aPas 32:6

1 Corinthians 10

Lavapaase Aronga Ri Leveloklok Kakapmek

Luvutnetak mi luvurinuk. A vara i do mina doma su at levempanga ga vot saparap lavalabat atdik gano migomgo, at levenmaares diga mumu asu ne Moses. Diga nemen maxopok at loklok tatao at ne Moroa, ni gam gomgo ridi at loxontakabu, la diga vas polo tubu at loxontas, laasen teren Laras Memele. Keneng at loxontakabu la keneng ap mo loxontas, i lok ngan ta diga lok ka lesep susu atdi ngan loklok katling at lixitkis etangas atdi mi ne Moses. Nedi axap diga anan at levempanga anan at ne Moroa, la diga inin at legesa dan, ne Moroa ga raba di min at langas petpes. Diga inin at ladan boro ap mo luat na roonan mo ga emu midi; la mo luat neni ne Iesu Karisito. Ne Moroa ga nemen eburu midi ketla buaang atdi diga lox amusax i, kuren la diga remet eteke mene ro at lengkot axap at lamatbin.

Na axap levempanga ni lampoovo ridik, ti lox aronga dik do nemen gat dik guta vavara solo ri levempanga xakapmek, i ngan limixin me Israel diga lox i. Nemen gat mita lotu saparap lempatpoovo moroa i ngan leventaba atnedi digak lok kuren. I lok ngan levelinga at Lovoang Kaala i tong i do,

“Limixin digat pot buru ri leveluxa la melemu diga tii mi leventinii xapmek la diga pubeles at laxapmek.” a 

Nemen gat dik guta lok laxakapmek maxamang at lixitkis epot ngan buaang atnedi diga mumu asu i xuren; la keneng at leges aleng, ga legepu sangaun mi lavantun larabin sangsangaun kobot (23,000) nedi limixin diga uu. Nemen gat dik guta lok tong pen Leeme Silok ne Moroa i ngan leventaba atnedi diga lox i, la laxasii gap sev amet di. 10 Nemen mita paase ngunungun amisik ti ne Moroa i ngan leventaba atdi limixin me Israel digak lox i, la ne Moroa ga riki laangelo sepsep teren la ga sev amet di.

11 Anai levempanga ga vot saparap di i ngan lampoovo ridik ik lok at Lovoang Kaala, la i lok ngan levempapaase aronga ri nedik na, ta nemen ta at levenaleng i auret ti laxavaxap at na lavatbung menemen.

12 Dola nege go i doxoma i do lunuunu ren mo i tu lolos at lemeren ne Moroa, i lox avukat do ni na lok tatao nunuan i kusu neni noxo subu kot. 13 Leveloklok tong pen axap it pot saparap nimi, ni i lok ngan mun mo leveloklok tong pen it pot saparap limixin axap. La ne Moroa i ruturun; la ni noxo ke xepe nimi ri loklok tong pen, nemi xopmen mina epovo xusu miba xip tutu min. Se at nom laaleng do loklok tong pen na vot saparap nimi, neni naba lox alolos nimi xusu minaba tu lolos la minaba vas su basinge mo loklok tong pen kusu mi noxo subu.

Nemen Mitat Pas Ti Levenanan At Laxampoovo Moroa

14 Kuren la, luvutnetak mi luvurinuk, mina ru asepsu basinge levelaplavang ti laxampoovo moroa. 15 A paase rinimi i ngan luvuttadi akleklen; nemi xa mina ila avukat at na levelinga rak. 16 At leluxa at Leeme Silok nedik di tong loklox avukat ti ne Moroa mumu lakap orong i ngan lada at ne Karisito; la nedik di inin teren, i ngan ta do dik ta lok katling luruburu atdik maxeneng at ne Karisito. La do dik di anan at lakde, i ngan labantuxu at ne Karisito naba lox asuusu i do dik ta lok katling luruburu atdik maxeneng at ne Karisito. 17 Leges akde mene nedik ta anan teren, kuren la nedik ta lok ngan legesa bungmixin, keke i do nedik di buaang.

18 Mina doma mumu limixin me Israel, mo limixin digak lok ka lempanga anan atdi riplavang ti ne Moroa, la kerepmo diga xis esogo min. 19 Kereva, mo lovoovo moroa neni lomoroa ruturun? Kopla leveluxa limixin diplavang min ti lovoovo moroa ni laramtaba ruturun? 20 Kopmen tinotno! A tong i rinimi do lavamolon diplavang ti laxan moroa xaxarang, i lok ngan diplavang ti lubunggas la xopmen ti ne Moroa, la a xopara i do mina lox esogo mi lubunggas. 21 La kerepmo ixo epovo do mina inin at lakap at Leeme Silok, la at lakap bok at lubunggas. La kopmen tinotno na epovo do mina anan at leveluxa at Leeme Silok la minam tebeng alis bok loklok at lotu saparap lubunggas. 22 Do nemi mina mu asu i na, nemi minaba lox amusak ne Moroa. La mikleklen i do, kopmen mina lolos ngan ne Moroa.

23 I epovo do dik ata lok levempanga axap, ketla kopmen levempanga axap i lox avukat. I epovo do dik ata lok levempanga axap, ketla kopmen nom levempanga axap naba lok tooro dik kusu atabaklen avukat ne Moroa la ata mumu asu leventaangas teren. 24 Ixo lox avukat do tara na lok tavanga xusu naba epovo xusuk mun at lixitkis teren, ketla neni na rebeng kaka leveloklok nunuan kusu na lok tooro leventaba vetpes.

25 I epovo do mina anan leveluxa lomlomon di sesep min to at levengkot etang la nemen mita doma mumu solo i do digaplavang pam min ti laxampoovo moroa, 26 mila Lovoang Kaala i tong i do, “Lavatkangka axap mi levempanga axap di nemen keneng teren, nom axav i at ne Moroa.”

27 Mo do luvuttadi xopmen dina nuunu, la dina povot tinimi uto at larapeluxa atnedi, la mi doxoma i do minat pas, i lox avukat do mina anan levempanga anan axap di raba nimi min, la nemen mita doma mumu solo i do digaplavang pam min ti laxampoovo moroa. 28 Ketla do tara vetpes na lok tinimi xeretna, “Anai leveluxa digaplavang min ti laxampoovo moroa.” Nemen gat mita an at nom leveluxa; i lox avukat do mina ronga res teren kusu mi noxo lok kapmek lodoxoma at nom laradi i tong i na rinimi. 29 Do mina anan mo leveluxa, noxo lok kapmek lodoxoma atnimi, ketla ap mo mun laradi vetpes.

Ketla tara ba lok keretna, “Kopmen nak mokso do lodoxoma at tara vetpes na lok pe ia xusu nia a noxo anan mo leveluxa.
30 La mo do ana tong loklox avukat ti ne Moroa ri mo leveluxa, ixo epovo do tara vetpes na mi abulubun taba ia min, atla nia ara tong avukat pam min ti ne Moroa.”

31 I lox avukat mene, ketla levempanga salai do mi lox i, mina anan kopla mina inin, mina lox i xusu ri lox asu lisisixam at ne Moroa. 32 La mina rooro mi luruptuvuk nunuan kusu limixin me Judaia la limixin kopmen me Judaia la limixin nuunu di noxo sak kikixin at lunuunu atdi. 33 Minak lok levempanga i ngan nia ak lox i. A lok tong pen i do ana lox amomo limixin axap at levempanga nenia ak lox i. Nia xopmen ana lolos kusu ri lok lempanga ria, ketla a doma mumu loklok tooro ri limixin axap kusu di naba lok kaka lorooro avolo.

Copyright information for `MMX