 28 Tombe Yesu banye la lohvu taaku Galili pin. - (21) Matai 4:13* - (22) Matai 7:28-29* - (24) Maak 5:7* - (26) Maak 9:26* - (28) Matai 4:24*

Yesu wiing Pita yenaavêêh having hil ngeeyaata nind vasa lak

(Matai 8:14-17 Luk 4:38-41)

29 Sil vu dumb alo be lala voon, tombe Yesu having Jems ayuuh Jon-ambe yaal lalukala Simon ayuuh Endru-te bayêên alo. 30 Tombe Simon yenaavêêh anivaane be neep, tombe lanêêl vu Yesu pavis, 31 om la laandiiy hôôk nama be kandi lak, tombe nivaanêê-to lung la de kandi be la hayêêh vanôôn-ambe vu vu sil.

32 Tonde soosin hôôk-ambe taaku me lukala, tombe lako hil anind lakin osin hil sen mamu nipaya dahôôvu sil-ato pin lala vu yi. 33 Hil vu bayêên-anju pin lala lapup hôôk vinavi, 34 tombe wiing hil anind lakin vaha vaha ngeeyaata nind vasa nalak laah, tonde hatiiy mamu ngeeyaata be lato dala in omaahonôôn, de hilin mamu pin lavand jeen in nambe lalak ni nambe Anutu Noow yi om me-daanêêl yi langaah e. - (32) Matai 4:24* - (34) Maak 3:11-12*

Yesu nawiing tanasin vu Galili

(Luk 4:42-44)

35 Yesu kandi hôôk heendiisin-ambe la taaku lu malis ti tombe lohak. 36 Tonde Simon-aso hil sen dando having yii-to lala davu salo yi, 37 tombe latovu be lanêêl vu yi nambe, “Hil pin davu salo hong.” 38 Tombe Yesu nêêl vu sil nambe, “Yana bayêên bu ti ti sen nando ngaahôô-to in saambiing tanasin vu sil gaving. Kul-anjo sen soo alaam in-ato.” 39 Om yik la hatup hôôk taaku Galili pin, be nawiing tanasin hôôk silate dumb alo ti ti, de natiiy mamu dala in omaahonôôn. - (35) Matai 14:23 Maak 6:46* - (39) Matai 4:23 9:35*

Yesu wiing omaaho ti nipayêês anipaya lôôt-ato nivasa lak

(Matai 8:1-4 Luk 5:12-16)

40 Omaaho ti nipayêês anipaya lôôt-ato la vu Yesu be hatung kaatu vu de kataangg nambe, “Lohvu gandôôvu sa be sa ningg naavi nivasa jak?” 41 Tombe Yesu ka pasiv in yi om hambe nama lak-ande nêêl vu nambe, “Êê-e, lohvu saandôôvu hong, om ganim naavi nivasa jak.” 42 Tombe yik payêês lung la pavis-ande ninaavi nivasa lak. 43 Lung atonde Yesu wiing-ambe la, de vu kôôvu yi nambe, 44 “Ongganggin hong, game naanêêl vaa-jo vu omaaho ti le, nganjo gana taato ganim naavi vu kul vaha sen datung salivangin-ato ti de onggatung salivangin nohvu Mose-te tanasin nêêl-ato in nambe mem hil lanjak ni naambe ganim naavi nivasa lak lung la.” 45 Le ma de la monanêêl vaa-jo banye hatup hôôk, om Yesu me-lohvu nambe dukana taaku ti be taato yi langaah e, om la nando taaku lu malis ti tombe hil vu taaku pin lala vu yi. - (44) Maak 3:12 7:36 Lev 14:1-32*

Copyright information for `MMO