1 Thessalonians 3

Timoti Gat Pas Uto Tesalonia

La ma goxo epovo do mana ngangais gamasa ro Atens, la maga siam do nema’ mi ne Sailas manak lok be ro Atens, la maga riki ne Timoti kusu na vosiga nimi. Neni i lok ngan neton dik la neni bok ik lok lugugu at ne Moroa, la i vavang mi Lagale Lavavang at ne Iesu Karisito. Maga riki i xusu neni na lox alolos lunuunu atnimi la na paase tooro nimi; mila nemi mip kip levesongsongot la ma xopara i do tara atnimi na subu at lunuunu ren. Miklen i do ne Moroa ga soxolik ka nedik, kusu atap kip levesongsongot. Maga nemen eburu minemi, la maga tong i rinimi do nedik atanabap kip levesongsongot. La nemi mi xasep do mo levelinga atnama ga vot tuturun, levesongsongot ga rupot saparap dik. Kuren la nenia a goxo epovo do ana ngangais gamasa, la aga riki ne Timoti saparap nimi xusu neni naklen ka be lunuunu atnimi, do i ruturun ne Satan ga lok tong pen nimi la miga subu vam, la mo lugugu maga lox i xantubu atnimi ga ravasu ngan lavanga gamasa.

Ketla na nga ne Timoti gamlong basinge nimi ude la neni ga tong asu levelinga avukat tinama. Neni ga tong i rinama do lunuunu mi labalamu atnimi move i lolos la lodoxoma atnimi i lok momo minema; la mi vara aleng i do mina ven nama ngan nema ma vara aleng i do mana ven nimi. Luvutnetak mi luvurinuk, map kip levesongsongot mi levenmumuat, ketla ma lok momo mila lunuunu atnimi i tu lolos. La ma rooro avukat mila lunuunu atnimi i tu lolos at Leeme Silok. Nema ma emi asu mi ne Moroa mumu nimi; nemi mi lox amomo aleng nama at lemeren ne Moroa. 10 At levenaleng kanimin la levenaleng kangking ma ngising amisik ne Moroa do mana vot pasa nimi la mana lok tooro nimi, kusu mana lox epovo lavakpakes at lunuunu atnimi.

11 Lisingising atnama keretna; Moroa Temen dik eburu mi ne Iesu, Leeme Silok atdik duna lok tangas tinama xusu manaba vot pasa nimi. 12 La Leeme Silok na lox asilok labalamu atnimi xusu mina ebalamu ela la mina balamu aleng limixin petpes bok, kerekngan nema ma balamu nimi. 13 La kerepmo neni na lox alolos lorooro atnimi xusu lorooro atnimi nak mokso aleng at lemeren ne Moroa ne Temen dik, ap mo laaleng ne Iesu, Leeme Silok atdik nabamlong eburu mi limixin dadat teren.

Copyright information for `MMX