1 John 1

Lavapaase Im Taba Lorooro

Nema luvuttadi vavang ma malagan li na levelinga mumu mo laradi ga rooro avot ti luruntudum li at na lavatbung menemen. Nema maga ronga levelinga ren la maga ven i mi levengkatli atnema, maga reven kisip lugugu ren la maga long tu ren. Neni lavapaase im taba lorooro la ma vavang min tinimi. Mo laradi im taba lorooro ga vor asuvos, nema maga reven i la ma tong asu i rinimi. La ma vavang bok min tinimi, neni lavasuun at lorooro avolo, la neni gat kis esogo eburu mi ne Temen dik la melemu ga vor asuvos tinama. Lempanga axap mo laradi ga lox i, maga ven pam i, la maga ronga vam levelinga ren, ma vavang bok min tinemi, kusu nemi minat kis esogo eburu minema kerekngan nema mat kis esogo mi ne Temen dik la mi ne Nitna bok ne Iesu Karisito. Nema ma malagan na levelinga nunuan tinimi kusu lomomo atdik naba umsu aleng.

Lavatpas Atdik Keneng At Laxasep

Na levelinga nema mara ronga vam i boro at ne Nitna la ma vavang min tinemi keretna, Moroa neni laxasep la kopmen lamain nak lok teren. La mo do tara atdik na lok do it kis esogo mi ne Moroa, ketla lamain i umsu keneng at lorooro ren, neni laradi xaxarang la lorooro ren kopmen nak mokso la kopmen na sixit emu mi levelinga ruturun. Ketla mo do nedik ta nemen at laxasep, kerekngan ne Moroa i nemen at laxasep, nedik atat kis esogo eburu; la lada at ne Iesu, nitna ne Moroa i lox adadat nedik basinge levengkakapmek axap.

Dola tara na lok keretna, “Kopmen taxapmek tarak,” neni i xarang axa i, la levelinga ruturun kopmen nak lok teren. Ketla mo do nedik ta soxomus asu laxakapmek atnedik ti ne Moroa, neni naba doxoma xape i la neni naba lox adadat nedik basinge leveloklok kapmek axap atdik, mila neni Laradi Ruturun la Leeme Mokmokso. 10 Dola tara na lok keretna, “Nenia a goxo lok taxapmek,” neni mo laradi i lox asuusu i do ne Moroa i ngan leeme xaxarang, mila ne Moroa ga tong i do limixin axap di lok laxakapmek. La do mo laradi i lok kerepmo, levelinga at ne Moroa kopmen na nemen keneng teren.

Copyright information for `MMX