Mark 3

Yesu wiing omaaho ti nama nipaya nivasa lak

(Matai 12:9-14 Luk 6:6-11)

Yesu lukala dumb alo yesin laah, tombe omaaho ti nama vaalu nipaya nandôô-ju. Tombe hil-anju langget Yesu lôôt in nambe lanji naambe biing omaahôô-ju nama nivasa jak dôôk busin sawaasin, ond daanêêl vakasin ti jak yi. Tombe nêêl vu omaaho ti sen nama nipayaa-to nambe, “Okandi be ganaam nganjo.” Tonde lingin sil nambe, “Va ango tana lohvu tanasin nêêl, nambe yaambiing va nivasa dôôk busin sawaasin, me yaambiing va nipaya? Nambe yaandôôvu omaahonôôn-ambe mando nivasa me yaanyiis-ambe jimb?” Lemu sil oo dando lavand masin, tombe me hako hôôk sil-ande ahekalin-ambe lopayo nimeen in sil alondpayo niwêêk ak, tonde mem nêêl vu omaahôô-juuto nambe, “Otalo namam.” Om talo nama tombe nivasa lak. Om pavis atombe Palisai-so laluus-ambe lala lasupin having Helot-ate** hil be mem sil davu salo mopaatôôv in nambe lanyiis Yesu be jimb. - (2) Luk 13:14* - (4) Luk 14:3* - (5) Jon 11:33 12:40* - (6) Matai 22:15-16*

Hil ngeeyaata lasupin dando betum Galili nanyendangga

Yesu having yite maanggêêm-aso be lala betum, tombe hil Galili ngeeyaata lôôt davu taamuyin sil, de hil vu taaku Yudia, de vu Yelusalem osin taaku Idumia,

de vu bel Yoladan vaalu alo, de vu Taia yuuh Saidon. Hil ngeeyaata lôôt langoyin va pin sen nawiing-ato tombe lala vu yi,
om nêêl vu yite maanggêêm-aso nambe sil gako kaanu ti naam ganggin yi in nambe hil ngeeyaata om le langgilin yi. 10 In Yesu wiing hil ngeeyaata nind vasa lak lung la, ondeey hil anilakin pin dandu sil in nambe namand na palaah yi de nind vasa jak. 11 Tonde mamu nipaya sen lalukando omaahonôôn-ato layi Yesu tombe lala lato pataav baambund neep voon hôôk vaha, de langeeyak-ambe lateey nambe, “Anutu Noow hong.” 12 Tombe vu kôôvu sil niwêêk nambe sil-ame daanêêl yi langaah e. - (8) Matai 4:25* - (9) Maak 4:1 Luk 5:1-3* - (10) Matai 14:36* - (11) Luk 4:41* - (12) Maak 1:34*

Yesu holin yite sinaale nomaayuuh-ambe laam yuuh

(Matai 10:1-4 Luk 6:12-16)

13 Yesu lakala taaku lu kandu ti be teey hil sen wiingin sil-ato be lala vu yi. 14 Tombe holin sil nomaayuuh-ambe laam yuuh in nambe sil mando gaving yi, de le biing sil lana daanêêl tanasin gaving, 15 tonde bu niwêêk vu sil in nambe sil gatiiy mamu gato na in omaahonôôn.

16 Holin sil nomaayuuh-ambe laam yuuh-ato, de nêêl Simon haale ngo nambe Pita. 17 Tonde Sebedi noow ayuuh, Jems ayuuh Jon ond nêêl yuuh haalend ango nambe Boanesis, dangga nambe yuuh lalohvu kalang natuuh. 18 Tonde Endru, Pilip, Batolomai, Matai, Tomas, Alpias noow Jems, Tadias, Simon ango sen naanjiihin hil Yuda in nambe gatiiy hil Lom lanaa-to, 19 de Yudas Iskaliot sen taato Yesu langaah-ambe hil lalôôh-ato. - (16) Jon 1:42* - (17) Luk 9:54*

Yesu yuuh Belsebul

(Matai 12:24-32 Luk 11:14-23 12:10)

20 Yesu laah baan lemu hil ngeeyaata lasupin sil laah-ambe dando, tombe lahilin Yesu having yite maanggêêm-aso, de me-lalohvu nambe lanja vanôôn e. 21 Tombe Yesu-te hil lango be lala in nambe gako yi be lanaah, in lanêêl nambe, “Lukook wiing paya.” 22 De tanasin dangga-so sen lalaam vu Yelusalem-ato lanêêl nambe, “Belsebul nando having yi.” De vaalu lanêêl nambe, “Mamu-te yêêv bop Belsebul hôôvu yi ondeey natiiy mamu la in omaahonôôn.”

23 Tombe Yesu teey-ambe hil lala vu yi, be nêêl vakasin pakwesin ti vu sil nambe, “Saalang e gatiiy Saalang na naambe tana? 24 Naambe hil taaku bop ti yoo lanyiis sil-ambe baasuh sil na lu yuuh, ond sil-ame lalohvu nambe mando nivasa le. 25 De naambe hil dangga ti sen dando hôôk bayêên timuu-to yoo lanyiis sil-ambe baasuh sil na lu yuuh, ond sil-ame le mando javuh ti le. 26 De naambe Saalang gatiiy yite kul vaha mamu nipaya-so ond

sil o Saalang-aso yoo laasuh sil la lu yuuh, ond sil-ame le mando javuh ti le, le nama.
27 Omaaho ti me-lohvu nambe jakana omaaho nipaya niwêêk ambaan-ambe bu vêêl yite va le. Biing naambêênjo ond naanduuh yi tatin, le mem gako yinêên va pin sen lukando bayêên alôô-to be na.

28 “Sa naanêêl keen vu ham naambe va nipaya osin vakasin palesin pin sen omaahonôôn danêêl-ato, ond Anutu lohvu nambe kawiiy na pin, 29 nganjo omaaho ti naanêêl Vavi Vaambuung pale, ond Anutu me-le kawiiy na le, yoo le nanjip danggata osin danggata.” 30 Yesu nêêl vakasin nambêênjo in danêêl nambe mamu nipaya ti nando having yi deey. - (20) Maak 6:31* - (21) Jon 10:20* - (22) Matai 9:34 10:25* - (30) Jon 10:20*

Yesu tangganaan osin halindin

(Matai 12:46-50 Luk 8:19-21)

31 Yesu tangganaan osin halindin lato daale voon-ambe lanêêl vakasin la vu yi. 32 Tonde hil ngeeyaata dando be lambuuh yi tatup tombe lanêêl vu nambe, “Ohangoyin a? Tam having halim-aso lato daale voon-ambe dalingin hong.” 33 Le nêêl laah vu sil nambe, “Ataak having halingg-aso laheey?” 34 Tonde me hako hôôk-ambe yi hil sen lambuuh yi tatup-ato be nêêl vu sil nambe, “Ham angge, ataak-aso halingg-aso sen manyinjo, 35 in hil sen dawiing va lohvu Anutu ka ond mem sa halingg osin sa vangaangg-ambe sa ataak-aso sil.” - (31) Maak 6:3 Jon 2:12 Sinaale 1:14*

Copyright information for `MMO