1 Peter 3

Lara Koenasun

At na mun langas bok la nemi lavakin minang tonga res at levendoxoma at lavatlok atnemi, kusu do tentaba atnedi do dixo nuunu at levelinga at ne Moroa, loklok mun atnemi naba lok nedi la dina nuunu. La ixo epovo bok do minaba vaase axa toxolinga ri lox amlong levendoxoma atnedi. Dinaba ba gili mun lorooro atnedi mumu mun loklox avukat la loklok ngangao atnemi rinedi. Nemen gat migutak lok kaka leveloklok tooro me maxamang kusu ri lok nemi mina milik maraanu, ngan langas mik lox i at levengkabinim at lempatlak atnemi, kopla levenpun mi vonga i la levesingsiga ming siga i. Ketla lorooro atnemi nak milik maraanu la mina umsu mi loklox atnaasan i lok nunuan aleng, neni mo loklok i silok aleng ti ne Moroa. Naba lok ngan lavakin mokmokso me gano digak lok li levendoxoma atnedi at ne Moroa la diga sisinang amaraanu nedi mila diga mumu asu levendoxoma at lavatlok atnedi. Ne Sera gak lok kerepmo; neni gang tonga res at ne Abaram, kuren la neni ga toro rin do leeme silok teren. Nemi miba lok ngan laxaalik teren do minak lok luvukat la mi noxok marat at tepempanga.

Kuren pam la nemi bok lavatlok, mina ekilen ela mi levempakpakes at lavakin atnemi la minaklen avukat box i do nedi dixo ruuna tololos solo la mina lok tooro nedi. Mina raba nedi mi loklok ngangao mila nemi buru axap minaba ruuna xaka laramtaba i rooro boro at ne Moroa. Mina mu asu i na levelinga xusu, kopmen tekarakat naba lok pe levesingising kantubu atnemi lavatlok eburu mi ne Moroa.

Losongsongot Mumu Leveloklox Avukat

Ti lox axap na levelinga xeretna, nemi axap mina ruuna legesa doxoma eburu mi legesa sumsuma xeretna; mina doma mumu nedi di ruuna levenmumuat, la mina ebalamu ela ngan nemi loxoeton la mina belemumu nedi la mina lox asi nemi. Nemen gat miguta vorang laxapmek mi laxapmek kopla mina vorang lavapaase kapmek mi lavapaase kapmek bok; ketla mina vorang i na leveloklok mi loklox anarong, atla loklok anarong neni lavanga ne Moroa ga xaape xusu neni naba raba nemi min at laaleng neni ga ro xaka nemi. 10 I ngan Lovoang Kaala i vaase i xeretna,

“Do nege i vara i xusu na ruuna lorooro nunuan, la i vara i xusu neni na ven levenaleng avukat, neni na ke xepe lavapaase kapmek, la na xav i at laxaxarang.
11 La neni na ke xepe laxakapmek la nak lok luvukat, la neni na lolos ti lok ka limila keneng axap at leveve ren. 12 Leeme Silok i reven aratao limixin mokmokso la ing tonga res at levesingising atnedi; ketla neni im taba arulu nedi dik lok laxapmek.” a 

13 Nege naba lox asongot parang nemi do levendoxoma atnemi naplivi rik lok luvukat? 14 Ketla do mina lok kaka loklox asongot mumu loklok avukat mi lox i, minaba ruuna xaka bok leveloklox anarong. Kuren la nemen gat miguta marat at teta, kopla mina bulu. 15 Ketla keneng at lorooro atnemi mina lok ngangao at ne Karisito, atla neni Leeme Silok. Mina gagas at levenaleng axap ti porang levesusue at limixin at levenaleng dina susue nemi mi levendoxoma lolos atnimi saparap ne Karisito. 16 Ketla mina vaase ridi mi lumulus la loklok ngangao, la lorooro atnimi nak lok nunuan kusu do dina paase xapmek mumu lorooro avukat atnemi keneng at ne Karisito, dinaba mangan at levelinga kapmek nedi di paase i. 17 I lox avukat kusu mina xip kaka losongsongot at leveloklox avukat, do neni lavavara at ne Moroa xuren, la kopmen do at leveloklok kakapmek. 18 Karisito ga met gesara mene nga ri ru korop ti laxakapmek axap atnimi, la neni laradi avukat ga met ti rukun levesongsongot ti limixin di lok laxakapmek, kusu ri lam kaka nemi uto saparap ne Moroa. Diga sev amet labantuxu ren, ketla Loroonan Kaala ga lox aroo xat amlong i; 19 la at lorooro xat at loroonan teren, neni ga vavang ti limixin, labaroonan atnedi gak lok at loxokoxo.
Na lemenemen di so asen i do Edesa.
20 Nedi labaroonan at na limixin digang tonga xepe ne Moroa at levenaleng neni ga ngangais atnaasan nedi at levenaleng ne Noa ga gugu lavattaaxup teren. Keneng teren ga lavanuan mun nedi diga roo suu basinge laran, 21 la ga lok ngan neni lampoovo at lesep susu, ana nga nemi bok mi roo suu ren. Ni xopmen do rit gos kepe laxakapmek at labantuxu, ketla neni laxakaape mi lox i ri ne Moroa mi lodoxoma avukat. La neni na i lox aroo nemi mumu mun lorooro xat amlong at ne Iesu Karisito, 22 la neni gara urut pam uto vana at laxalibet, la amo nga ik lok at lekngen tino at ne Moroa, la neni lamgomgo at lubung angelo axap eburu mi luvuttadi loklok tatao la limixin lolos boro vana at laxalibet.

Copyright information for `MMX