1 Corinthians 11

Mina mumu asu loklok tarak, kerekngan nia a mumu asu loklok at ne Karisito.

Luruptuvuk At Lavakin Keneng At Levenaleng Potpot Buru

Nenia a emi asu minimi mila mi doxoma amisix ia la mi mumu asu levenanasa, agara anasa vam nimi min.

Ketla a vara i do minaklen avukar i do ne Karisito neni i nemen mavana at lavatlok axap, la latlok neni i nemen mavana at latkin teren; la ne Moroa neni i nemen mavana at ne Karisito. Kuren la latlok do i ngising kopla i tong asu levelinga at ne Moroa la i kua pe lavatlak teren, neni xopmen na lok ngangao at ne Iesu Karisito. La nege tatkin do i ngising kopla i tong asu levelinga at ne Moroa la kopmen na xua pe lavatlak teren, neni xopmen na lok ngangao at latlok teren. I lok ngan mun latkin in gan pes axap levengkabinim at lavatlak teren. Mo dola tatkin kopmen na xua pe lavatlak teren, i lox avukat do neni na sep korop atmut lavatkabinim teren. Ketla ni lavanga loklok mamangan do tatkin na gan kepe levengkabinim at lavatlak teren kopla na sep korop lavatkabinim teren. Kuren la neni na kua pe amisik lavatlak teren to at lotu. Ixo epovo do latlok na xua pe lavatlak teren, mila neni i lox asuusu lampoovo mi lisisixam at ne Moroa la kerepmo ni i emi asu mi ne Moroa. Ketla latkin na xua pe lavatlak teren at lotu mila neni i lox asuusu lampoovo at loklok ngangao ren ti latlok teren. Na i ruturun mila ne Moroa goxo rudum li latlok mi loxosi at latkin, ketla ne Moroa ga rudum li latkin mi loxosi at latlok. La ne Moroa goxo rudum li latlok ti lok tooro latkin teren, ketla ne Moroa ga rudum li latkin ti lok tooro latlok teren. 10 Kuren la latkin na kua pe lavatlak teren; i ngan ta loklok katling ti latlok teren, i silok tin; ni na lox i xuren mila lubung angelo diba ven i do latkin i lok ngangao at latlok teren.

11 At lixitkis etangas atdik eburu mi Leeme Silok atdik, i lox avukat do latlok na nuunu saga at latkin teren, la latkin na nuunu saga at latlok teren. 12 Mina lox i xuren mila ne Moroa ga rudum li latkin mi loxosi at latlok la lavakin di pisik lavatlok. Ketla levempanga axap ga ravasu at lodoxoma at ne Moroa.

13 Nemi xa mina ila mumu i na do kereva, ik mokso ri tatkin do na sing ti ne Moroa at lemeren limixin at lotu la kopmen na xua pe lavatlak teren? Kopmen. 14 Leretere atdik i tong i do latlok do i ruuna lavatkabinim silok, mo lavatkabinim silok teren i sat ka lainmangan tin. 15 Ketla lavatkabinim silok at latkin ni lampeneves ti limixin. Ne Moroa xa ga raba i mi lavatkabinim silok kusu ri xua pe lavatlak teren. 16 Ketla do tara i vara i do na etep mi na levelinga rak, a tong i do kopmen teretere vetpes bok ba go i nemen mumu na loklok ti kua vatlak to xeneng at lotu, ik lok kantubu atnema luvuttadi vavang kopla limixin at lotu at ne Moroa.

Leluxa At Leeme Silok

(Mt 26:26-29; Mk 14:22-25; Lu 22:14-20)

17 Mumu na levenanasa, nia xopmen ana emi asu minimi, atla levempotpot buru atnimi ri lotu xopmen na lox asu tevempanga nunuan, i lox asuusu mene levempanga i lok kakapmek. 18 Lavanga avot i lok keretna; nia aga ronga i do lixitkis epeseves mo ik lok kantubu at levempotpot buru atnimi; la a lok do nai i ruturun. 19 Lixitkis epeseves ik lok kantubu atnimi, la kerepmo i lox asuusu i do leventaba mene atnimi di mumu asu ruturun ne Moroa. 20 Do mit pot buru ap mo levempotpot buru atnimi, xusu ri anan leluxa at Leeme Silok, nemi xopmen mina mumu asu loklok at nom leluxa. 21 Legetgesara xa mo i anan avot ta, la kopmen dina ngangais be ri leventaba xopmen tevempanga anan atnedi, la nedi dit pot la dirak toxo mila leveluxa ira xap pam; la lentaba mo dira an mais la dira inin tangtangku nga. I lok kapmek tinotno. 22 Kereva, kopmen taraugu atnimi getgesara ri anan la mina inin e? Nom loklok i lox asuusu i do mi lox abulubun lotu at ne Moroa la mira lox amangan bok limixin at lotu mo xopmen tempanga anan atdi. La kereva levelinga rak mumu i na? Mi nua i do nia anaba emi asu minimi? Kopmen tinotno.

Levenanasa Mumu Leluxa At Leeme Silok

23 Na levenanasa Leeme Silok ga raba ia min, nia aga raba avolo vam nimi min. Ap mo laxanimin diga ranga alis kaka Leeme Silok ne Iesu ren, neni ga lok ka loxongkide. 24 La ni ga tong orong ti ne Moroa, ni ga sebex i la ga lok ti luvuttadi loklok ka anasa ren keretna, “Labantuxu rak na, a raba i rinimi. Minak lox amisix i na xusu ri doxoma ia.” 25 Melemu at laanan, neni ga lok kaka lakap vaen la ga lok box i ngan loxongkide; neni ga lok ti luvuttadi loklok ka anasa ren keretna, “Ana lakap vaen ni lekabus maxat at ne Moroa ga lox i mi lada rak eburu minimi. Mina lox amisix i na xusu ri doxoma ia, mo do mina in i.” 26 Lavasuun at na xeretna, dola mina anan at na lakde la mina inin at nai lakap vaen, mi lox asuusu i do Leeme Silok ga uu nop loklok atdik. La ata mumu asu na loklok se neni nabamlong.

27 Do nege i anan at lakde kopla i inin at lakap at Leeme Silok la ixo lox i mi loklok ngangao, neni i lok pam laxapmek ti labantuxu mi lada at Leeme Silok. 28 Kuren la nemi getgesara mina ila mu avot be lorooro atnimi. Do mira leeng basinge vam laxakapmek atnimi, i epovo ba mina anan at lakde la mina inin ba at nom lakap. 29 Do tara xopmen na ven kibis lavasuun at lakde mi lakap, neni ira sok ka vam loxot tin do neni i anan la i inin at nom leluxa at Leeme Silok. 30 Nom mene i lavasuun teren la buaang atnemi dik meres la labantuxu atdi i molo, la leventaba dira remet. 31 Ketla ne Moroa noxo lox asongot dik kerepmo, do nedik axa ata ila mumu avot be luruptuvuk atnedik la melemu ba ata anan ba at leluxa at Leeme Silok. 32 Ketla ne Moroa ip sev amarat dik kerepmo, kusu nedik ta noxo seeve eburu minedi limixin at na lavatbung menemen dixo nuunu at Leeme Silok.

33 Kuren la, luvutnetak mi luvurinuk, a tong i rinimi xeretna; dola mina vot buru kusu mina anan at leluxa at Leeme Silok, mina ngais ka be nedi kovisi dina rupot. 34 La do tara i roxo, neni na anan avot be ro at loogu ren, la kerepmo mi noxo ekip tangarang mi lebelemamao at ne Moroa.

La ti mo levelinga vetpes bok miga sue ia mumu i, aba vaase bok ba nimi min do nia ana vot pasa nimi.

Copyright information for `MMX