aAis 64:4
bAis 40:13

1 Corinthians 2

Lavavang Mumu Laniu At Ne Iesu Karisito

Luvutnetak mi luvurinuk. Nenia agat pas udo saparap nimi xusu ana vavang tinimi mi levelinga at ne Moroa, kopmen lavapaase rak goxo sixit nunuan ngan laradi vapaase, la lavavang tarak goxo umsu mi lakleklen at na lavatbung menemen. At levenaleng nenia aga nemen eburu minimi, aga doxoma i do ana ke xepe be levelinga axap la ana vavang kusuk be mi laniu at ne Iesu Karisito ga uu at laxaba. Nenia aga rupot avot dom atnimi, la lengkot tarak goxo lolos avukat la aga dede aleng mi lanmarat; la leveloklox ase rak mi lavavang tarak kopmen goxo ravasu mi tengkolinga nunuan mi lakleklen at na lorooro. Ketla levelinga rak ga lox asuusu lolos at Loroonan Kaala at ne Moroa. Nia aga lox i xuren kusu lunuunu atnimi saparap ne Iesu Karisito noxo mumu levendoxoma at limixin at na lavatbung menemen, ketla na nemen kusuk at lolos at ne Moroa.

Levendoxoma Nunuan Loroonan Kaala Im Taba Nedik Min

Tinedi mo dira mukun pam keneng at lunuunu, nema luvuttadi vavang, ma paase ridi mi lakleklen at ne Moroa, ketla kopmen lakleklen at na lavatbung menemen, kopla levendoxoma at luvuttadi amgomgo at na levenaleng; mo lolos atnedi naba sonao kot. Maga tong asu Lagale Lavavang at ne Moroa rinimi, mo ga nemen alipe. Moroa gara tong li vam i xusu naba lox aurut levenasen atdik, avot ti loklok li at na lavatbung menemen. Kopmen teta at luvuttadi amgomgo at na lavatbung menemen ga xasep at na levelinga nunuan at ne Moroa. Mo do nedi gitaklen i, di gitoxo vaxarem Leeme Silok to vana at laxaba. Neni i ruuna lisisixam silok. Ketla levelinga at Lovoang Kaala i lok keretna,

“Buaang leveloklox anarong, ne Moroa ga gagas min tinedi di balamu aleng i; tara goxo ven mo leveloklox anarong kopla gita ronga i, la tara goxo doma ka i do naba vot.” a 

10 Ketla ne Moroa ga lox axasep pam na levempanga ridik keneng at lololos at Loroonan Kaala. Loroonan Kaala i sin axasep lempanga axap, eburu mi levendoxoma alipe at ne Moroa. 11 At lorooro at laradi, loroonan axa ren ikleklen lempanga i nemen keneng at lorooro ren; la kerepmo Loroonan Kaala mun at ne Moroa ikleklen avukat ne Moroa. 12 La nedik, kopmen dik ta goxo ruuna ka mo lodoxoma at limixin mede xopok at na lavatbung menemen. Ketla nedik taga ruuna ka Loroonan Kaala ne Moroa ga riki i ri lox ase dik, kusu atabaklen leveloklox anarong, ne Moroa ga raba gamasa vam dik min. 13 Na lavavang atnama luvuttadi vavang ma vavang min, kopmen at limixin akleklen at na lavatbung menemen, ketla lavavang atnama boro xa at Loroonan Kaala mo ga anasa nama min. La kerepmo mak soxomus levelinga mumu ne Moroa rinedi di ruuna Loroonan Kaala. 14 Ketla laradi do kopmen na ruuna Loroonan Kaala xeneng at lorooro ren, neni ixo epovo ri siam ka levelinga at Loroonan Kaala at ne Moroa. Neni xopmen na xasep nunuan teren; i lok ngan lempanga gamasa rin, mila Loroonan Kaala xopmen na nemen keneng at lorooro ren kusu ri lok axasev i rin. 15 Ketla laradi mun Loroonan Kaala i nemen keneng at lorooro ren, neni i epovo xusu na ila mumu lempanga axap; do taradi xopmen na ruuna Loroonan Kaala, ixo epovo xusu na ila mumu laradi i nuunu. 16 I ngan levelinga at Lovoang Kaala i lok keretna,

“Nege iklen lodoxoma at ne Moroa? Nege i epovo xusu naba anasa i?” b 

Ketla nedik mun ta xasep pam at lodoxoma at ne Karisito.

Copyright information for `MMX