1 Corinthians 12

Leventamtaba At Loroonan Kaala

Luvutnetak mi luvurinuk. Ana anasa nimi mi leventamtaba boro at Loroonan Kaala, xusu mina xasep teren. Mikleklen i do ganoxa miga nemen ngan lavamolon kopmen tunuunu atdi; lempatpoovo moroa gam gomgo rinimi la ga sasar asoogong nimi. Kuren la mina ila mumu loklok at limixin do di nuunu ruturun kopla xopmen. Kuren la mina xasep do mo laradi, Loroonan Kaala at ne Moroa i suxuna i, kopmen noxo tong i do ‘Lasaxaek naba mu ne Iesu!’ Ketla laradi do Loroonan Kaala at ne Moroa na suxuna i, neni xusuk mun i epovo na tong i do ‘Iesu, neni Leeme Silok.’

Buaang laxantamtaba at Loroonan Kaala, ketla na axav i leventamtaba i laala mun boro at Legeso Roonan Kaala im taba i. Buaang leventaangas ti lok tooro lugugu at ne Moroa, ketla nedik axap ta gugu ri legesa Eme Silok. Buaang leventaangas axap ti lok lugugu at ne Moroa, ketla legesa Moroa mun im taba levelolos ti limixin axap ti lok leven gugu ren.

Moroa im taba legetgesa radi mi leventamtaba at Loroonan Kaala kusu rin ti lok tooro limixin axap di nuunu. Loroonan Kaala i lox epovo i xusu na raba laradi mi laramtaba ri tong asu Lagale Lavavang. La ti lara vetpes na mun legeso Roonan Kaala i raba i mi laramtaba ri tong axasep levelinga at ne Moroa. La ti lara manga na Loroonan Kaala mun i raba i mi lunuunu i lolos aleng. La ti lara manga i raba i mi lololos kusu ri lox avukat limixin mekmeres. 10 La Loroonan Kaala i raba lara mi lololos ti lok levempanga sangsangu; la ti lara vetpes manga i raba i mi laramtaba ri paase alii; la ti lara manga laramtaba xusu na ila levelinga dola ila meva, boro at Loroonan Kaala xopla xopmen. La ti lara manga Loroonan Kaala i raba i mi laramtaba ri paase mi levempapaase vetpes; la ti lara i raba i mi laramtaba xusu rik soxomus lavasuun ap mo levempapaase vetpes. 11 Ketla neni mun legeso Roonan Kaala ik lox i na; la im taba leventamtaba ri legetgesa radi ngan Loroonan Kaala i vara i.

Lavapaase Poovo Mumu Limixin Lotu Dina Ru Buru

12 Labantuxu at laradi i ruuna buaang laxangkot; ketla neni mun legesa bantuxu mi levengkot axap ik lok teren. Karisito ik lok mun kuren. 13 Nedik axap limixin, ne Moroa gara suxuna vam dik mi mo legeso Roonan Kaala ren, kuren mun la nedik at legesa bantuxu; mila nedik axap ataga lok ka vam legeso Roonan Kaala ne Moroa ga raba nedik min. Keke i do buaang atnedik limixin, la nedik at levengkot petpes, leventaba at leme Judaia, la leventaba xopmen di me Judaia, la leventaba nedi levenasaxaruki, la leventaba nedi luvuttadi mene xuren.

14 Kopmen tegesoxot mene xeneng at labantuxu, ketla buaang levengkot teren. 15 Mo luxangkedek i nemen ngan axa luxot at labantuxu; ixo epovo do luxangkedek na lok, ‘Nema xopmen lukngen, la kerepmo nema xopmen at labantuxu.’ 16 La lubaalung naba nemen ngan axa luxot at labantuxu; ixo epovo do du na lok, ‘Nema xopmen luxatli, kuren la nema xopmen lenep at labantuxu.’ 17 Dola labantuxu axap ni luxatli, ni naba ronga levelinga xereva? La do ni mun lubaalung, neni naba sumak kereva? 18 Ketla ne Moroa goxo lok labantuxu atdik kuren. Moroa ga lok li levengkot axap at labantuxu atdik kerekngan lavavara ren kusu naba lok kuren. 19 Mo do levengkot axap at labantuxu ni legesoxot mun, kopmen bok ba tabantuxu. 20 Ketla i ngan ta i do buaang levengkot ik lok at labantuxu, ketla nedi at legesa bantuxu mun.

21 Kuren la luxatli du noxo tong i ri lukngen do, “Maxok pakes tinumu!” La lavatlak noxo tong i ri luxangkedek do, “Axok pakes tinumu!” 22 Ketla ti levengkot at labantuxu, kopmen tugugu silok atdi, nedi di lok tooro aleng. 23 La ti mo levengkot at labantuxu atdik, ixo lox avukat do limixin dina ven i, dik di etara pe nunuan tinotno i; la ri levengkot bok at labantuxu atdik ixo lox avukat do dik ata paase mumu i, nedik di ke xepe i. 24 Ketla ti levengkot at labantuxu atdik i lox avukat, kerekngan lemeren dik, nedik dixo etara pe i. Moroa axa ga rudum li axap levengkot at labantuxu atdik kerepmo, kusu limixin dina lok ngangao ap mo levengkot at labantuxu limixin di lox abulubun i. 25 Kuren la kopmen tekarakat nak lok at labantuxu, ketla levengkot axap di elok tooro ela. 26 Mo do toxot at labantuxu na songot, nedi bok lentaba levengkot petpes at labantuxu diba songot eburu min. Mo do tenep at labantuxu na ruuna ka lomomo, mo bok levengkot petpes diba lok momo eburu min.

27 La kerepmo nemi axap mi lok ngan labantuxu at ne Karisito, la nemi getgesara mi lok ngan levengkot ap mo labantuxu ren. 28 Keneng at lotu Moroa gara soxolik ka vam limixin ti lok leven gugu; neni ga lok katling ka luvuttadi vavang ngan neni lugugu avot la i silok ti leventaba vetpes, la lara mumu ren luvuttadi vapaase alii, la lara mumu luvuttadi ri anasa limixin mi levelinga at ne Moroa; la lara mumu manga ren nedi di lok levempanga sangsangu; lara melemu manga nedi ne Moroa ga raba di mi lololos kusu ri lox avukat limixin mekmeres; leventaba ri lok tooro limixin, leventaba ri gomgo nga di la lara mumu rinotno leventaba ri paase mi levempapaase vetpes. 29 Kopmen nedi axap luvuttadi vavang, kopla luvuttadi vapaase alii, kopla luvuttadi loklox ase; kopmen nedi axap di ruuna lololos kusu ri lok levempanga sangsangu, 30 kopla ri lox avukat levenanmeres, kopla ri paase mi levempapaase vetpes, kopla ri soxomus lavasuun at levempapaase vetpes. 31 Ketla lebelen nimi na ngaongao aleng kusu mina ruuna ka mo leventamtaba i silok aleng.

Lara lavanga i lox avukat tinotno ri na leventamtaba, i lok keretna.

Copyright information for `MMX