1 Corinthians 4

Leven Gugu At Luvuttadi Vavang

Kuren la mina doxoma mumu nema luvuttadi vavang, ma lok ngan lavasaxaruki at ne Iesu Karisito, la nema mak lok tatao losoxovo at ne Moroa mo ga nemen alipe, kusu mana paase axasep limixin min. Lara lavanga i silok aleng ti laradi loklok tatao at levelinga at ne Moroa i lok keretna; neni na lok amisik lugugu ruturun ti laradi gomgo ren. Nenia, axo doxoma solo i do nemi kopla limixin at na lavatbung menemen mina ila mumu ia, atla nia axo ila mumu lorooro rak. Nenia axa aklen i do kopmen taxakapmek i nemen at lorooro rak, ketla anai xopmen na lox asuusu i do nenia laradi sep mus at ne Moroa; ketla Leeme Silok naba viila mumu lugugu rak. Kuren la nemen mita ila mumu avot tara ri mo laaleng do naba vot. Laaleng ti ila mumu loklok at limixin noxo vot se Leeme Silok nabamlong; la neni naba lok li lempanga mo nga ik lok at lamain bonot ti laxasep, la naba lox asaxaven levendoxoma i nemen alipe ro xeneng at lorooro at limixin. Ap mo laaleng Moroa naba lox asuusu leemi asu ri limixin.

Luvutnetak mi luvurinuk. Ara vaase poovo vam minema’ mi ne Apolos, i ngan nema’ luampoovo ri nom axav i levelinga nenia a malagan i. La maxeneng at nom i, minaba xasep ap mo levelinga i lok keretna, ‘Mina ila mumu avukat levelinga at luvuttadi amgomgo, kerekngan Lovoang Kaala i tong i.’ La kerepmo mi noxo xip aurut taasen at tara taradi gomgo atnimi la mi noxo lox asi taradi gomgo vetpes. Kopmen tara ga lok li nimi xusu mina silok ti mo lentaba vetpes. Moroa ga raba nimi mi nom lempanga axap mi ruuna i. Kuren la nemen mita xip aurut levenasen atnimi min, mila nom lempanga mi ruuna i ne Moroa ga raba nimi min.

Pol Ga Paase Axalat Ti Limixin Me Korin

Kereva, mi doxoma i do mira mukun pam at lorooro atnimi at ne Iesu Karisito? La kerepmo mira doxoma i do nemi mi lok kaka vam leveloklox anarong axap. La mira doxoma i do mi silok ngan lavaorong silok, la mi silok tinema luvuttadi vavang. Do nemi mina silok kerepmo, nenia a doma i do naba lox avukat tinotno, atla nema bok mabat kis eburu minimi ngan lavaorong silok. Ketla nema xopmen mana silok kerepmo, mila nia a doma i do ne Moroa ira lok li vam nama, luvuttadi vavang, kusu mana ruuna levenasen gamasa at lemeren limixin. Ma lok ngan laradi xokoxo, luvuttadi amgomgo di sev amer i ro at lemeren limixin axap at na lavatbung menemen la melamgo at lubung angelo. 10 Limixin at na lavatbung menemen di tong i do nema luvuttadi baulang mun, mila ma gugu at laasen at ne Iesu. Ketla nemi mi lok do mi nemen avukat keneng at ne Iesu. Limixin at na lavatbung menemen di lok do nema luvuttadi gamasa la nemi mi doma i do nemi limixin silok at lorooro at ne Iesu. Limixin at na lavatbung menemen dik lox abulubun nama, ketla dik lok ngangao atnimi. 11 At na laxanaleng, nema luvuttadi vavang, maga roxo la maga minu; maga etara lenbantamon tekoxorop; la kopmen nom mene i, limixin digap sep bok nama la goxopmen temenemen aulis atnama rik lok mamas teren; 12 la maga gugu lolos kusu mana lok kaka levempanga ri lok tooro lixitkis atnema. Diga vaase xakapmek tinama, ketla maga sing ne Moroa xusu na lox anarong nedi. Diga lox asongot nema, ketla maga momo ri xip tutu min. 13 Diga vaase xapmek tinema, ketla maga vorang mun i mi levelinga nunuan. Nema ma lok ngan mun luvuttadi baava; la nema ma lok ngan ta laxanbibiong dip kupku xepe i at na lavatbung menemen ise at na levenaleng.

14 A malagan i na levelinga rinimi, kopmen do ri lox amangan nimi; a malagan i xusu ri vaase aronga nimi; nia a balamu nimi ngan nemi luvutnuruk tinotno. 15 Keke i do mi ruuna buaang luvuttadi loklok tatao, ketla mi ruuna mun legesara ngan ne temen nimi. At lorooro atnimi at ne Iesu Karisito, nenia a lok ngan ne temen nimi, atla nia aga vavang tinemi mi Lagale Lavavang. 16 Kuren la a sing lolos nemi do mina mumu asu loklok tarak. 17 Lavasuun mun at nai la nia ara riki aonon pam ne Timoti udom saparap nimi. Neni ne nuruk tinotno at laasen at Leeme Silok, la a balamu i. Neni laradi ruturun at lorooro ren keneng at Leeme Silok. Neni naba vaase axasep manga nimi mi loklok tarak keneng at lorooro at ne Iesu Karisito. La loklox ase ren i epovo mi loklox ase rak kerekngan aga lox ase limixin min at laraugu lotu at lengkot axap.

18 Lentaba atnimi mo di doma i do nedi di silok aleng, la di doxoma i do nenia noxo vot pasa bok ba nimi xusu ri vaase sok di. 19 Mo do Leeme Silok na vara i, anaba vot pasa soso nimi xusu nia anaba xasep at lempanga salai luvuttadi loklox asilok di tong i, la nia anabaklen i do di ruuna ruturun pam lololos at Leeme Silok. 20 Nia anaba ven kibis di mila lanat at Linintoo at ne Moroa i ruuna lololos at ne Moroa maxeneng at lorooro ren, la xopmen lavapaase gamasa mun. 21 Kereva, mira lox akmokso vam lorooro atnimi? Do xopmen, nenia aba vot mi laadas. Do mina ronga res tarak, nenia aba vot mi labalamu la loklox atnaasan.

Copyright information for `MMX