1 Thessalonians 4

Loklok Ne Moroa I Momo Aleng Tin

Nia ana lox axap levelinga rak. Luvutnetak mi luvurinuk. Maga lox ase vam nimi mi lavatpas at limixin di nuunu xusu mina rooro avukat la mina lok mo levempanga avukat ne Moroa i vara i. Mik lox i xerepmo, ketla ma sing nimi at lemeren Leeme Silok, ne Iesu keretna; mina lolos kusu lorooro atnimi naba lox avukat axap. Mi xasep pam at levelinga at Leeme Silok, ne Iesu, maga tong i rinimi.

Moroa i vara i do lorooro atnimi na xaala aleng. Mina ke xepe loklok ti elongka la loklok kakapmek maxamang at lixitkis epot. Nemi getgesara mina xasep at loklox avukat ti epot kaka tatkin la mina lox i nom mi loklok nunuan. La kerepmo nemen mita mumu asu mo loklok kakapmek atnedi dixoklen ne Moroa. La kerepmo bok nemen mita lok kapmek lixitkis at luvutneton nimi di nuunu at ne Iesu. Maga tong axasep pam i do Leeme Silok ne Moroa naba lox asongot nedi di lok kapmek lixitkis epot. Moroa ga ro ka nimi xusu mina dadat aleng, kopmen do ri lox abilinga lorooro atnimi. Kuren la nedi mo di noxo ronga res at na levelinga atnama, dixo lok tavanga rinama, ketla di lox abulubun kepe levelinga at ne Moroa, mo ga raba nemi mi Loroonan Kaala ren.

Nema noxo malagan tevelinga mumu labalamu atnimi saparap limixin nuunu; mila ne Moroa ga lox ase vam nimi do mina ebalamu ela. 10 Luvutnetak mi luvurinuk. I ruturun do mi balamu nedi axap luvutneton dik to at lenep silok Masadonia; ketla ma tong alolos i rinimi do mina balamu aleng di. 11 La mina lolos kusu minat kis mulus at lorooro atnimi la mina lok tatao avukat levempanga atnimi; mina gugu xusu mina lok kaka levempanga mik pakes tin at na lorooro. Mina lox i na xerekngan magara tong pam i rinimi gano. 12 Kerepmo lavamolon diba lok ngangao atnimi la mi noxok pakes ti loklok tooro at limixin petpes.

Leeme Silok Naba Ro Xaka Limixin Teren

13 Luvutnetak mi luvurinuk. Ma vara i do mina xasep mumu nedi digara met pam; la ma xopara i do minak lok bukbulu xerekngan nedi limixin kopmen dina nuunu at ne Iesu Karisito. Do tara atdi na met, di lok bukbulu aleng mila dixo doxoma voovo ri lorooro melemu. 14 Ketla nedik ta nuunu do ne Iesu ga met la ga roo xat bok, kuren la ata nuunu do ne Moroa naba ro xaka nedi limixin nuunu diga met pam; la dinabat pas eburu mi ne Iesu uto vana at laxalibet.

15 Na lavapaase axasep boro at Leeme Silok. Nedi limixin nuunu move di rooro at lomlong at Leeme Silok, di noxomgo avot upana rinedi diga met pam. 16 Ap mo laaleng limixin dinaba ronga luxupkup lolos la laangelo gomgo naba toro, la luru at ne Moroa nabang teng, la Leeme Silok naba si ukopok boro vana at laxalibet. La nedi limixin nuunu diga met pam, dinaba roo xat amlong la dinaba urut avot. 17 La nedi limixin nuunu move di rooro ap mo laaleng, dinaba urut la dinaba vot pasa nedi digamgo vam at labantakabu; la dinaba ekip tangarang mi Leeme Silok to at lamavangkap la nedik tanaba nemen amisik eburu min. 18 Kuren la mina elok tooro ela mi na levelinga xeneng atnemi.

Copyright information for `MMX