Matthew 4

Saalang sahi Yesu

(Maak 1:12-13 Luk 4:1-13)

Lung atonde Vavi Vaambuung giiy Yesu la taaku lumbalaamb in nambe Saalang sahi yi. Tombe Yesu me-ya vanôôn daka le, de yoo nando meep lohvu busin doo-yuuh-ande langaah doo-yuuh, tombe yimb ahe lôôt, tombe sim palapin vaha la nêêl vu nambe, “Naambe Anutu Noow hong ond onaanêêl-ambe tatuuh-anjo naatu vanôôn.” Le Yesu nêêl laah vu nambe, “Malis, in Anutu-te vakasin neep hôôk kaapiya nambe, ‘Vanôôn timu me-napuvu omaahonôôn e, nganjo vakasin pin sen Anutu nanêêl-ato ond mem napuvu omaahonôôn.’”

Tombe sim Saalang hako be yuuh lala lalup taaku vaambuung bop Yelusalem, tombe la valaah Yesu lakala naale lak Anutu-te dumb bop alu baandoni, de nêêl vu nambe, “Naambe Anutu Noow hong ond opasong gana kambii-ju, in Anutu-te vakasin neep hôôk kaapiya nambe, ‘Yoo le naanêêl vu yite angela-so be lanôôh hong ak sil namand de game le kaatuuh ovaham jak tatuuh e.’”

Le ma de Yesu nêêl vu nambe, “Lemu Anutu-te vakasin ango neep hôôk kaapiya nambe, ‘Game sahi gate Omaaho Bop Anutu le.’”

Tombe yik Saalang hako yi be yuuh lalak kandu dinaandiin ti be lala daale, le mem Saalang motaato hil pin-ate taaku vu voon osin silate va nivasa vasa vu Yesu, tonde nêêl vu nambe, “Naambe onggatung kaatu vu sa osin onggako sa haalengg jak ond mem sale aambu va haale haale pin-anju vu hong.” 10 Le ma de Yesu nêêl vu nambe, “Saalang, gana vêêl, in Anutu-te vakasin neep hôôk kaapiya nambe, ‘Goo gatung kaatu vu gate Omaaho Bop Anutu be ganohak vu yi timu.’” 11 Tombe Saalang havuuh yi de la, tonde mem angela-so lato lahôôvu Yesu. - (1) Hiblu 2:18 4:15* - (2) Eks 34:28* - (3) Jen 3:1-7* - (4) Diu 8:3* - (6) Saam 91:11-12* - (7) Diu 6:16* - (10) Diu 6:13* - (11) Hiblu 1:6,14*

Yesu hako kul lak nyendoos vu Galili

(Maak 1:14-15 Luk 4:14-15)

12 Yesu hango nambe hil lalôôh Jon-ambe latung lukala kalaambus, tonde laah Galili, 13 tombe havuuh Nasaalet-ande la nando Kapenaum. Kapenaum-anju neep betum bop Galili nanyendangga vu taaku bop Sebulon ayuuh Naptaali, 14 om Anutu-te vakasin sen Yesaia nêêl langaah bôôy-ato nôôn ak nambe,

15 
  • “Taaku Sebulon ayuuh taaku Naptaali, tonde taaku sen neep betum nanyendangga osin taaku sen neep Yoladan vaalu, de Galili-te taaku sen hil vaalu lalaam dando hôôk-ato,
16 ond hil sen dando hôôk mekanuu-to layi melangaah bopaata. Yik hil sen dando hôôk taaku mekanu in nambe lanjimb-ambe lana mend namaa-to ond melangaah tok laam vu sil.” 17 Hôôk busin-anju Yesu hako yite kul lak-ambe nêêl vakasin langaah nambe, “Ham anggilin ham alompayo in busin sen Anutu navu ganggin yite hil-ato laam ngaaho lak lung la.” - (12) Matai 14:3 Maak 6:17 Luk 3:19-20* - (13) Jon 2:12* - (15) Ais 9:1-2* - (17) Matai 3:2*

Yesu holin yite maanggêêm yumbeyuuh

(Maak 1:16-20 Luk 5:1-11)

18 Yesu monaloh betum Galili nanyendangga, tombe yi maayuuh hali sen omaaho paahuung dangga yuuh-ato, Simon sen danêêl haale nambe Pitaa-to ond yuuh hali Endru mondaate govak lukala betum, 19 tombe nêêl vu yuuh nambe, “Manaam taamuyin sa, in saambiing-ambe muuh gako omaahonôôn naambe sen muuh nako paahuung-ato.” 20 Om yik pavis atombe yuuh lavuuh yuuhate govak-ande yuuh sapa yi be yaal lala.

21 Vuu-ju be la daka having, tombe yik yi omaaho ti yuuh hali, Sebedi noow ayuuh Jems ayuuh hali Jon**, ond yuuh dando lak kaanu having mangganaan Sebedi be sil oo mosamu silate govak, tombe Yesu teey yuuh, 22 tombe yik pavis atombe yuuh lavuuh mangganaan osin kaanu de yuuh taamuyin Yesu yaal-ambe sil lala. - (19) Matai 13:47* - (20) Matai 19:27*

Yesu wiing hil ngeeyaata nind vasa lak

(Luk 6:17-19)

23 Yesu la hatup hôôk taaku Galili pin-ambe monawiing tanasin hôôk silate dumb alo ti ti, tombe nanêêl banye nivasa sen Anutu nanggin yite hil-ato langaah, de wiing hil anind lakin vaha vaha pin anind vasa lak. 24 Tombe yite banye la lohvu taaku Silia pin, om hil anipaya pin, sil vaalu silate nilakin vaha vaha, de vaalu sen dango nivaane bopaata, tonde hil vaalu sen mamu dahôôvu sil-ato, osin hil vaalu sen baando nasi sil, de hil vaalu vahand ayuuh namand anipaya, ond lako hil-anjo pin lala vu Yesu be wiing sil anind vasa lak. 25 Tombe hil vu Galili osin taaku nomaayuuh danêêl nambe Dekapolis-ato, be vu Yelusalem osin Yudia de Yoladan vaalu alo, ond sil ngeeyaata davu taamuyin Yesu. - (23) Maak 1:39 Matai 9:35 Sinaale 10:38* - (24) Maak 6:55* - (25) Maak 3:7-8*

Copyright information for `MMO