1 Timothy 2

Pol Ga Paase Lolos Mumu Leveloklok At Lotu

Lavanga avot keretna. Nia a sing lolos u do limixin at lotu dina tong asu amisik levesingising la levelinga loklox avukat kusu ri lok tooro limixin axap; la levesingising bok ti lok tooro lavaorong silok la tinedi limixin amgomgo, kusu ataba nemen atnaasan at lorooro nunuan eburu mi limila, la lorooro atdik na umsu mi loklok ngangao saparap ne Moroa la kopmen taxakapmek teren. Ana i lox avukat la i lox amomo aleng ne Moroa, Laradi Loklox Arooro atdik. Neni i vara i do limixin axap dinaba ruuna ka lorooro avolo, la dinabaklen avukat levelinga ruturun teren, mila legesa Moroa mun, la legesa radi mun ik lok lumulum kantubu at ne Moroa mi limixin, neni ne Iesu Karisito. Ni ga raba xa i ngan laxaavuk ti lox arooro limixin axap basinge laxakapmek atdi. Na ga ravasu ruturun at loxonaleng mokmokso ren. La nai lavasuun teren la ni ga sak tiki ia ngan laradi vavang la laradi loklox ase ti limixin kopmen me Judaia, kusu ri tong asu levelinga ruturun at lunuunu ridi. Nia xopmen ana xaxarang, nia a tong asu levelinga ruturun.

A vara i do lavatlok at levengkot axap dina ngising amisik, la dina song aurut mi levengkikngen di upana keneng at levesingising atdi la kopmen teven mukmusak la levenedak noxo nemen at lorooro atnedi. A vara box i do lavakin dina lok tatao avukat nedi la dina ven mumu avukat levesingsiga atdi la dina sinang avukat di; nemen dita meva lempatkabinim atnedi la nemen bok dita sinang mi leven gol la levenpeal, la levempanga singsiga, luunun teren i silok. 10 Ketla dina lox asu leven gugu nunuan, mo ik mokso ri lavakin di lotu ruturun saparap ne Moroa.

11 I lox avukat do at loxonaleng lavakin dina ronga levelinga at ne Moroa, dinat kis atnaasan la dina lox axakalik di. 12 Axo vara i do lavakin dina lox ase lavatlok to xeneng at lotu la di noxomgomgo ri lavatlok; dinak lox atnaasan mun. 13 Lavasuun at nom keretna; Moroa ga rudum li avot ne Adam la melemu ba ne Iva. 14 Lara lavasuun bok teren i lok keretna; kopmen ne Adam ga mu asu laxaxarang at ne Satan, nom latkin ga mu asu i la ga los polo levelinga at ne Moroa la ga lok laxakapmek. 15 Ketla lavakin di pisik laxamdak lixilik; kuren la dinaba lok ka lorooro, mo do dina nemen lolos at lunuunu la labalamu la lixitkis dadat mi loklok mulus.

Copyright information for `MMX