Revelation of John 22

Bel metumin-ate osin haah metumin-ate

Lung atonde sim angela taato bel bopaata metumin-ate ti vu sa, tombe bel-anju yoo natêêlang lôôt lohvu dundum. Bel-anju vêêl hato omaaho lulemak Anutu yuuh Sipsip Noow-ate sia be la. Tombe talind lavuun sen bel-anju hato be laa-to, ond haah metumin-ate naale bel nanyendangga vaalu vaalu. Haah metumin-atêênju ond nayiis nôôn balon nomaayuuh-ambe laam yuuh hôôk ta ti, yik yoo nayiis nôôn ak kwaav ti ti pin. Haah-anju lis nawiing-ambe omaahonôôn anind vasa nalak. De va nipaya pin sen Anutu nimbayaa-to ond ti me-le mando dôôk taakuu-ju le, yik omaaho lulemak Anutu yuuh Sipsip Noow oo le mando hôôk taaku bop-anju, be yik Anutu-te hil kul-ate yoo le mondanohak vu yi. Tombe sil le mondanji mekaalus, de haale le nanjip ak sil damband. Taaku mekanu le nama na valok, de kin tumin osin taaku mekaalus-ame le bu melangaah jesin naah e, malis. Yik Omaaho Bop Anutu-te nikaapulis oo le bu melangaah vu sil, tombe mem sil daatu lulemak-ambe sil ganggin omaahonôôn-ambe sil mando danggata osin danggata. - (1) Esi 47:1 Joel 3:18 Sek 14:8* - (2) Jen 2:9 Esi 47:12 Taato 22:14,19* - (4) Saam 42:2 Matai 5:8 Taato 3:12* - (5) Taato 5:10 20:6 21:23,25 Dan 7:18,27*

Yesu navu nom pavis

Tonde sim angela nêêl vu sa nambe, “Vakasin-anjo yoo keenaanôôn lôôt, om lohvu nambe omaahonôôn pin oo lambiing gaving keen lôôt. Yik Omaaho Bop Anutu sen navu yite vakasin vu hil-ambe danêêl langaah-ato, ond wiing yite angela laam in nambe taato va pin-anjo langaah vu yite hil kul-ate be lanjak ni naambe navu nôôn jak pavis. Yesu nêêl nambe, ‘Ham gango, sa navu anaas vu ham pavis.’ Om hil sen sil samu Anutu-te vakasin sen saanêêl langaah-ambe neep hôôk kaapiyaa-jo, ond hil-anju kand vasa.”

Ke, tombe yik sa Jon soo hangoyin vakasin pin-anju osin saahe va yuuh amêê-ju lung la, le mem sa hato pataav baambungg la neep voon ngaaho vu angela sen navu taato va yuuh ame pin vu saa-to vaha be saawiingin nambe aanohak vu yi. Le ma de nêêl vu sa nambe, “Game gambiing naambêênjo le. Sa having hong-ande halim-aso sen Anutu-te hil-ato, tonde hil sen dawiing va lohvu Anutu-te vakasin sen neep hôôk kaapiyaa-jôôto, ond yik yiiy ahondoos-ambe yaatu Anutu-te hil kul-ate, om yik goo ganohak vu Anutu timu.” 10 Tonde yik angela nêêl vu sa having nambe, “Anutu-te vakasin sen neep hôôk kaapiyaa-jôôto ond game gambu teenin e, in va yuuh ame sen Anutu navu biing naatok naam langaah-ato yite busin ngaaho lak lung la. 11 Om hil sen dawiing va nipayaa-to ond yoo mondambiing, de hil sen dawiing va nindanjeen-ato ond yik yoo lambiing lôôt, tonde hil sen dawiing nivalok-ato ond yik yoo lambiing va nivalok lôôt, tonde hil sen latu hil vaambuung-ato ond yik yoo lanjakin sil lôôt.”

12 Yesu nêêl nambe, “Ham gango, sa navu anaas vu ham pavis. Sa navu anaas in saambu nyevahaan vu omaahonôôn ti ti pin nohvu va sen yoo dawiing-ato. 13 Yik saa-jo, sa omaaho nalu munggin osin ahus. Sa danggakook osin to, soo natung dangga lak kul-ambe soo navu samu kul ahus la.

14 “Om hil sen lalipis silate lolop-ato ond sil oo kand vasa, in sil lalohvu nambe lanja hahaanôôn sen metumin-atêêto, tonde sil lalohvu nambe landukana vinavi sen taaku bop-anjuuto. 15 Nganjo hil sen lalohvu voow anipayaa-to osin yaavak ambu-so, de baayamb ambu-so, tonde hil sen dayiis omaahonôôn-ambe dayimb-ato, osin hil sen dalohak vu anutu tatuhin vaha-sôôto, tonde hil pin sen ahend naving kakook tatuhin-ate be davu sapa hôôk-ato, ond hil-anjo sil-ame le landukana mando dôôk Anutu-te taaku bop-anju le, sil e mando voon.

16 “Yik sa Yesu sen soo aawiing sate angela laas vu ham-ambe nêêl sate vakasin-anja vu ham bel-ate. Saa-jo sen sate danggakook neep vu Devit, in Devit-ate hil vu taamusin-ato ti sa, tonde sa matam bop sen natum hôôk samiinaanôôn-ato.”

17 Tonde Vavi Vaambuung ayuuh Sipsip Noow vane lanêêl nambe, “Ganaam,” om hil sen lango vakasin-anju yoo daanêêl gaving naambe, “Ganaam.” De hil sen lond bambôôv in bel-ato ond yik yoo lanaam. Hil sen lawiingin nambe daanum bel-ato ond yik sil lanaam-ambe daanum bel metumin-ate sen Anutu yoo bu nyemalis amu vu

sil-ato.

18 Saambu kôôvu hil pin sen gango Anutu-te vakasin sen neep hôôk kaapiyaa-jôôto naambe omaaho ti naanêêl vakasin ango yoow dukana vakasin-anjo gaving, ond va nimeen pin sen Anutu nêêl langaah hôôk kaapiyaa-jôôto ond Anutu le biing va nimeen-anju naatovu yi. 19 Tonde sim omaaho ti nambe nôôh Anutu-te vakasin sen neep langaah hôôk kaapiyaa-jo boow ti vêêl, ond yik Anutu le nôôh yi vêêl de me-le ja hahaanôôn sen metumin-atêêto le, de me-le mando dôôk taaku vaambuung bop sen nêêl vakasin ak-ambe neep hôôk kaapiyaa-jôôto le.

20 Ke, omaaho sen nêêl vakasin langaah ak va yuuh ame pin-anjôôto ond gêên nêêl nambe, “Keen lôôt, sa navu anaas pavis.”

Êê-e Omaaho Bop Yesu, ganaam-o.

21 Yik vakasin lung laa-ja. Omaaho Bop Yesu-te samu samu naas mando gaving ham pin. - (6) Taato 1:1* - (7) Taato 1:3 2:16* - (8) Taato 19:10* - (10) Taato 1:3 10:4* - (11) Dan 12:10* - (12) Taato 2:16,23 Ais 40:10 2 Kolint 11:15* - (13) Taato 1:8,17 21:6* - (14) Taato 22:2* - (15) Taato 21:27* - (16) Lom 1:3 Taato 2:28 5:5 Nam 24:17* - (17) Taato 21:6* - (18) Diu 4:2 12:32 Taato 15:1* - (19) Taato 22:2* - (20) Taato 3:11*

Copyright information for `MMO