aAis 22:13
bAis 25:8
cOse 13:14

1 Corinthians 15

Karisito Ga Roo Xat Pam At Lanmet

Luvutnetak mi luvurinuk. A vara i do mina doma amlong ti nom Lagale Lavavang, nenia aga vavang min tinimi; miga siam ka i la lunuunu atnimi ga ru alolos teren. Mo do lunuunu atnimi natmatkun teren, miba lok ka lorooro ren. Ket do kopmen mina nuunu at levelinga xerekngan nia aga vavang min, lunuunu atnimi naba lok ngan lavanga gamasa.

Nia aga raba nemi mi levelinga nia aga lok kaka i boro at ne Karisito. Mo levelinga ga lok keretna. Karisito ga uu xorop ti loklok kakapmek atdik ngan Lovoang Kaala i tong i. La digak mir i, la at laaleng sepsev avantun ni ga roo xat amlong manga, kerekngan Lovoang Kaala i tong i. La ni ga ru asuvos ti ne Pita la melemu rinedi lasangaun mi legepura luvuttadi vavang. La melemu bok neni ga ru asuvos tinedi lavalimo sangaun kobot (500) mi lenep mixin diga nuunu ren. Leventaba atdi digara met pam ketla buaang atnedi move di rooro. La melemu neni ga ru asuvos ti ne Jems la tinedi bok luvuttadi vavang axap. Melemu rinotno ni ga vot asuvos ba ria ngan ta laxadede nenen i visik kubun i.

La nenia a lok ngan laradi gamasa maxopok atnedi luvuttadi vavang. Kopmen ana epovo xusu limixin dina tong ia do laradi vavang, mila nia agap sev asongot limixin nuunu at ne Moroa. 10 Ketla ne Moroa ga lox asuusu langsangan letaba nabalamu ren tia la ni ga lox amaxar ia, i ngan ta laradi vavang; la maxeneng at na letaba nabalamu ni ga raba ia min, laxampanga nunuan ga ravasu at lorooro rak, i ngan aga gugu lolos tinotno rinedi lentaba luvuttadi vavang. Ketla xopmen lololos tarak na nia aga gugu min, ketla letaba nabalamu at ne Moroa mo ga lox ia xusu a epovo ana gugu lolos. 11 Kuren la kopmen na lok petpes, dola nia aga vavang kopla luvuttadi vavang diga vavang tinimi; nema axap maga vavang mene mi legesa vavang la na Lagale Lavavang pam nemi miga siam kaka i.

Laxakatu Kaxat Amlong At Ne Karisito La Atnedik Bok

12 Lagale Lavavang maga vavang min tinimi dola, Moroa gara lox arooro xat amlong pam ne Karisito ri lorooro. Kuren la kopmen na ruturun i ngan ta i mo leventaba atnimi di tong i do limixin digara met pam, di noxo roo xat amlong. 13 Mo do i ruturun do limixin di met la di noxo xatu kaxat amlong ti lorooro, i ven ngan tai do ne Moroa goxo lox arooro amlong ne Karisito. 14 La mo do ne Karisito goxo roo xat amlong at lanmet, kopmen tavasuun tinotno ren kusu mana vavang tinimi la lunuunu bok atnimi ba lok ngan lavanga gamasa. 15 La mavana at nai, i ven ngan ta i do maga xarang taba ne Moroa do neni ga lox arooro amlong ne Karisito basinge lanmet; mila do i ruturun do limixin diga met pam di noxo roo xat amlong ti lorooro, i lox asuusu i do ne Moroa bok goxo lox arooro xat amlong ne Karisito. 16 Do xopmen taxakatu kaxat amlong, ne Karisito bok kopmen gi toxo roo amlong. 17 La do ne Karisito xopmen goxo roo amlong, lunuunu atnimi keneng at ne Karisito xopmen na ruturun; la laxakapmek move atnimi ik lok, ne Moroa xovisi na doxoma xape i. 18 La tinedi bok diga met mi lunuunu atnedi at ne Karisito, nedi bok diba seeve, do laxakatu amlong at ne Karisito xopmen na ruturun. 19 La mo do lodoxoma voovo atdik ti ne Karisito at na mun lorooro la kopmen ti lorooro melemu, lebelen tuntun at limixin tinedik naba silok ti lentaba vetpes.

20 Ketla at na levenaleng, na levelinga i ruturun tinotno, Karisito gara roo xat amlong pam at lanmet ngan livipisik avot tinedi dinaba roo xat amlong; la kerepmo maklen tinotno i do mo limixin nuunu diga met pam, dinaba roo xat amlong bok. 21 Lanmet ga vot ti nai lavatbung menemen mumu mene legesa radi; kuren la lorooro xat amlong bok atnedi digara met pam i vasuun mun at ne Karisito, 22 mila keneng mun at laxakapmek at ne Adam ga raba avolo dik min. Kuren la lanmet ga vubeles mu limixin axap; la keneng at lixitkis esogo atdik mi ne Karisito, limixin axap di nuunu, do dina met, dinaba roo xat amlong. 23 Ketla nedi getgesara dinaba roo xat amlong at levengkonaleng axa atdi. Avot tinotno ne Karisito ga xatu kaxat amlong, la at laaleng neni namlong ude xopok, nedi ba mo limixin digara met pam mi lunuunu atdi xeneng at ne Karisito, dinaba roo xat amlong. 24 La melemu ba, laxavaxap at na lavatbung menemen naba vot; Karisito naba ruuna lololos mavana at levelolos atnedi luvuttadi amgomgo, labaroonan kapmek, la lavaeme silok axap diga sok tixirixes ne Moroa; la neni naba raba avolo ba Linintoo ren ti ne Moroa ne temen. 25 Karisito naba nemen ngan laradi gomgo se ne Moroa naba sev asi axap nedi dit kis munepen min la na lok li di maxopok at luxangkedek at ne Karisito. 26 Moroa naba lok kepe be nedi axap la melemu ni na lok kepe axap ba lanmet. 27 I ngan Lovoang Kaala i tong i do, “Moroa naba lok li levempanga axap maxopok at luxangkedek teren.” Kopmen lavasuun teren do ne Moroa bok nak lok maxopok at ne Karisito, ketla ne Moroa ga lok li levempanga axap maxopok at ne Karisito. Na i xasep tinotno. 28 Do levempanga axap ne Moroa na lok li i maxopok at loklok tatao at ne Karisito, melemu ne Karisito, nitna naba lok li i maxopok at ne Moroa; Karisito ga lok li levempanga axap maxopok teren la ne Moroa nabak lok tatao axap mavana atdi.

29 Dola xopmen taxakatu kaxat amlong, kopmen tavasuun teren kusu nemi mi lok ka lesep susu ridi limixin digara met pam. Do labarongan di noxo roo xat amlong, na loklok atnimi noxo lok tooro di. 30 La kereva ba nema. Do xopmen taxakatu kaxat amlong, tila ba nema ma nemen keneng at losongsongot mumu lugugu at ne Moroa at levenaleng axap? 31 Luvutnetak mi luvurinuk. At levenaleng axap nia a vekip tangarang mi limixin dik lok do dinap sev amer ia. La a lok momo rinotno atla nemi mi nuunu saparap ne Iesu Karisito, Leeme Silok atnedik la na lomomo i sok lodoxoma rak kusu ana tong asu i na levelinga rinemi. 32 La do xopmen taxakatu kaxat amlong, kopmen tavasuun teren do agara esep eburu vam mi levempanga esep mi lavanuet kangkedek atdi ro Epesas. La do labarongan di noxo roo xat amlong, nenia aba ke xepe lugugu at ne Moroa la aba mumu asu loklok di tong i xeretna,

“Ata anan la ata inin mila dik ataba met soso mun.” a 

33 Mina lok tatao nimi xusu tara noxo sar asoogong nimi ri laxakapmek kerepmo. La mina xasep do limixin kapmek diba lok kapmek luruptuvuk nunuan atnimi. 34 Minamlong ti levendoxoma nunuan atnimi la mina xap basinge leveloklok kakapmek atnimi, mila lentaba atnimi xopmen dina xasep nunuan at loklok at ne Moroa. A vaase i na xusu miba mangan.

Loklok Ti Labantuxu Maxat At Lanmet

35 Ketla tentaba diba sue, “Labarongan dinaba roo xat ti lorooro xereva? Labantuxu salai dinaba ruuna xaka i?” 36 Nemi laxampanga rangtangku. Do tara itlo liit panga ro at laxangka, noxo su xat soso do xovisi na mang. 37 La lavanga utlo li i at laxangka, ni liit panga gamasa mene nga, at lavatpiao, kopla tevempanga vetpes; kopmen unatlo axap nom luuna xusu naba su xat. 38 La ne Moroa xa ik lok katling mo liit kusu na su ngan lodoxoma ren ti mo liit panga. La neni xa ik lox asuusu mo liit naba su ngan luuna axa ap mo liit.

39 Labantuxu at levempanga axap di rooro xopmen dina epovo; laradi i ruuna labantuxu vetpes, la levempanga mi lavanuet kangkedek i lok petpes la ti lavapixa i lok petpes la ti lenmat i lok petpes.

40 La levempanga di nemen to vana at laxalibet, di lok petpes ti levempanga mede xopok. Levereven ap mo levempanga boro vana at laxalibet i lok petpes ti levereven at levempanga at na lavatkangka. 41 Levereven at laxangking i lok petpes; la lagaaling levereven petpes teren, larapenti levereven petpes la kantubu at nom larapenti, leventaba i lok petpes bok.

42 Naba lok mun kuren do nedi digara met pam, dina roo xat amlong ti lorooro. Do dik mit lorongan, neni i mau. Do i roo xat, neni xopmen na mau bok ba. 43 Do dik mir i, neni i ven kapmek. La do neni i roo xat, neni naba ven avukat tinotno la na lolos. 44 Do dik mir i, neni labantuxu mene. La do na roo xat, ni labantuxu maxat boro at Loroonan Kaala. Nedik di ruuna labantuxu at na lavatbung menemen, kuren la i epovo bok do ata ruuna ka labantuxu maxat boro at Loroonan Kaala. 45 I lok ngan Lovoang Kaala i tong i do, “Laradi avot ne Adam, ne Moroa ga rudum li i ngan laradi rooro.” Ketla ne Adam mumu pit, neni ne Karisito, im taba lorooro at loroonan kusu ridik. 46 Kopmen loroonan nam gomgo avot, ketla labantuxu avot la melemu ba loroonan. 47 La ne Adam, ne Moroa ga rudum li i mi laxakup at laxangka, ketla ne Karisito, neni ga si boro vana at laxalibet. 48 Nedik di ruuna ka labantuxu ne Moroa ga rudum i mi laxangka ngan laradi avot ne Adam; la dik ataba ruuna ka bok labantuxu ngan at ne Karisito, ni ga si min boro vana at laxalibet. 49 La dik ataga ruuna ka labantuxu at laradi at na lavatkangka. La melemu levereven at labantuxu maxat atdik naba lok ngan levereven at labantuxu at laradi ga si boro vana at laxalibet.

50 Luvutnetak mi luvurinuk. Nia a tong tuturun i do labantuxu atdik at na lorooro xopok, kopmen na epovo ri vubeles at Linintoo at ne Moroa. La levempanga i mau, kopmen na epovo xusu na lok ka tenep at lorooro avolo.

51 Mina ronga avukat na levelinga ga nemen alipe. Buaang atnedik kovisi di noxo met, ketla do laangelo na mas luru xusu ri lok katling laxavaxap at na lavatbung menemen, soso ap mo mun loxonaleng nedik ataba unus. Naba lok soso mun ngan ta do laradi i vamsi, mila do dina mas luru, labarongan axap dinaba roo xat la kopmen di noxo met bok ba la nedik axap ataba unus. 53 Labantuxu do i mau, ni naba ngan ta labantuxu xopmen na mau. La labantuxu i epovo na met, ni naba milik ngan ta labantuxu ixo epovo na met. 54 La mo do levempanga na ravasu xerepmo, la lololos at lorooro na sev asi lololos at lanmet, neni na lavanga naba lox asorun levelinga at Lovoang Kaala i lok keretna,

“Dira vas asi axap tinotno vam lanmet.” b 

La i lok bok,

55 “Moroa ga lox axap pam lanmet la ga lok kepe lololos teren tik lox asongot la ti lok lainbulu.” c 

56 Lanmet i lok ka lololos tik lox asongot limixin boro at laxakapmek, la laxakapmek i lok ka lololos boro at Lenavolo. 57 Ketla ata emi asu mi ne Moroa mila neni ga raba dik mi lorooro la ga lok pes lanmarat at lanmet basinge dik. Ni ga lox i na xeneng at Leeme Silok atdik ne Iesu Karisito.

58 Kuren la luvutnetak mi luvurinuk orong, mina tu lolos at levelinga at ne Moroa la nemen tara ta sar asoogong ka nimi basinge luruturun teren. Minak lox angtang amisik at leven gugu atnimi ri Leeme Silok, atla mikleklen i do leven gugu atnimi ri Leeme Silok, ni noxo lok ngan lavanga gamasa.

Copyright information for `MMX