bAis 28:16
dAis 8:14
eAis 53:9

1 Peter 2

Kuren la mina lok pes laxaloklok kakapmek basinge nemi; la nemen bok ba mita xaxarang, kopla mina lili aage levelinga, la mina reven peves, kopla mina lox asi tara mi levelinga. Minak lok ngan laxamdak mumulum, no di vavara inin amisik levendan tus at loroonan, atla do mina inin amisix i, minaba vee mukun at lunuunu atnimi la mina roo suu. I ngan Lovoang Kaala i tong i xeretna,

“Nemi xa miga long terex i do lebelemumu at Leeme Silok i lox avukat.” a 

Luat Too

Mina vot parap Leeme Silok, neni luat too no limixin diga lu xepe min do goxo epovo ri lok tugugu, ketla ne Moroa ga soxolik kaka i ngan luat, luunun teren i silok aleng la i epovo ri lok tugugu. Nemi bok mira lok ngan pam larauat too rip kip gu, la ne Moroa xa i xip loogu laplavang minemi, kusu nemi minaba gugu ngan lavamaasa at ne Moroa; la minam taba i mi leventamtaba at loroonan mo ne Moroa naba siam kaka i xeneng at ne Iesu Karisito. I ngan Lovoang Kaala i tong asu levelinga at ne Moroa xeretna,

“A soxolik kaka luat i ruuna luunun i silok aleng la anaba lok li i ngan luat ti lemesuluk at lemenemen Saion la do nege na nuunu ren, neni kopmen tinotno noxo ruuna ka lainmangan.” b 

Mo luat neni i silok at levendoxoma atnemi limixin mi nuunu ren; ketla tinedi dixo nuunu ren, i lok ngan Lovoang Kaala i lok keretna;

“Mo luat luvuttadi gugu gu diga lu xepe min do i lok kapmek, ga ravasu ngan luat lugugu ren i volo rinotno mo larauat axap.” c 

La loxot bok at Lovoang Kaala i vaase xeretna,

“Na luat naba lok limixin kusu dina sak kikixin la naba lox asubu nedi.” d 

Di sak kikixin atla xopmen dina nuunu at levelinga at ne Moroa; anai i epovo mi lavavara at ne Moroa rinedi.

Ketla nemi lavaanat soxolik ka; nemi lavamaasa at loorong silok, la nemi lubung mixin dadat la nemi limixin at ne Moroa akmokso. Neni ga soxolik ka nemi xusu minaba lox asuusu lugugu avukat teren, neni ga ro xaka nemi boro xeneng at lamain bonot la uto xeneng at laxasep maraanu ren. 10 Ketla avot be at na, nemi goxo ngan limixin at ne Moroa, ketla amo nga nemi mi lok ngan limixin teren; i ngan bok gano nemi mi goxoklen lebelemumu at ne Moroa, ketla amo nga, mira ruuna ka vam lebelemumu ren.

Lavasaxaruki At Ne Moroa

11 Larapen tangas orong tarak. A sing nemi mi lodoxoma axap tarak. Nemi mi lok ngan mun limixin kadiong de at na lavatbung menemen, kuren la mina ru asepsu basinge leveloklok kakapmek at labantuxu, atla neni na leveloklok i vesep eburu mi labaroonan atnemi. 12 La minap tuvuk avukat at lemeren nedi lavamolon, la mo do dina sok taba parang nemi mi toloklok kakapmek, nedi dinaba ven kibis ba leveloklok nunuan atnemi la dinaba emi asu mi ne Moroa at laaleng potpot teren.

13 Minang tonga res atnedi axap luvuttadi amgomgo, limixin di lok li di, mila Leeme Silok i vara i xuren. Minang tonga res at loorong silok at lenep kangka atnimi, neni imgomgo ri limixin axap. 14 La minang tonga res bok atnedi luvuttadi amgomgo at levenep silok, loorong silok ik sak tiki nedi xusu dina lox asongot nedi dik lok laxakapmek la dina emi asu minedi dik lok luvukat; 15 mila ne Moroa i vara i do minak lok leven gugu nunuan kusu minaba vamus levelinga gamasa at luvuttadi rangtangku. 16 Minap tuvuk avukat ngan limixin sepmus at ne Moroa; la nemen gat miguta se bopbop pe laxapmek atnemi mi leveloklok sepse at lemeren mun at limixin; ketla minap tuvuk ngan lavaanat saxaruki at ne Moroa. 17 Mina lok ngangao bok at limixin axap, la mina balamu limixin nuunu; la mina lok ngangao at ne Moroa la at loorong silok bok.

Lampoovo At Losongsongot At Ne Iesu

18 Nemi lavasaxaruki. Minak lok mu asu levendoxoma at lubung amgomgo atnemi la mina lox asu rinotno loklok ngangao atnemi rinedi, kopmen do mina lok ngangao xusuk atnedi di belemumu nemi, ketla tinedi bok do di vaat tinemi. 19 Moroa naba lox anarong nemi do dina lox asongot nemi mumu mun loklox avukat atnemi na mu asu lodoxoma ren. 20 Ketla mi noxo lok kaka loklox anarong do dina sep nemi xusu laxakapmek nemi miga lox i. Ketla do mina lok ka mun i at loxonaleng mina lok loklox avukat la dina lox asongot nemi xusu nen; Moroa naba lox anarong ba nemi do mina tu tuxuruxun at na levenaleng di lox asongot nimi. 21 La ne Moroa ga ro xaka nemi mumu i na langas at losongsongot, mila ne Karisito axa ga suma losongsongot tinemi la ga lok taba nemi mi na langas, kusu minaba mumu asu lenaim teren.

22 “Neni goxo lok bok tekakapmek, la teta goxo ronga asu bok tekaxarang ga ravasu at lungusno ren.” e 

23 At loxonaleng diga paase aksaksa rin, neni goxo vorang di mi teloklok bok kuren; la at laaleng neni ga lok kaka loklox asongot, neni goxo lok tepanga, ketla neni ga lok li levendoxoma axap teren at ne Moroa neni laradi rongtonga linga la na lugugu ren ik mokso rinotno. 24 Ne Karisito axa neni ga xip leveng kakapmek atnedik keneng at labantuxu ren uto at laxaba kusu nedik tanaba sepmus basinge loklok kakapmek atnedik la ata rooro tik lok leveloklok ik mokso. La nemi mi lox avukat pam mumu mun laranin kooxing teren. 25 Nemi miga lok ngan laxasipsip diga soronga, ketla ana nga, migaramlong pam kusu mina mumu asu Lamgomgo atnemi la neni laradi loklok tatao bok at lorooro at loroonan atnemi.

Copyright information for `MMX