Revelation of John 5

Jon yi kaapiya ti neep

Saahe Anutu nando lak sia lulemak-ate be kaapiya ti neep hôôk nama vasa, ond sil kaavu vakasin neep hôôk lopayo be neep ak dami having, tombe sil langgi lak va nikanggi namaavaalu be vindak yuuh tatin. Tonde saahe de angela niwêêk ti teey bopaata nambe, “Omaaho lati nivasa lohvu nambe kahe va nikanggi in kaapiyaa-jo be katekin?” Lemu hil pin sen dando baandoni osin voon, de dando hôôk ngaanggis kambinii-to ond ti me-lohvu in nambe katekin kaapiyaa-ju be ji lopayo le. Ke, saahe le me-latokak omaaho nivasa ti lohvu in nambe katekin kaapiyaa-ju be ji lopayo le, om saasu bopaata lôôt. Tombe yêêv-asôônju ti nêêl vu sa nambe, “Game naasu le, onggango le, omaaho niwêêk sen lohvu voow layon-ambe kandi lak vu hil Yudaa-to, ond yite dangga neep vu himbop bôôy Devit, ond laanggôôl va nipaya pin, om yik yoo lohvu nambe kahe va nikanggi namaavaalu be vindak yuuh-anjuuto be katekin kaapiya.” - (1) Taato 4:2,10 Esi 2:9-10 Ais 29:11* - (5) Jen 49:9 Ais 11:1,10 Taato 22:16*

Jon yi me lak Sipsip Noow

Saahe Sipsip Noow** ti naale nambe sen layiis-ambe yimb-ato, ond naale sia lulemak-ate osin va metumin yumbeyuuh-ato de yêêv-aso lavuun, tombe lu salak namaavaalu be vindak yuuh, de mekaalus namaavaalu be vindak yuuh tayi Anutu-te Vavi Vaambuung sen saahe lohvu nôôn namaavaalu be vindak yuuh-ande Anutu wiing sil lala dako hôôk lohvu taaku pin-ato. Sipsip Noow-anju ond la lôôh kaapiya sen neep hôôk Anutu nama vasaa-to. Ke, hako lung la le mem va metumin yumbeyuuh-ato osin yêêv-aso doo-ti be laam yumbeyuuh-ato ond lato pataav baambund neep voon hôôk Sipsip Noow ame in nambe sil gako haale jak. Tonde mem yêêv-aso ti ti yoo lalôôh gavêêngg lohvu sil pin osin lalôôh kaambum gool ti ti lohvu sil pin, tombe va galovasa salivangin-ate pup kaambum-anju la ond Anutu-te hil-ate lohakin. Tonde mem lawiing laalo moos ti nambe,

  • “Hong ond ganivasa lohvu nambe onggako kaapiya be okahe va nikanggi pin sen langgi lak-ato, in layiis hong-ambe gahimb, tombe ganim hees vaanggo omaahonôôn lalom vu Anutu. Keen, ohako omaaho-nôôn vu hil dangga ti ti pin lalom, de vu omaahonôôn lavand ti ti pin, osin vu omaahonôôn naavind ti ti, tonde hil vu bayêên bu ti ti pin.
10 Gawiing-ambe latu heyate Anutu-te hil osin latu kul vaha-so salivangin-ate, tonde yi Anutu yoo tu silate omaaho lulemak, le mem sil e ganggin taaku voon pin.” - (6) Jon 1:36 Taato 1:4 5:12 13:8 Sek 4:10* - (7) Taato 4:2,10* - (8) Taato 8:3-4 14:2 15:2 Saam 141:2* - (9) Saam 33:3 40:3 96:1 98:1 Saam 144:9 Taato 14:3* - (10) Eks 19:6 Ais 61:6 Taato 1:6 20:6 22:5*

Sil lako Sipsip Noow haale lak

11 Lung atonde sim sa mengg laah e sa hangoyin angela ngeeyaata lavand, ond sil lakaneep omaaho-maaho, be doos-ambe doos lôôt. Sil daale be lambuuh Anutu-te sia, de lambuuh va metumin-asôônjuuto osin yêêv-aso tatup, 12 tombe dateey bopaata nambe,

  • “Sipsip Noow-anjo sen layiis bôôy-ambe yimb-ato, ond omaaho nivasa be yoo lohvu nambe hil pin gako haale jak in yite niwêêk osin va nivasa vasa danggakook yi, de sil lavand dôôk yi in yite
  • kakook anivasa osin niwêêk bopaata. Tonde yoo lohvu nambe omaahonôôn pin gako haale jak osin lavand dôôk yi in yite nikaapulis-ambe daapêêlis na vu yi.”
13 Tonde sa hango va vaha vaha pin sen Anutu hatung-ato lavand, va sen dando yendak osin dando ngaanggis-ato, de va sen dando hôôk ngaanggis kambinii-to osin va sen dando hôôk lôôy-ato. Keen, va pin sen dando be lalohvu taaku pin-anju ond sa hango danêêl nambe,

  • “Anutu nando lak yite sia lulemak-ate, tombe yik Sipsip Noow having, ond yiiy pin naapêêlis na vu yuuh-ambe gako yuuh haalend jak, de yiiy lavangg dôôk yuuhate nikaapulis osin niwêêk lôôt-ambe nanjip danggata osin danggata.”
14 Tonde va metumin yumbeyuuh-anjuuto laliinggis nambe, “Keen.” Tombe yêêv-aso lato pataav baambund neep voon-ambe lalohak vu yuuh. - (11) Dan 7:10 Hiblu 12:22* - (12) Taato 5:6 1 Kro 29:11* - (13) Taato 4:2,10*

Copyright information for `MMO